menu menu_open
ADECEC

Noratlas, une enfance entre la Corse, l’Algérie et Paris, u novu libru di Norbert Paganelli

Cù Noratlas, i Corsi chì anu cunnisciutu l’anni 50-60 anu da ritruvà sta Corsica chì gira u spinu à una civilisazione agropasturale pè andà versu a mudernità o a mediucrità riprisentata da u formica, u transistoru, a televisiò è e vitture sempre di più numerose. Anu mudificatu l’usi antichi è fattu nasce dibattiti ind’è e famiglie corse. A storia principia in u 1956, l’annu induve a Francia si ritira definitivamente di u meziornu da l’Indochina. U chjucu Norbert Paganelli ùn hà ancu l’età pè ricurdassi di sta marchja dulurosa di a Storia. 

S’arricorda quantunque di l’invernu 1956 assai fretu. In Corsica, ampara a vita in sucetà ind’u caffè d’Antoine è di Maria. Dopu sbirba in Algeria induv’ellu raghjughje i so genitori. In scola, s’imbuleghja cù l”indigeni” è cumunità pedinere. In stu paese chì s’assumiglia à a Corsica, campa spenseratu ma deve parte in Parigi quandu l’Algeria ottene a so indipendenza. Un altru mondu pè Norbert da scopre in Noratlas, une enfance entre la Corse, l’Algérie et Paris, u novu libru di Norbert Paganelli à l’edizione Le Bord de l’eau.

L’autore hè sartinese. Hà publicatu più d’una decina di libri di puesie è hà ottenutu u Premiu di puesia corsa in Santa Teresa di Gallura (2009), u Premiu di a creazione litteraria di a CTC in u 2014, u Premiu di u Libru Corsu (2015) è u Premiu di u Cunsigliu dipartimentale di Cismonte in u 2016. Hè cofundatore di a Casa di a Puesia di a Corsica.