NUVEMBRE
I Santi.
A festa di i Santi hà per urigine una festa di i martiri di u mondu sanu chì ghjera in usu in a Chjesa d'Oriente à u seculu quartu. Per l'Occidente, l'annu 608, u papa Bonifaziu Quartu (608-615) hà fissatu à u primu nuvembre a festa di tutti i Santi. Nanzu era u 13 maghju. A scelta di u primu nuvembre, vigilia di i Morti, hè stata per caccià una antica festa pagana.
Da i tempi antichi, in Europa, u ricordu di i Morti si facia u primu nuvembre. D'altronde, in Corsica, hè sempre in usu, o era sempre in usu pocu tempu fà, di andà issu ghjornu à u cimiteriu.
Etimolugia: traduzzione di u let. "Omnes Sancti".
Casate: Santi, Desanti, Santelli, Santarelli, Santini, Santucci, Santoni.- In u 1981, in Corsica, a casata Santoni venia à u sestu rangu, dopu à Casanova, Albertini, Luciani, Mattei è Rossi (cantone di Zicavu: 29%, Santa Maria Sichè: 15%, Aiacciu 14%, Prunelli di Fiumorbu 10%). A casata Santini venia à u 29èsimu rangu è Santucci à u 37èsimu. A' elle trè: Santoni, Santini è Santucci, riprisentavanu 12,4 casate nantu à 1000.
Nomi: Santa, Santinu, Santu, Tossanus, Toussain, Toussaine, Toussaint, Toussainte, Tutia.- U nome Santu - cum'è d'altronde Pasquale o Natale - ùn hè micca ricunnusciutu da a Cristianità. E' purtantu, for di i paesi prutestanti, serve assai.- In u 1981, in Corsica, u nome Santu venia à u 14èsimu rangu di i nomi maschili, era quellu di 13 omi nantu à 1000. Santa venia à u 14èsimu rangu di i nomi feminili. Era quellu di 10 donne nantu à 1000.
Paesi è cità: Bustanicu (festa patrunale).
Detti è pruverbii: "A' chì sumena avanti à i Santi, sumena pè i cantanti (l'ocelli)". "U primu di nuvembre, San Martinu risplende è si sparghje u vinu". Vene li Santi chì inchjarisce u vinu; à l'11 risplende San Martinu".
I Morti.
A cumemurazione di l'anime di i Morti ricolla à un millaiu d'anni fà. Hè stata istituita da Santu Odilone, abbate di Cluny da l'annu 998 à l'annu 1048.
Santa Laurina.
Laurina, vergine è martira, hè una santa corsa di l'epica di santa Divota. Serebbi nata in Aleria. In Aleria esistia una chjesa di Santa Laurina. U titulu era appicciatu à un canunicatu. D'altre chjese eranu in Omessa, Corti, Vivariu è Corscia.
Ghjambattista Imperiali, vescu d'Aleria in Cervioni, hà alzatu a festa in ritu doppiu di prima classa cù uttava.
Etimolugia, casate è nomi: Cf Lurenzu (10 agostu).
Santu Carlu Borromeo.
Carlu hè natu u 2 uttobre 1538, in u castellu di Borromeo, in Italia, accantu à u Lagu Maggiore.
Quand'ellu hà 21 annu, u fratellu di a mamma, Anghjulu di i Medici, hè fattu papa cù u nome di Piu Quartu. Carlu diventa u so secretariu di Statu. Subitu dopu, u ziu u face cardinale, li dà l'amministrazione di a dioccesi di Milanu, e legazioni di Bologna, Spoletta è Ravenna, è a commenda di l'abbazie di Mozzo, Polina, Colle è Nonantolla, ciò chì face un rivenutu di 52.000 scudi à l'annu, sia u valore di 1.528.000 chilò d'argentu. Si tratta di un casu veradimente scandalosu ma, à l'epica, i patroni di a Chjesa circavanu più l'onori è u prufittu chè u Paradisu.
Trè anni dopu, Carlu Borromeo cambia vita, raghjunghje a so dioccesi di Milanu è decide di mette in opera e decisioni di u cunciliu di Trento finitu in u 1563. Crea trè grandi seminarii è trè picculi, è apre 800 scole cù 6000 preti per amparà a duttrina. Si fece unipochi di nimici, tantu laichi chè preti. Un frate pruvò ancu à tumballu tirenduli una archibusgiata.
Carlu Borromeo hè mortu in Milanu à 46 anni, u 3 nuvembre 1584. Lasciava una dioccesi chì fù un mudellu per tutti i paesi catolichi.
Etimolugia: da u germ. "harja" (armata) o "carl" (omu, maschju, omu di cundizione libera). Indì i Franchi, hà pigliatu u sensu di "maestru di Palazzu" è po "altu funziunariu di a Corte".
Casate: Carletti, Carli, Carlini, Carlotti, Doncarli.
Nomi: Carito, Carl, Carla, Carlettu, Carlina, Carline, Carlina, Carlinu, Carlo, Carlos, Carlotta, Carlu, Carlyle, Carol, Carola, Carole, Carolin, Caroline, Charel, Charlemagne, Charlène, Charles, Charletta, Charley, Charlie, Charline, Charlot, Charlotte, Charly, Cheree, Cheryl, Chick, Chuck, Halle, Jarl, Karel, Karl, Karlota, Karlouchka, Kerdel, Korl, Linchen, Lini, Lola, Loleta, Lolita, Lotta, Lotte, Lottie, Sarel, Sherry, Sheryl, Siarl, Teàrlach.- In u 1981, in Corsica, Carlu venia à u 10èsimu rangu di i nomi maschili. Era quellu di 26 omi nantu à 1000.
Paesi è cità: Milano.
Santa Silvia. Santu Zaccaria è Santa Lisabetta.
Silvia, forse di urigine siciliana, era maritata cù un nobile rumanu. Era a mamma di u santu papa Gregoriu Magnu, unu di i più celebri, un papa chì hà fattu assai pè a liturgia, pè a disciplina ecclesiastica è pè u casale di a Chjesa. E' purtantu era malaticciosu. Ma Silvia l'hà sempre curatu fenduli manghjà i pustimi di u so ortu chì, ella, si sfidava di ciò ch'elli vendianu à u marcatu.
Hè morta in Roma versu l'annu 592, una duzina d'anni nanzu à u figliolu.
Etimolugia: da u lat. "silva" (furesta, valdu).
Casate: Silvagnoli, Silvestri, Silvarelli (Cf Silivestru 31 dicembre)
Nomi: Fester, Jelvestr, Sailbheastar, Sila, Silane, Silas, Silivestru, Silouan, Silva, Silvaine, Silvana, Silvane, Silvano, Silvère, Silverio, Silvester, Silvestre, Silvestre, Silvia, Silviane, Silvin, Silvina, Silvino, Silvio, Silviu, Silvius, Sylvain, Sylvaine, Sylvan, Sylve, Sylvère, Sylvester, Sylvestre, Sylvette, Sylvie, Sylvin, Sylvius, Vester.
Paesi è cità: Brescia.
