Matteu CECCALDI (1893 - 1993)

 

 

Casata: CECCALDI

Nome: Matteu

Nascita: U 22 ottobre 1893 in Evisa

Morte: In 1993 in Aiacciu

 

Secretariu generale onurariu di l'Uffizii dipartimentali di l'Anziani Cumbattenti

 

Opere publicate:

 

Dictionnaire Corse-Français (pieve d'Evisa), Klincksieck édit. 1968

O Missià, prosa, Premiu Pierre Bonardi 1965

Anthologie de la Littérature corse, Klincksieck édit. 1973

Traduzzione in lingua corsa di e "Lettres de mon moulin" è di "Contes du lundi" di Alphonse Daudet, 1980.

 

Strattu:

 

O GIUVANOTTU

 

Avaraghju avutu tredici anni è mamma mi curava sempre cum'è u granu à u sole. S'ella avessi sappiutu ch'eiu girava e sette chjappelle ùn si saria risicata à mancà di facitoghja o à truvassi à pane compru, mentre chì in granaghju ci era u granu à sacchi. À ringrazià chì u bisognu abbatte e lege è cusì mi fù cuncessa di tuccallami à u mulinu suttanu di Portu, una mane in frescu, par fà macinà dui mizini di roba. Fù, quella, a me prima sbaldita à palesa.

Me ziu Pittistu m'avia datu à Lione, un sumere chì battia focu. Mancu mosche s'arrighjianu annantu à Lione. È chì trapassu, figlioli! Eppò ùn arricava vargogna à chì u si parava inanzu: umbasti infarrati, feltri di grussume novu, imbraca è pitturale di coghju, funa cavallaghja cum'è e mulesche è un timpanu latinu chì saria statu bè ancu una ghjesgia...