S'appronta in Cervioni un spettaculu storicu. Un prugettu purtatu da l'ADECEC in u quadru di u pattu lucale Costa Verde, iniziatu da a Cullettività di Corsica. Si tratta d'un puntellu à prò di i citadini è di l'attori lucali, un prugettu europeu pè migliurà azzione publiche, cunservà, prutege, favurizà è sviluppà u patrimoniu naturale è culturale. Un arnese pè amparà è cullaburà. Frà i so ogettivi, quellu di sperimentà metudi innuventi pè migliurà a leia identitaria trà i musei, lochi di cultura è i territorii assicurendu a durabilità mutuale è u sviluppu socio-ecunomicu. A messa in risaltu di a lingua corsa hè dinù in core di stu pattu lucale. A direzzione di u patrimoniu di a CDC hè rispunsevule di a messa in opera di l'azzione è di e cullaburazione cù i musei di Livia è di Merusaglia, a cumunità di cumune di Costa Verde chì hà sceltu l'ADECEC cum'è capu di reta.

Frà l'azzione ritenute, u spettaculu vivu nant'à a ghjunta di Teodoru di Neuhoff in Cervioni. U prugettu s'ispira di un'opera teatrale rializata cù i paisani di A Porta nant'à u tema Rè di a Corsica, una decina d'anni fà, è ne prupone un'adattazione in core di Cervioni, capitale storica di a Corsica. Pè stu spettaculu, a scena serà a piazza di a catedrale di sta cumuna. U publicu hè invitatu à campà a ghjunta triunfente di u rè è a so stallazione à u palazzu episcupale. Pè rializà stu prugettu, di ghjugnu prossimu, si manda una chjama à attori benevulenti. Donne è zitelli averanu roli minori ma omi deveranu interpetà u rè Teodoru, Ghjacintu Paoli, Luiggi Giafferi è Ghjuvan Andria Ceccaldi. In tuttu, una rializazione cù 30 è 40 persone in i roli di i zitelli, paisani è paisane, canterini è ghjucadori di Mora. E persone interessate deveranu participà regularmente à e ripetizione dirette da Francine Innocenzi. Iscrizzione : 04 95 38 12 83.

"Amichi cari di quì o di altrò, paisani di Cervioni o di u cuntinente, vi dumandemu di chjode l'ochji è puru imaginà a Corsica di ghjennaghju 1734. L'isula sana hè sottumessa à Genuva... A rivolta si sparghje da una pieve à l'altra. State à sente a storia di a Corsica. State à sente a storia di Teodoru di Neuhoff Rè di Corsica, un affrescu storicu basatu nant'à i fundamenti di a custituzione di u reame di Corsica."