Zaccaria è Lisabetta eranu i Genitori di Ghjambattista u Precursore. Stavanu accantu à Ghjerusalemme. Ellu era prete.
Eranu disgraziati di ùn avè figlioli, chì Lisabetta era sterile è tramindui avanzati in età.
U Vangellu secondu San Lucca conta chì, un ghjornu chì Zaccaria era solu in u tempiu per offre l'incensiu à u Signore, ghjunse un anghjulu à diritta di l'altare chì disse:
- Un' teme nunda o Zaccarì, u Signore hà intesu e to prighjere. A to moglia, Lisabetta, parturiscerà di un maschju è u chjamerai Ghjuvanni. E' a ghjente si rallegrerà di issa nascita. E' ellu cunvertiscerà parechji figlioli di Israele.
- Ma - disse Zaccaria - sò vechju è a mio moglia ùn hè più giovana.
L'anghjulu rispose:
- Eiu sò Gabriele è stò davanti à Diu. Ghjè ellu chì mi manda per fatti sapè a bona nova. E', per datti a prova di ciò ch'o dicu, à partesi da oghje serai mutu sinu à u ghjornu chì iste cose accaderanu.
E' Lisabetta parturì di un maschju. Ottu ghjorni dopu, i vicini, i parenti ghjunsenu per circuncide u zitellu. Dissenu: u chjameremu Zaccaria cum'è u babbu. Allora u babbu scrisse nantu à una tavuletta chì ci vulia à chjamallu Ghjuvanni. E' tandu ritruvò a parulla.
Etimolugia: da l'ebreu "zekaryah" (Iavè si ramenta).
Nomi: Zaccaria, Zacchaeus, Zach, Zachariah, Zacharias, Zacharie, Zachary, Zacher, Zacherl, Zoch.
Paesi è cità: Venezia.
Per Lisabetta, Cf Lisabetta di u Portugallu (u 4 lugliu).
Santu Leunardu.
Di Leunardu ùn si sà nunda di certu. Averebbi campatu trà u seculu sestu è u seculu decimu.
Una legenda dice ch'ellu era u figlianu di Clodoveu, rè di i Franchi, ch'ellu ricusò di esse suldatu par ùn avè sangue nantu à a cuscenza, è ch'ellu hè statu urdinatu prete da San Remigiu.
U cumpare u vulia fà vescu ma ellu ricusò dumandenduli a grazia di lasciallu andà à visità i prigiuneri per cunverteli è dalli a libertà. Dopu à avè giratu a Gallia suprana, hè falatu versu u meziornu. Ghjuntu in u Limusinu, scontra i servitori di u rè d'Acquitania chì l'avertenu chì a regina era in traccia di moresi per via ch'ella era in partu da cinque ghjorni senza risultatu. Leunardu face una prighera è a criatura, prigiunera in u corpu di a mamma, hè liberata. A' San Leunardu, u rè dete di chè fà un munasteru in un locu chjamatu avà Saint-Léonard-de-Noblat, in u dipartimentu di a Haute-Vienne.
A' i ghjorni d'oghje, l'abitanti di issa piccula cità concianu pelli, facenu scarpi, fabricheghjanu a carta, travaglianu a purzellana... ma, seculi fà, eranu osteriarii è butteari per riceve tutti quelli chì, da l'Europa sana, venianu à pregà à San Leunardu per ch'ellu dia a libertà à i prigiuneri.
Etimolugia: da u lat. "leo" (leone) è u germ. "hart" (forte).
Casate: Leonardi, Leonardini, Leonarduzzi, Linardi, Lunardi.
Nomi: Leent, Lehar, Lehrd, Leindel, Leinhard, Len, Lendel, Lennard, Lennart, Léonard, Leonarda, Leonarde, Leonardo, Leonerd, Leonhard, Leonharde, Lernert, Leunarda, Leunardu, Liénard, Lienet, Liert, Linnert, Lionardo, Lunarda, Lunardu.
Paesi è cità: Tolla (festa patrunale).
Santu Ernestu.
In u 1099, a prima Cruciata avia apertu a strada di i Lochi Santi à i pelegrini d'Europa è permessu di creà quattru picculi Stati cristiani: Ghjerusalemme, Antiocca, Edessa è Tripoli.
Quarantacinque anni dopu, i Musulmani ricunquistavanu Edessa è ghjeranu pronti à entre in Ghjerusalemme. Per impedisceli, partì, in u 1147, a seconda Cruciata. Fù un disastru. Eranu partuti 200.000, omi è donne, ne vultò qualchì millaia. Frà quelli chì ùn sò rivenuti, ci hè Santu Ernestu.
Ernestu era un frate, abbate di un munasteru nantu à e sponde di u lagu di Custanza, cù 70 frati d'altare, 130 frati domestichi, è 72 monache.
In u 1146, dopu à avè direttu sei anni u cunventu, Ernestu si licenziò per raghjunghje l'armata alemana cumandata da l'imperatore Cunradu Terzu. "Mi ne vò - disse - è spergu chì u Signore mi accurderà a grazia di more per Ellu". E' morse... ma ùn si sà nè quandu, nè induve.
Etimolugia: da u germ. "ernust" (battaglia).
Nomi: Aerna, Arnestu, Arnost, Arnst, Earnest, Erna, Ernest, Ernestina, Ernestine, Ernestita, Ernesto, Ernestu, Ernestus, Ernie, Ernst, Erny.
Tutti i Santi di Corsica. Santu Gottifredu.
Nanzu, in Corsica, si celebrava a memoria di unipochi di Beati, Venerabili, Servi di Diu, nati in l'isula, o chì ci anu praticatu e so virtù. Per ùn citanne chè qualchidunu, chì a lista hè troppu longa: Amanza, Bonifaziu, Laurina, Parteu è cumpagni di Mariana, Ghjilormu di Lanu, Vitale di Bonicardu, Fiurenzu è Fiora.
Issi santi sò stati scartati da a Chjesa corsa per via chì Roma ùn l'hà micca messi nantu à u Martirologu. Allora, hà decisu di riservà un ghjornu di u calindariu dioccesanu, l'8 nuvembre, per festighjalli tutti attempu.
Gottifredu avia una trentina d'anni quandu i frati di u vicu Novicenti (l'attuale Nogent-sur-Marne) u volsenu cum'è abbate. Un' eranu più chè sei in issa abbazia chì ghjera stata celebre, è i spinaghji si manghjavanu i muri. In pocu tempu, Gottifredu li fece ritruvà l'anziana prusperità. In u 1097, maravigliatu da u risultatu, l'arcivescu di Reims li dumandò di esse u superiore di l'abbazia San Remigiu, a più ricca di a dioccesi. Gottifredu ricusò, dicendu chì un onestu omu ùn si lasciava micca a moglia per piglianne una più bella.
