Fubbe unu di l’artigiani maiò di l’Università d’Estate di Corti vicin’à un populu chì militava pè a so Università è u so dirittu à a vita. 50 anni fà, sti piunieri di u Riacquistu mustravanu a strada. Pè Ghjuvan Ghjacumu Albertini, grazia à l’università d’estate, s’hè diffusa a presa di cuscenza chì a vita culturale oghjinca s’era persa. A ghjente s’adunia per quessa. Per ritruvà la in mumenti di calore.

Durante ste ghjurnate era nata a granella è i Corsi l’anu suminata in ogni locu. S’era creatu un clima. Hè stata un’aghja induve tutt'ugnunu pudia vene à batte u so granu.

Ghjuvan Ghjacumu Albertini s’arricorda chì tandu per disegnà st’andatura c’eranu parechje parolle : rinascita, riconquista, rinascimentu, leva di u 70. Po’ in u 74, durante à l’Università d’Estate, Rinatu Coti hà parlatu di Riacquistu, è s’hè imposta sta spressione.

Hà scrittu puesie in e riviste U Muntese in u 1960, Arritti in u 1978, Rinforzu in dui vulumi in u 1975, e nuvelle E Capacce in a racolta cullettiva “Misteri da impennà” (1989), “Levantina” in a racolta “Ci sò” in u 1994, è canzone pè u gruppu Caramusa. Infine, hà prumossu Ghjurnate multidisciplinarie animate da Pascal Marchetti in u 1973 in leia cù a lingua corsa è i studii universitarii.