U vignaghjolu Eric Poli hà vintu nove medaglie à a mostra di l’agricultura in Parigi. In a gamma IGP (Indicazione Geograffica Prutetta), i vini chjarasgini, fatti à parte da racolte di Niellucciu è di Sciaccarellu, anu vintu una medaglia d’argentu, u Rossu hà ottenutu l’oru ! Listessa pè u Clos Alivu, un’AOP Patrimoniu, chì hà ottenutu una medaglia d’argentu pè u Rossu è d’oru pè u Chjarasginu ! 

L’impegnu di i vini Eric Poli è fils si fonda capunanzu nant’à u rispettu di u rughjone è di i metudi tradiziunali cù a scelta di l’uvizzi anziani è endemichi, e vindemie manuale, i metudi di vinificazione tradiziunali, u rispettu di a terra è di a so natura salvatica. E piantazione di l’annu 2024 seranu fatte cù uvizzi nustrali, frà quessi u Genovese pè rinfurzà a qualità sputica di sti vini. Cù u tempu, a pruduzzione hè migliurata ma a qualità ferma. Cercanu oramai un cantinaru sperimentatu è passiunatu cum’è a famiglia Poli è una vendidora. St'ultima deverà sapè cuntà a storia di u duminiu parlendu à u core di i clienti ghjunghjendu in Bravone pè tastà sti vini di sottu scala.