A' 38 anni, l'anu fattu vescu di Ambiani (l'attuale cità di Amiens, dipartimentu di a Somme). Ci stete ondeci anni, ondeci anni di umiliazioni è di suffrenze. I so preti, currotti, vendianu i sacramenti. Pigliò pretesa pè a cumuna chì si era rivultata contru à a tirania è l'ingurditutine di i signori, è i signori u persecutonu è li resenu a vita impussibile. Ancu l'abbate chì l'avia sustituitu à Nogent si ridia d'ellu. Una notte di dicembre 1114, scappò per piattassi à a Grande Certosa, pregà, è vive in pace. L'anu ritrovu è ubligatu à rivene. Un' avia chè 49 anni, ma era frustu è, l'8 nuvembre 1115 si ne morse in l'abbazia di San Crispinu di Soissons duv'ellu era di passeghju. I so preti di Amiens ùn si mossenu per assiste à l'interru.
Etimolugia: da u germ. "gott" (diu) è "fried" (prutezzione).
Nomi: Friedel, Friedes, Géoffroy, Godefroi, Godefroy, Godel, Godfred, Godfrey, Godfroi, Godofredo, Goffert, Goffredo, Goffredu, Goraidh, Gotfrids, Gotfridus, Gothfraidh, Götschi, Gottfredo, Gottfrid, Gottfried, Gottfriede, Gotti, Gottifredu,Götz, Gotzi,
Paesi è cità: Amiens, Soissons.
Santu Salvadore.
Salvadore hè un nome di devuzione cristiana, senza ch'ellu sia quellu di un santu. Hè datu in l'onore di Ghjesù salvendu u mondu. Serve, o servia assai, in Italia, in Spagna, è in Corsica.
Casate: Salvadori, Salvatori, Salvarelli.
Santu Leone.
Di i papa chì anu pigliatu à Leone cum'è nome, cinque sò stati canunizati. U 10 nuvembre si festighjeghja à Leone Primu, u Grande, papa da 440 à 461. Era l'epica chì l'imperu rumanu, in Occidente, si n'andava à u sprufondu. I Franchi, i Visigoti, i Vandali, i Burgondi, eranu scalati per ùn parte più. For di i Franchi, chì ghjeranu pagani, l'altri eranu ariani: negavanu a divinità di Ghjesù.
In Oriente, a medità di i veschi eranu monofisiti. Per l'Armeni, pè i Ghjacubiti di Siria, i Coppiti di l'Egittu è di l'Etiopia, Ghjesù ùn avia chè l'apparenza di a nostra natura.
Leone hà luttatu contru à l'autonumia di isse chjese, predichendu è impunendu i dogmi di l'Incarnazione è di a Trinità. Avia e qualità di un omu di Statu è hà impeditu chì Bizanziu, duv'ellu stava l'imperatore, piglia a suprana à Roma.
Roma, l'hà salvata dinù l'annu 452, quandu Attila era prontu à ruvinalla pè u sempre. Leone si prisentò à ellu, pagò un tributu assai impurtante, è Attila si n'andete.
U cunciliu di Calcedonia, in u 451, fù un trionfu pè a duttrina è l'auturità di Leone. I cinquecentu veschi, aduniti da l'imperatore, si sò cuntentati di a lettura di a lettera di u papa. A cunclusione fù: Leone hà parlatu, "causa finita est".
Etimolugia: da u lat. "leo" (laone).
Casate: Leoncini, Leonelli, Leoneschi, Leonetti, Leoni.
Nomi: Leâo, Lee, Lei, Lénonie, Leo, Leon, Léon, Leona, Léonce, Leone, Léone, Leonia, Leonila, Leonilla, Léonille, Leonina, Léonine, Leons, Léontin, Léontine, Leontyne, Lev, Levounia, Lionia, Lonni, Nilla.- U nome Leone hè statu purtatu da 6 imperatori di Custantinopuli è da 13 papa.
Santu Martinu.
Martinu hè natu versu l'annu 316 à a fruntiera ungarese. A' l'età di 15 anni, era un suldatu di a Guardia imperiale. Contanu chì, un ghjornu, hà datu a medità di u so mantellu à un poveru spillaccheratu è chì, a notte, hà sunniatu à Ghjesù immantellatu dicendu à u Babbu: "U mantellu, hè Martinu chì u m'hà datu". Allora si hè fattu battizà, hà lasciatu l'armata è hà fattu u rimitu.
A' l'età di 44 anni, ghjunghje in Pictavi (l'attuale cità di Poitiers), scontra à santu Ilariu, è facenu un munasteru. Serebbi u primu munasteru fattu in e Gallie.
A' 54 anni, hè fattu vescu di Turone (l'attuale cità di Tours, in l'Indre-et-Loire).
More à 81 annu, l'8 nuvembre 397, dopu à avè evangelizatu una grande parte di a Gallia. Oghje, in Francia, Martinu hè u santu patrone di 3600 chjese è 485 paesi.
Etimolugia: da u lat. "martinus" (dedicatu à u diu Marte).
Casate: Martini, Martinenghi, Martinelli, Martinetti, Martinaggi, Martinucci, Demartini.
Nomi:Maartina, Machin, Marcin, Màrtainn, Märtel, Marten, Märten, Marti, Märti, Martie, Martin, Martina, Martine, Martinho, Martinian, Martiniana, Martiniano, Martinianu, Martinianus, Martinien, Martinienne, Martinka, Martino, Martinu, Martinus, Martjin, Martl, Marton, Marton, Martsen, Marty, Martyn, Matten, Mertens, Mirtel, Tien, Tienis, Tiens, Tinie, Tinus
Paesi è cità: Lucca, Belluno, Amiens, Braga, Colmar, Magdeburgu, Tours, Uri, Utrecht, Vienne. In Corsica, Martinu hè u santu u più festighjatu dopu à Maria, Ghjuvanni è Petru: Canale di Verde, Bisè, Costa Rota, Cuttoli Curtichjatu, Erone, Evisa, Patrimoniu, Ruspiglieni, Sari d'Urcinu, San Martinu di Lota, Siscu, Tavaccu, u Viscuvatu, Letia, Sotta.- L'isula di a Martinica hè stata scuperta da Cristofanu Culombu u ghjornu di San Martinu 1493.
Prutezzione: Martinu hè u santu patrone di i bottai, di i militari fantacini è di i pedoni.
Detti è pruverbii: Martinu hè u santu di a divizia. Quandu omu passava davanti à ghjente chì cuglia uva, biade o frutta, per salutalla si dicia: "San Martinu!"; A' i giovani sposi, si dicia: "San Martinu è figlioli maschji".
Un pruverbiu dice: "San martinu, mostu vale vinu", vole dì chì l'11 nuvembre si passanu e botti per tirà u vinu... s'ella ùn era digià fatta pè i Santi.
Filastrocca zitellina: "Un' piuvì, ùn piuvì
Chì ùn vole San Martì;
San Martì hè cullatu in celu
A sunà le trè campane
Pè i vivi, pè i morti,
Pè i Santi Pater nostri."
Santu Aureliu. Santu Rinatu.
Aureliu era un Primatu d'Africa à l'epica di Santu Agustinu è cumandava à 500 veschi. Per quasi 40 anni, fù unu di i capi di a Chjesa d'Occidente è u vescu di Roma avia per ellu assai riguardu. Quand'ellu hè statu sceltu cum'è vescu, era diacunu di Cartagine.
