U cullettivu di e vittime di a catastroffa di Furiani hà presentatu u prugramma pè a cumemurazione di i 30 anni di a tragedia. Rammintemu ch'ella hà tombu 19 persone u 5 di maghju di u 1992 è feritu più di 2300. Trà testimunianze, diffusione di filmu, turneu di ghjocu à pallò è dibattitu. Stu duvere di memoria principierà venneri u 22 d’aprile cù l’inaugurazione di a stallazione artistica di l’elevi di u cullegiu Simon-Vinciguerra in Bastia in omagiu à e vittime. I cullegianti anu travagliatu nant’à un duvere di memoria. Sò previste una spusizione pruvisoria, una cumpusizione flurale, una spuzione permanente cù l’inaugurazione d’una panca bianca è turchini à i culori di u SCB.

Marti u 3 di maghju, prima prughjezzione di u filmu “5 mai 92” rializatu da Corinne Mattei à u spaziu culturale Carlu Rocchi in Biguglia. U lindumane, stu filmu serà diffusatu di novu à u campu Armand Cesari dopu à u turneu di ghjocu à pallò per i zitelli. Sta ghjurnata si compierà cù un scontru amichevule trà l’effettivu bastiacciu di u 1992 contr’à a squadra di u ricordu cumposta d’anziani ghjucadori di Bastia è di l’OM. Un scontru chì hè statu organizatu grazia à u famosu giurnalistu di RCFM, Jean Pruneta, è Jean-Paul Cappuri, anzianu giurnalistu di Corse-Matin.

Pè a ghjurnata di u 5 di maghju, cum’è tutti l’anni, ci serà un’addunita davant’à a stela di Furiani à 4 ore, seguitata da a messa à 6 ore a catedrale Santa Maria in citadella di Bastia.

Venneri u 6, à u teatru di Bastia, Alexandre Oppecini prupunerà un “ogettu teatrale”. Si tratta d’una messa in scena fundata nant’à testimunianze di vittime è di persone avendu campatu sta tragedia.

Sabbatu u 7, à u centru culturale Una Volta, cunferenza di Richard Rechtman, antrupulogu è psichiatru, è di Joseph Agostini, psiculogu è psicanalistu nant’à u tema “Da u trumatismu di Furiani à a memoria cullettiva d’oghje”. Cunferenza à u centru culturale Una volta, carrughju César Campinchi. Sta ghjurnata si cumpierà cù un mapping vidéo ( vale à dì una prughjezzione di fiure nant’à a facciata d’un casamentu di u vechju portu di Bastia à parte da 8 ore è mezu sin’à mezanotte. Infine, da u 2 à u 7 di maghju, l’associu Ghjuventù cerviuninca, prupone una spusizione rammentendu a ghjurnata di u 5 di maghju. I so membri interpreteranu una canzona in memoria di e vittime durante un turneu di pallò di u 4 di maghju.