|
|
||
| ||
|
04/04/2008
PASS CULTURA
Ci hè vulsutu un annu di travagliu à a Cullettività Territuriale di Corsica pè creà u Pass cultura, un veru arnese d'apertura culturale. U scopu : permette à 12 500 giovani isulani di cunnosce ogni settore di a cultura (spettaculu vivu, cinema, lettura, musei, mediateche, pratiche artistiche...) L'avvicinamentu di l'arte deve fassi à u più prestu in a vita pè spannassi è integrassi. Dunque, à parte da u 21 d’aprile, i liceani è i giovani da 15 à 20 anni, esciuti da u sistemu sculare, puderanu ottene, di rigalu, un carnettu di scecchi valendu 55 scudi. Entrate gratisi o prezzi menu cari sò à u prugramma. U ponu avè in i licei o à u CRIJ, per esempiu. Una prima fasa di valutazione hè prevista à a fine di l’annu 2008, cusì si saperà cumu migliurà u Pass cultura. Hè statu presentatu da Simone Guerrini, a cunsigliera esecutiva incaricata di u patrimoniu è di a cultura, cù Catherine Colombani, a rispunsevule di u dispusitivu. Riferenza in l'archivii ADECEC: A – CM 03.04.08 CHA
|