Saviu, prudente, energicu, Aureliu ebbe à luttà contru à u paganisimu, contru à l'eretichi (Dunatisti, Tertullianisti è Pelasgichi), ma dinù contru à unipochi di i so preti troppu infingardi, è dumandò à Santu Agustinu di scrive un libru contru à i frati sfaccendati è uziosi.
Cù simplicità, muderazione, ma dinù cù assai auturità, hà direttu 36 cuncilii pruvinciali. A so mudestia fece chì lasciava sempre parlà à Santu Agustinu. Hà incaricatu i so preti di annunzià a parulla di Diu è hà istituitu di cantà i Salmi durante a messa.
Serebbi mortu u 20 lugliu di l'annu 430, trè settimane nanzu à Santu Agustinu, dui anni dopu chì i Vandali abbianu occupatu l'Africa.
Etimolugia: forse da u gr. "aurios" (aurora, u fà di u ghjornu), o da u lat. "aureus" (cum'è l'oru).
Nomi: Auleria, Auleriu, Aure, Auré, Aurèle, Aurelia, Aureliano, Aurelianu, Aurélie, Aurélien, Aurélienne, Aurelio, Aureliu, Auriane, Aurica, Auriole, Aurora, Aurore, Avreliane, Orell.
Paesi è cità: E Cannelle, pieve d'Urcinu.
Di Rinatu ùn si sà nunda, for di una legenda. Issa legenda dice chì, un ghjornu, à u seculu quintu, una donna dumandò à San Maurigliu, vescu d'Angers, di falli un figliolu. Maurigliu fece una prighera è, l'annu dopu, nasce un maschju. Sette anni passanu. Una mane, a donna rivene à truvà u vescu mentre ch'ellu era à l'altare, per dilli chì u zitellu si muria. Maurigliu finisce a so messa, pianu pianu, è po parte. Era troppu tardi. Allora, cum'è scimignulitu, scappa in Inghilterra. U cercanu per celu è per terra è ùn u trovanu chè sette anni dopu, in un ortu, in traccia di vangà. U vestenu da vescu è u si portanu. Subitu ghjuntu, Maurigliu và nantu à a tomba di u figliolu... è u vede sorte, in salute. U cunfirmeghja è li dà u nome di Rinatu (natu una seconda volta). U zitellu ingrandò è, à a morte di Maurigliu, u sustituì cum'è vescu d'Angers.
Santu Rinatu fù festighjatu per seculi è seculi ma a fola piace pocu à a Chjesa è, u 12 nuvembre, preferisce celebrà a memoria di u Ghjesuitu René Goupil, sbarcatu à u Canadà in u 1635, appena dopu à Champlain, è tombu da l'Irrocchesi in u 1642.
Etimolugia: u nome Rinatu usa assai, mancu tantu pè i santi chì l'anu purtatu, ma pè u so valore misticu, cù u significatu di "natu à una vita nova per via di u battezimu". In Corsica, in u 1981 venia à u vintesimu rangu di i nomi maschili cù 9 omi nantu à 1000.
Casate: Rinaldi, Linardi.
Nomi: Nata, Rena, Renaat, Renat, Renata, Renate, Renatka, Renato, Renatu, Renatus, René, Renée, Renelle, Rentje, Rinata, Rinatu.
Santu Briziu. Santu Diegu.
Secondu Sulspiziu Severu, un storicu di u seculu quintu, autore di una vita di San Martinu, Briziu - ch'ellu hà cunnusciutu -, era un pocu di bonu. San Martinu l'avia racoltu chjucu, l'avia allevatu è n'avia fattu un prete. Quand'ellu fù prete si n'andò da u munasteru duv'ellu stava per campà da riccone, cù panni di lussu, belli cavalli piena a stalla è belle schjave piena a casa. Aspettava ch'ellu murissi "issu vechju scemu di Martinu" - cum'ellu dicia - per piglià u so postu. L'annu 397, Martinu more è Briziu diventa vescu di Turone (l'attuale cità di Tours, in l'Indre-et-Loire). Trenta anni dopu, suspettatu di avè messu incinta una sora, li tocca à scappà per ùn fassi tumbà. Si ne và in Roma, ci stà sette anni, è cunvince u papa ch'ellu era nucente. Rivenutu in a so dioccesi, ci vole à crede ch'ellu ebbe una cundotta assai edificante postu ch'ellu hè statu santificatu.
Hè mortu versu l'annu 447.
Etimolugia: da u celticu "brigh" (forza, putenza).
Nomi: Brès, Brice, Bricius, Brictius, Brix, Briz, Briziu, Bryce.
Paesi è cità: Orvieto.
Prutezzione: a pena in corpu.
Diegu hè un spagnolu natu accantu à Siviglia versu l'annu 1400, mortu in a cità andalusa d'Alcala u 12 nuvembre 1453.
Era un frate laicu franciscanu, giardinaru, purtinaiu, infirmieru o cucinaru, secondu i bisogni di u cunventu chì l'accuglia. In u 1450, andò in Roma per assiste à a canunizazione di San Bernardinu di Siena. Eranu ghjunti 4000 franciscani, accatastati in un cunventu, quand'ella schjattò una epidemia. Diegu facia da infirmieru. Anu rimarcatu chì e scatule è e buttigline di medicine ùn viutavanu mai. Diegu disse: "Diu hè più putente chè tutti i medichi è tutti i speziali di Roma aduniti".
U so più grande miraculu, Diegu u fece centu anni dopu mortu. In u 1562, un figliolu di Filippu Secondu di Spagna si era sciappatu u capu, caschendu da cavallu. U rè fece apre a tomba di Diegu. U santu omu era cum'è quandu l'avianu sepoltu. Paria ch'ellu durmissi. Anu asciuvatu a so faccia cù un mandile di seta ch'ellu anu messu nantu à u capu di u principe, chì guarì.
Ghjè, à a dumanda di Filippu Secondu chì u papa, in u 1588, messe à Diegu nantu à l'altari.
Etimolugia, casate è nomi: Cf Ghjacumu (3 maghju).
Santa Amanza. Santu Stefanu di Fiumorbu.
Amanza hè una Corsa marturiata à l'epica di Santa Divota è Santa Laurina. Altru ùn si sà.
U golfu di "Santa Manza", in fondu di a costa orientale di a Corsica, porta u nome di una cappella Sant'Amanza chì ghjera à un chilometru da u mare. In Petrusella, à 25 km d'Aiacciu, ci hè un paisolu chì si chjama "Santa Manza" per via dinù di una chjesa dedicata à a santa. In Corsica ci era altre chjese cù listessu titulu, in Santu Petru di Tenda, in Ocana, in Appricciani, è una tramezu à Montemaiò è Lunghignanu.
Etimolugia: forse da u lat. "amandus" ( à tene caru).
Nomi: Amance, Amand, Amandine, Amanza, Manda, Mandy, Manza.
