27/03/2008

 

UMAGIU À JÉRÔME SANTARELLI

U 25 di marzu di u 1912, in Vighjanellu, nascia Jérôme Santarelli. Durante a seconda guerra mundiale, trà settembre 1939 è ghjugnu 1940, hè mubilizatu à u decesimu battaglione di u 373u RI in u settore di Sant’Amanza, in Bunifaziu. L'Occupazione taliana principia l’11 di nuvembre di u 1942 : dopu esse statu chjappu da a pulizza, parte da u paese di Serraghja u 2 di dicembre è ghjè accoltu da i fratelli Paul et Charles Tramoni in a valle di l'Ortolu. Eppo, sceglie a clandestinità contr’à u nemicu. Cù Joseph Tramoni, chì serà merre di Sartè à a Liberazione, trova un rifugiu in una grotta sopr’à sta valle di l'Ortolu. I dui omi scrivenu fogli di prupaganda è sò sempre in leia cù i so amichi di Sartè. Di ghjennaghju 1943, principianu à cercà cuntatti diretti cù a pupulazione lucale pè fà nasce a Resistenza.

Di marzu 1943, u Fronte naziunale li dà u postu di rispunsevule militare di u circondu d'Aiacciu. Ricupereghja u postu di radiu di a reta Fred Scamaroni allora chì i rispunsevuli di sta reta eranu chjappi. U mese dopu, participeghja à una reunione in Aiacciu cù altri resistenti. U scopu hè di lià l’azzione di i gruppi di Resistenza è furmà un’armata secreta. Jérôme Santarelli trasmette l’istruzzione à ogni rispunsevule militare cantunale di u circondu.

Dumenica u 27 di ghjugnu di u 1943, si trova in Aiacciu ind’è i so cugini Antoinette è Jacques Bonafedi, cù Jean Nicoli. Approntanu a ghjunta nant’à a costa di l’Agriate di u sottumarinu Casabianca chì deve purtà parechje tunellate di materiale di guerra. Finalmente, Jérôme Santarelli è Jean Nicoli sò chjappi da i taliani. Eranu ghjudicati u 28 d’aostu di u 1943 da u Tribunale militare talianu. Nicoli hè cundannatu à morte è tombu u 30 d’aostu. Santarelli, cundannatu à 30 anni di prigiò, hè mandatu in Italia u 3 di settembre ma riesce à fughje è vultava in l’isula u 7 di lugliu di u 1944. Hè mortu u 15 di ferraghju di u 2008.

Riferenza in l'archivii ADECEC: A – ANACR 17.02.08 CHA

 

 

Rivene à a pagina d'infurmazioni