|
|
||
| ||
|
22/03/2008
A FESTA DI L'OLIU NOVU 2008
Dapoi 12 anni, Santa Lucia di Tallà festighjeghja l’oliu d’uliva, una di e so ricchezze lucali è a fiera artigianale si ferà i 29 è 30 di marzu. Ci serà dinù un dibattitu urganizatu tutta a ghjurnata di sabbatu u 29. U tema hè u sviluppu è a valurizazione di u territoriu. Pè a fiera, accant’à l’oliu di l’uliva, ritruverete a robba purcina, casgi, farina castagnina, mele, cunfitture è vini. L’artigiani lucali prupuneranu a so pruduzzione : travagliu di u legnu, di a petra, di u ramu, di u vetru eppo cultelli, sporte, pignule, giuvelli è opere d’arte. A ghjurnata sana, u publicu puderà scopre l’ecomuseu in u vechju fragnu. Pè tastà a qualità di l’olii d’uliva pruposti o i pranzi appruntati da Cucina Corsa, parechje furnate di pane seranu cotte à l’antica in u vechju fornu in petra. D’altrò, un cuncorsu regiunale di casgi corsi hè urganizatu da a Fiera di u Casgiu, sabbatu u 29 di marzu, à 10 ore è mezu, in a sala pulivalente. A Festa di l’Oliu Novu hè dinù un locu privilegiatu di scambiu trà l’attori di u sviluppu lucale pè rinvivì i paesi. Sti dui ghjorni, u publicu ci pò scopre i sfarenti modi di pruduzzione di l’oliu d’uliva. In più, u Parcu Naturale Regiunale di a Corsica presenterà una spusizione nant’à l’uliva è l’ulivu. Cù a so sega à mutore, Stéphane Deguilhem hà da zuccà davant’à i spettatori un mulu in legnu purtendu una soma d’ulive cum’è tempi fà. Eppo, puderete ammirà e so opere nant’à u campu di fiera. U documentariu « FADOLI D’OLI - Les oliviers du pays niçois » rializatu da Christian Passuello, presenterà e sfarente tappe di u ciclu di l’ulivu. Si pò visità dinù a spusizione di u patrimoniu di u cultu in a chjesa di Santa Lucia di Tallà, sabbatu è dumenica da 3 ore à 5 ore. Infine, u gruppu Novi canterà u sabbatu à parte da 6 ore nant’à a piazza Coletta. A dumenica, u gruppu Alta Strada animerà u campu di fiera. Riferenza in l'archivii ADECEC: A – SANTA LUCIA DI TALLÀ 21.03.08 FES
|