Stefanu era un Corsu di i Prunelli di Fiumorbu. Frate di San Francescu, hè statu marturiatu in Terra Santa, in u 1391, cù trè cumpagni: Niculaiu di Slavonia, Deudatu di Rodez è Petru di Narbona. Una lettera mandata à i Catalani di Damascu, conta chì i quattru omi sò stati ottu anni in paese musulmanu nanzu di more pè a so fede. Certi frati, più struiti o più sperimentati chè elli, l'avianu fattu un scrittu chì vantava a religione catolica è attaccava quella di Magumettu. Elli, issu scrittu, sò andati à leghjelu davanti à u ghjudice di u lucale. Minacciati di esse tombi, anu ricusatu di rinnegà ciò ch'elli avianu lettu. Dissenu: "Ciò chè no avimu lettu hè ghjustu, santu è catolicu. Simu pronti à subì tutti i strazi è pronti à more".
Marturiati durante trè ghjorni, ùn cediinu. Anzi, si ridianu di quelli chì i facianu soffre. Allora, l'anu dati à a folla chì l'hà messi in pezzi, chì hà lampatu i so membri in una brustasgia è spernucciatu e so osse.
In u 1889, Roma hà accettatu u cultu di u Slavoniu Niculaiu è, in u 1898, l'hà stesu à l'Ordine franciscanu. Di l'altri ùn si ne parlò. Un decretu di canunizazione hà riparatu issa mancanza è assuciatu i quattru cumpagni.
Etimolugia: da u gr. "stephanos" (curona).
Casate: Stefani, Stefanacci, Stefanaggi, Stefanini, Stephani, Stephanopoli.
Nomi: Esteban, Esteffe, Estevan, Estève, Estienne, Etienne, Etiennette, Staffan, Staines, Steaphan, Steeje, Stefa, Stefaans, Stefan Stefana, Stefani, Stefano, Stefanu, Steffel, Steffert, Steffie, Stepan, Stepanida, Stepha, Stephan, Stephana, Stéphane, Stephania, Stéphanie, Stephanson, Stephanus, Stephen, Stevana, Steve, Steven, Stevena, Stevenje, Stevenson, Stevie, Stiobban.
Prutezzione: Stefanu hè u santu patrone di i funditori, cavapetre è scarpellini.
Santu Alibertu.
Alibertu, dettu u Grande, era un frate duminicanu alemanu natu in Lauinghen l'annu 1206. Hè mortu in Cologna u 15 nuvembre 1280.
Era un famosu predicadore chì hà giratu l'Europa: Paduva, Parigi, Cologna, ecc., for di trè anni, da u 1254 à u 1257, quand'ellu fù pruvinciale di u so Ordine, è dui anni da u 1260 à u 1262, quand'ellu fù vescu di Ratisbona. Insignava chì ùn ci era nisuna oppusizione trà u prugressu di e cunnuscenze umane è à fede cristiana. L'edizione di i scritti di issu gran maestru di a Sculastica cumporta 38 libri. U so megliu elevu hè statu San Tumasgiu d'Aquinu, u più grande teologu di u Medievu.
A' u sedecesimu seculu, u celebre Lefèvre d'Etaples, teologu è umanistu, pretendia chì i trè megliu genii di l'umanità eranu: Aristotele, Salomone è Alibertu u Grande.
E vechje cronache pisane parlanu di un Santu Alibertu di Corsica chì campava à u seculu XIII, ma d'ellu ùn si sà nunda è a Chjesa preferisce celebrà a memoria di Santu Alibertu, duttore universale.
Etimolugia: da u germ. "adel" (nobile) è "bert" (spampillante).
Casate: Alberti, Albertini, Albertucci, Albertelli, Albertoni, ALbertosi, Aliberti, Alibertini.- In Corsica, in u 1981, Albertini venia à u secondu rangu di e casate, dopu à Casanova. 32% eranu in u cantone di Niolu-Omessa, 15% in quellu di u Viscuvatu, 12% in Bastia è 9% in Corti.
Nomi: Adalbert, Adalberta, Adalberte, Adalbertu, Albert, Alberta, Alberte, Alberti, Albertine, Albertini, Alberto, Albertu, Aliberta, Alibertina, Alibertinu, Alibertu, Aubert, Aubertin, Bela, Bert, Elbert.
Paesi è cità: Calvese (cumuna di Suddacarò).
Prutezzione: Alibertu hè u santu patrone di i scientifichi, naturalisti è chimisti.
Santa Margherita di Scozia. Santa Gertrude.
Margherita, nata versu l'annu 1046, era una figliulina di u rè d'Inghilterra, rifugiata in a Scozia quandu, l'annu 1066, i Nurmani anu cunquistatu u paese.
A' l'età di 26 anni Margherita si marita cù u rè di Scozia, Malcomu Terzu, chì ne hà 45, è li face ottu figlioli. Malcomu, assai devuziunosu, associa a moglia à u guvernu di u paese. Margherita riesce à intruduce a liturgia rumana in a Chjesa scuzzese è face fà, in Edimburgu, un munasteru nantu à u mudellu di quellu di Cluny, in Francia.
Hè morta à u castellu di Edimburgu, u 16 nuvembre 1093, quattru ghjorni dopu à chì i Nurmani d'Inghilterra abbianu assassinatu u maritu chì guvernava u paese da 37 anni.
Etimolugia è nomi: Cf Margherita Bourgeoys (12 ghjennaghju).
Paesi è cità: Scozia.
Prutezzione: donne in partu.
Gertrude era una Alemana nata versu l'annu 1256, morta à 45 anni.
Un' si sà di qual'ella ne era nè da duv'ella surtia. Ciò chì si sà hè ch'ella avia cinque anni quand'ella fù accolta da e sore di l'abbazia di Helfta, in Sassonia, è ci hà passatu a so vita. Custì, e sore a si scialavanu: passavanu u so tempu à discute filosufia, literatura, à fà è stà à sente a musica. Gertrude fece cum'è l'altre sinu à l'età di 25 anni. Hà dettu: "Di a mio anima mi ne penserava quant'è di i mio vechji scarpi. Era una pagana mezu à pagane". Tandu hà pinsatu à a vita eterna, si hè vista persa è hà suffertu u martiriu durante un mese.
Una sera, à l'attrachjata, hè affaccatu, in camera, un giovanu assai bellu, assai distintu. Era un anghjulu chì li annunziava l'amore di Ghjesù. Da tandu, campò in visibiliu, cù gioie imense. Disse: "O Signore, u vostru più grande miraculu hè di avè ubligatu a Terra à purtà una peccatrice cum'è mè!".
Gertrude era pueta è hà lasciatu scritti di gran valore spirituale è litterariu. E so rime latine celebreghjanu, cù a fede cristiana, a natura, l'amore è a morte.
Etimolugia: da u germ. "ger" (lancia) è "trud" (fida).
Nomi: Drück, Drut, Gartrude, Geerdine, Geertruida, Geeske, Gerda, Gerdie, Gerdrugt, Gertraud, Gertraut, Gertrud, Gertruda, Gertrude, Gertrudis, Gertrut, Gesine, Getoussia, Giertru, Gletruda, Jertrud, Traudel, Truda, Trude, Trudie, Trudy, Tula, Tuta.
Santa Lisabetta d'Ungheria.
Lisabetta hè nata l'annu 1207. Era a figliola di u rè di l'Ungheria.
