L’anzianu circulu Cyrnos di Peru Casevechje, chjusu dapoi 40 anni, hè rinvivitu. Stu locu di vita è di spartera testimunieghja di l’investimentu è di a passione di l’associu spurtivu è culturale di Peru Casevechje, chì hà rializatu u prugettu. U cantieru hè stata una stonda di sulidarità, d’aiuti materiali è umani trà paisani. Speranu esse l’eredi di a famiglia Geronimi chì tenia l’anzianu Circulu Cyrnos.

Ghjè un locu di scontri, di scambii, di cunvivialità, di macagna, di musica è di memoria. A memoria cù i 1500 ritratti di a storia cullettiva di u paese esciuti da l’attu fundatore “Peru Casevechje tempi fà”. Ritratti cù i surrisi di l’anziani è ognunu rammenta ricordi. In stu locu, si vene à beie un caffè, à fighjà un scontru di u SCB, ghjucà à carte, fassi duie risate, sunà di chitarra o campassi cù l’apperitivi nustrali. U Circulu hè apertu da venneri sera à a dumenica sera. St’estate, l’urari d’apertura seranu allargati cù attelli musicali. Una terrazza hè assestata. A cutisazione hè di 5 euri pè avè accessu à e sfarente animazione. U Circulu Cyrnos hè un’aventura umana, purtata da una squadra sulidaria è unita avendu in core l’amore di u so paese. Un investimentu benevulente chì piglia u so sensu durante e longhe serate d’invernu.