Quand'ella hà 14 anni, a maritanu cù Luigi Quartu, duca regnante di a Turingia. Si tenianu assai caru è pregavanu inseme tenendusi pè a manu. Anu avutu trè figlioli. Sei anni dopu à u matrimoniu, Luigi parte pè a Cruciata è more. Quandu a salma ghjunghje in Turinghen, Lisabetta dice: "Vi ringraziu, o Signore, di avemi cunsulatu dendumi e so osse. Noi ùn ci pudiamu staccà. Cun ellu, averebbi accettatu di girà u mondu dumandendu a limosina".
Mortu u maritu, per Lisabetta cumencianu e tribulazioni. Scacciata da a socera, parte cù i so trè figliulucci. U più chjucu sughjia sempre. U primu ghjornu si rifugieghjanu in un carciulellu. Dopu, vanu à truvà u vescu di Bambergu, chì ghjera u ziu è chì li dà l'allogiu.
Quandu u ziu parlava di rimaritalla, Lisabetta dicia: "Piuttostu mi tagliu u nasu". Hà creatu, in Marburgu un uspidale per curà i leparosi. Pigliò cum'è direttore un inquisitore chì a flagellava è a pattunava in publicu. Ella ringraziava à Diu. Dicia: "Un' vogliu fà paura à Diu, fendumi vede intrugnata. Sò ch'ellu preferisce di vedemi alegra, postu chì u tengu caru è mi tene caru".
Hè morta u 17 nuvembre 1231. Avia 24 anni.
Etimolugia è nomi: Cf Lisabetta di u Portugallu (4 lugliu).
Paesi è cità: Turingia, Marburgu, Isny.
Santu Odone. Santu Fredianu.
Odone hè natu l'annu 879 in Turone (l'attuale cità di Tours, in l'Indre-et-Loire). Si hè fattu frate à un'epica chì u cleru era in manu à u diavule. Dopu à a nascita di Odone, ci fù, in un seculu, 32 papa. Subitu eletti, eranu in periculu. Tenianu un annu, dui, trè, è po, un bellu ghjornu, una disgrazia i mandava in l'altru mondu.
Odone era figliolu di un signoru di a Turena. Da chjucu, u babbu l'avia cunsacratu à San Martinu. A' l'età di 20 anni, era unu di i 150 canonichi prebendati chì curavanu a tomba di u santu.
A' 30, si face frate. L'annu dopu si trova in Clubiaccu - oghje Cluny - a celebre abbazia benedittina chì venia di esse crata da u duca d'Acquitania è rifurmata da San Bernone.
Dicesette anni dopu, Odone succede à Bernone è dà, à l'abbazia, una urganizazione tale chì, per dui seculi, averà una grande auturità, micca solu in l'affari di a Chjesa, ma dinù in a pulitica di i Stati eurupei.
Odone era un urganizatore di prima trinca, fermu, severu è, attempu, un omu alegru. Durante a recreaziò, passava u so tempu à cuntà stucciuli è à fà ride i frati. E' po, tutta a so vita, hà scrittu puesie è musica.
A' l'età di 63 anni, si truvava in Roma pè a quarta volta, quand'ellu si rese contu chì avia più pocu à campà. Si spicciò di parte è, ghjuntu nantu à a tomba di San Martinu, si morse. Era u 18 nuvembre di l'annu 942.
Fredianu era un frate irlandese di u seculu sestu, forse figliolu di rè, venutu in Roma, una prima volta in pelegrinaggiu, una seconda per studià. Tandu, ùn turnò più in u so paese. Si stabilì accantu à Lucca, aldifora di l'accintu rumanu è, cù i so discepuli fece una chjesa dedicata à San Vincensiu, una chjesa chì, oghje, porta u so nome. L'annu 560 fù fattu vescu di Lucca. Dece anni dopu, a regione fù invasa da i Lombardi. Ellu, ùn ebbe altra premura chè di cunverteli.
Un annu chì u fiume chjamatu Serchio sburdava è minacciava a cità, Fredianu li fece cambià di lettu cù un semplice colpu di vanga. Quessa hè a legenda, ma a verità deve esse chì, grazia à i studii fatti in Roma, fece fà travagli facili per una deviazione chì dete l'acqua, è dunque a prusperità, à a campagna di Lucca.
Fredianu hè mortu in Lucca u 18 marzu di l'annu 588. A festa hè celebrata u 18 nuvermbre, anniversariu di a traslazione di e so reliquie à u seculu VIII.
Santu Punzianu. Santu Patroculu.
Punzianu, natu in Roma, hè statu u dicesettesimu papa dopu à Petru. Elettu u 21 lugliu di l'annu 233, hà sustenutu à Demetriu, u vescu d'Alessandria chì avia scumunicatu u teologu Origeniu, è ebbe à luttà contru à l'antipapa Politu. L'annu 235, hè statu cundannatu à travaglià in e minere di Sardegna. Hè mortu da e fatiche trè anni dopu, in l'isula di Tavolara. E so osse sò state purtate in Roma.
Patroculu, natu versu l'annu 500 in a capitale di i Biturigi (l'attuale cità di Bourges, dipartimentu di u Cher), avia un impiegu in Lutezia (l'attuale Parigi), à a Corte di Childericu Primu, quandu a mamma, diventata veduva, u fece vene à u paese nativu.
- U mio figliolu - li disse -, ai 40 anni è ghjè tempu chè tù ti marite. T'aghju trovu, cum'è sposa, a più bella zitella di u reghjone.
- O Mà! - rispose Patroculu - lasciemu issa zitella à d'altri è permettimi di realizà a mio vucazione.
Hè andatu à truvà u vescu chì l'hà accettatu cum'è chiericu è po l'hà fattu diacunu, ma u sughjornu accantu à u so vescu ùn li cunvenia. Un' pudia pate di calassi à tavula duie volte u ghjornu per fà cullaziò cù a cumunità. Ellu si cuntentava di un pezzu di pane asciuttu è u so piacè era di stà ore è ore incantatu à pregà.
Si n'andò in Acque Nere (l'attuale Neris, dipartimentu di l'Allier), fece una casa, un oratoriu è una scola.
Cum'ellu avia a riputazione di guarì stroppii è malati, è chì, di più in più, ghjunghjia ghjente, lasciò tuttu ciò ch'ellu avia à e vergine cunsacrate, è si rifugiò in a furesta di Cella, purtendusi una vanga è una piola à dui tagli. Dece anni dopu, partì più in dà, in a furesta Culumbaria (l'attuale Colombier), è ci stete 18 anni, sinu à a morte, à l'età di 76 anni. Issi 18 anni sò stati i più belli di a so vita. Un' stanciava di pregà, ancu quand'ellu vangava u so ortu o ch'ellu facia a pruvista di legne cù a piola à dui tagli.
Santu Edimondu.
Edimondu hè natu in l'841. A' l'età di 14 anni, era statu fattu rè di un paisucciu di l'Inghilterra orientale. Issu paese era aspessu invasu da i Danesi chì, l'annu 870, u facenu prigiuneru. Avia 29 anni.
I Danesi li pruponenu un trattatu di pace ch'ellu trova inghjustu pè u so paese, pè a so religione, è u ricusa. Allora, u 20 nuvembre 870, u leanu à un arburu, u matraverseghjanu cù e frezze è li taglianu u capu ch'elli lampanu in un sepalaghju. U capu hè statu ritrovu da i so paisani. Un lupu u curava per ch'ellu ùn sia manghjatu da i corbi.
Santu Edimondu hè cunnusciutu cum'è amicu di a ghjustizia è di i poveri.
Etimolugia: da u germ. "ed" (patrimoniu) è "mund" (prutettore).
Nomi: Admeo, Eamon, Edemonda, Edimonda, Edimondu, Edma, Edmé, Edmea, Edmée, Edmond, Edmonda, Edmonde, Edmondo, Edmund, Edmundo, Otmund.
Prisentatione di Maria Vergine. Santu Demetriu.
A Prisentazione di Maria Vergine à u Tempiu hè l'ufferta chì Maria, sempre zitella, fece di a so persona à u Signore, cù a decisione di passà a so vita - sinu à u matrimoniu - à pregà in u Tempiu di Ghjerusalemme.
A festa di a Prisentazione era celebrata da u seculu XII in a Chjesa greca. L'annu 1372, u papa Gregoriu XI l'hà intrudutta in a Chjesa latina è, in u 1585, Sistu Quintu l'hà stesa à tutta a Cristianità.
A ghjunta di Maria Vergine à u tempiu hè stata riprisentata da parechji pittori, soprattuttu taliani: Giotto, Taddeo Gaddi, Ghirlandaio, Carpaccio, Cima de'Conegliano, u Tiziano, Benvenutu de'Giovanni, Pinturicchio è Signorelli.
Demetriu hè un santu russiu natu in Ucrania, à Chieve, fattu frate à l'età di 17 anni è mortu vescu di Rostove u 24 nuvembre 1709. Hè l'autore di un libru intitulatu "Fior di i Santi", impurtante pè a litteratura russia quant'è pè a religione.
Quand'ellu fù stampatu u primu di i quattru vulumi, l'imperatore Petru Magnu li mandò, in ricumpensa, duie pelliccie di volpe. U patriarca di Mosca ùn pobbe fà di menu chè di dalli a so benedizione, ma u scrittu di Demetriu, chì parlava di l'Immaculata Cuncezzione è altre teurie rumane, li cunvenia pocu.
Petru Magnu averebbi vulsutu ch'ellu parti à evangelizà a Siberia ma Demetriu dumandò a grazia di ùn andà in issi paesi deserti è freddosi duv'ellu ùn ci era biblioteche. U poveru frate ùn era fattu per girandulà. U so piacè era u studiu è a cuntemplazione. Vedendulu cusì disgraziatu, l'imperatore rinunciò à i so prugetti è u fece vescu di Rostov, una dioccesi duve i preti, stupidi è briaconi, ùn rispettavanu u secretu di a cunfessione è avianu moglie è figlioli chì ùn sapianu ciò ch'ella era a cumunione.
Demetriu era chjuculettu, magrentinu, mezu zimbu, capellibiondu cù una barba pinzuta. Troppu bravu, ùn era capace di amministrà una dioccesi. Cuntinuvò à scrive è, in u 1705, era publicatu u quartu vulume di "Fior di i Santi". Quattru anni dopu, l'anu trovu mortu in dinochje nantu à u so lettu.
Etimolugia: da u gr. "Déméter" (nome di una divinità).
Nomi: Demetre, Demetrio, Demetriu, Demetrius, Dimitri, Dmitri.
Santa Cicilia.
Cicilia serebbi una signora di u seculu terzu chì hà rigalatu una casa è un terrenu à i primi Cristiani di Roma.
A casa hè diventata a chjesa di Santa Cicilia in Trastevere è u terrenu u cimiteriu San Calistu duve Cicilia hè sepolta accantu à a critta di i papa.
A' u seculu sestu, i pelegrini dumandavanu qual'ella era issa Cicilia chì avia u grande onore di avè a so tomba vicinu à quella di i principi di a Chjesa... ma nimu a sapia.
Allora anu scrittu una legenda. A santa donna, chì forse era maritata è affigliulata, chì ghjè forse morta in u so lettu, hè diventata vergine è martira.
Anu dettu ch'ella era una giovana nobile, maritata per forza, morta martira trè ghjorni dopu à u matrimoniu per avè vulsutu cunservà a so virginità. Ma, in trè ghjorni, avia quantunque avutu u tempu di cunverte à u Cristianisimu u maritu, u cugnatu, u boia è quattrucentu pagani.
Etimolugia: dau lat. "caecus" (cecu).
Nomi: Cäcilia, Cecil, Cécile, Cécilia, Cécilie, Cecilio, Cecilius, Cecily, Ceese, Cele, Célia, Célie, Cicilia, Ciciliu, Sheila, Sile, Sileas, Sisile, Sisley, Sissie, Tsilia, Zilge.
Paesi è cità: Pianellu, Scata.
Prutezzione: a legenda dice chì Cicilia - citu - "cantava in u so core". E' cusì ne anu fattu a santa patrona di i musicanti è di quelli chì facenu strumenti di musica. Scultori è pittori l'anu riprisentata tantu è più, generalmente ghjuchendu di l'organu è cantendu... o cù una palmula in manu.
Santu Clemente, Santa Felicità. Santu Culumbanu.
Clemente hè u quartu papa di a Chjesa cristiana, dopu à Petru, Linu è Cletu. Avia d'altronde cunnusciutu benissimu à Petru. Hà guvernatu a Chjesa da l'annu 90 à l'annu 100. Serebbi mortu martiru, ma prove ùn ci ne hè.
A' Clemente l'anu attribuitu una massa di scritti, ma ùn ci hè chè a lettera à i Grechi di Corintu chì ghjè soia. Issa lettera, colma di pietà è di buntà, hè stata scritta per appacià i credenti cù i so preti. Hè a prima volta chì si vede a Chjesa di Roma intervene in l'affari di l'altre Chjese.
Etimolugia: da u lat. "clemens" (dolce, clemente).
Casate: Clementi.
Nomi: Clem, Clémence, Clemens, Clément, Clemente, Clementia, Clémentin, Clementina, Clémentine, Clementius, Clemenzia, Clemmie, Clemmy, Clim, Klemens, Klementine, Klimka.- u Nome feminile Clementina hè statu pupularizatu in i Stati Uniti d'America à l'epica di a cunquista di l'Uveste, cù a canzona "Oh; my derling Clementine".
Paesi è cità: Siviglia, Velletri, Crimea. In Corsica: Petracurbara, Lanu.
Prutezzione: i zitelli malati.
Vucabulariu: A clementina, u fruttu, porta u nome di un frate, Patre Clemente, chì stava in Algeria, à Misserghin, un paese à 13 km da Oran.
A legenda di Santa Felicità ripete quella di i Maccabei. Dicenu ch'ella era una veduva chì campava à l'epica di l'imperatore Antuninu (138-161), marturiata cù i so sette figlioli dopu à a morte di l'imperatore, per avè ricusatu di rinnegà a fede cristiana. U primu di i figlioli hè mortu frustatu cù un staffile piumbatu, u secondu è u terzu, bastunati, u quartu, lampatu in un ghjargalone, l'altri trè, scapati. Dopu anu tombu a mamma.
Etimolugia è nomi: Cf Filice (12 ferraghju).
Paesi è cità: e Ville di Petrabugnu.
Culumbanu era un frate irlandese natu versu l'annu 540. Passatu in Gallia à l'età di 40 anni, hà fattu u famosu munasteru di Lussoviu (l'attuale Luxeuil, dipartimentu di a Haute-Saône), è po in Italia, à Bobbio, duv'ellu hà fattu u so ultimu munasteru è duv'ellu hè mortu u 23 nuvembre di l'annu 615.
Culumbanu era l'amicu di e bestie salvatiche. I scoiattuli si arripiccavanu à a so vistura. I lupi si avvicinavanu per gode di e so carezze. L'orse li purtavanu i so ursachjotti perch'ellu i benedisca. Ma, era terribile cù i so frati. Un' li lasciava dorme per ubligalli à pregà è, quandu una parulla di i Salmi era mal prununciata, i pigliava à staffilate.
Etimolugia: da u lat. "columba" (culomcu).
Casate: Colombani, Colombini, Colombo.
Nomi: Coline, Collie, Colly, Colomba, Colomban, Colombana, Colombano, Colombat, Colombe, Colombi, Colombine, Coulombe, Columba, Culomba, Culumbana, Culumbanu.
Paesi è cità: Bobbio, Irlanda, Luxeuil. Centu per una chì, dopu à a morte di San Culumbanu, è forse nanzu, certi di i so discepuli sò venuti in Corsica è si sò stabiliti:
. nantu à u territoriu di Ruglianu, duv'ellu hè
statu fattu dopu u castellu di i Mari;
. nantu à quellu di e Ville di Petrabugnu;
. in a muntagna di l'Ostriconi, sopra à Lama;
. è à a bocca chì permette di passà da u fiuminale
di Golu in Balagna.
Litteratura: Mérimée: "Colomba" (1840).
Santa Fiora
Fiora era una giuvanotta cristiana nata in a cità spagnola di Cordoba.
A' l'epica - simu à u seculu IX -, in u califfatu di Cordoba, quellu chì ricevia è allugiava Cristiani risiscava a morte. Ciò chì face chì, a giovana Fiora, nimu a vulia. Rigettata da tutti, ùn sapia più duve andà quand'ella intese una voce chì dicia, cum'è in u Vangellu di San Ghjuvanni: "In casa di Patre ci hè parechje stanze, veni, è serai bè ricevuta". Allora Fiora decide di andà ind'è u ghjudice. Par istrada, scontra una zitella, chì si chjamava Maria, chì avia avutu u fratellu marturiatu, è chì, cum'è ella, era à l'abbandonu. Sò andate inseme à u tribunale, decise à ùn rinnegà a fede cristiana. U ghjudice l'hà cundannate à morte. Sò state scapate u 24 nuvembre di l'annu 851.
Etimolugia è nomi: Cf Fiurenzu (u 4 lugliu).
Santa Catalina d'Alessandria.
Catalina hè una di e più celebre frà e martire di i primi seculi di u Cristianisimu. A legenda dice ch'ella era a figliola di u rè di Alessandria, a più bella è a più sapiente di e zitelle di l'Imperu. A' 17 anni, annunzia ch'ella si vole marità è ch'ella vole un maritu bellu cum'è ella, sapiente quant'è ella. A seconda cundizione fece chì nimu si prinsentò.
Un rimitu chì, aspessu, avia revelazioni, li disse: "Hè a Vergine Maria chì ti buscherà u sposu di i to sogni". A notte dopu, Maria apparisce à Catalina, tenendu à Ghjesù pè a manu. Li dumanda:
- U voli?
- Iè chì u vogliu.
- E' tù? dice Maria à Ghjesù.
- Innò. Hè troppu goffa, risponde Ghjesù.
Pianghjendu, Catalina si ne và à truvà u rimitu è li conta u fattu.
- Un' mi vole! Dice chì sò goffa!
- Un' hè micca a to persona chì li dispiace, hè a to anima imbuffata di orgogliu. Lascia fà à mè.
U rimitu li amparò a duttrina, a battizò è a rese umile. Cusì Ghjesù a truvò bella è li messe l'anellu. Fù u famosu matrimoniu misticu di Santa Catalina.
Da tandu, Catalina ùn pensò più chè à raghjunghje u so sposu.
Un ghjornu, l'imperatore Massenziu ghjunghje in Alessandria. Catalina li rimpruvereghja di persecutà i Cristiani è li face a prova chì a so religione era falza. Un' sapendu risponde, l'imperatore adunisce cinquanta filosufi, i più capaci di a pruvincia. Catalina l'ammutulisce è i cunverte. E' cunverte dinù a moglia di Massenziu, l'aiutante di campu è 200 ufficiali. L'imperatore i fece brusgià vivi.
Ghjunta l'ora di a morte di Catalina, unu di i filosufi brusgiati fala da u celu è li cinghje a fronte di una curona in oru.
Allora, una mascina orribile si avanza nantu à quattru rotule cù spinzoni è seghe chì giranu in sensu cuntrariu. Di Catalina ne face una pappina racolta da l'anghjuli è purtata nantu à u Sinai.
Etimolugia è nomi: Cf Santa catalina di Siena (29 aprile).
Paesi è cità: Jaen, Magdeburgu, Oppeinheim. In Corsica: Albitreccia.
Prutezzione: filosufi, vechje figlie, sculari, arrutini, mulinari, filatrici...- Catalina d'Alessandria hè a santa patrona di l'avucati bastiacci.
A Beata Delfina. Santu Leunardu di Portu Mauriziu.
Delfina era una Provenzale nata versu l'annu 1283 in a muntagna di u Luberone.
A' 13 anni si marita cù Elzearu chì ne hà 15. Facenu una vita di penitenza è di prighere, senza neglicentà certi duveri mundani è cunservendu a so virginità senza chì nimu si ne dubiteghji.
Quand'ellu hà 23 anni, Elzearu hà una lascita impurtante: u cuntatu di Sabranu, in Provenza, è quellu di Arialdu, in Italia, è diventa u vassale di Rubertu, rè di Napuli. Rubertu hà tanta cunfianza in ellu chì li dà a tutella di u figliolu è, in u 1323, u manda in Francia per circalli una moglia. In Parigi, Elzearu si more. Serà canunizatu in u 1369 da u papa Urbanu Quintu chì ghjera u ziu è u cumpare.
A' a morte di u maritu, Delfina avia una quarantina d'anni. Campa torna una vintina d'anni à a Corte di Napuli duve a regina, una donna assai divota, ùn si ne vulia sfà. Quandu a regina more, si ne volta in Provenza, à u paese nativu. Hè morta à l'età di 78 anni, u 26 nuvembre 1360.
E so osse, è quelle di u maritu, si trovanu in a cattedrale d'Apt, in u Vaucluse.
Etimolugia, casate è nomi: Cf Delfinu (u 14 dicembre).
Lurenzu, di Portu Mauriziu, natu in u 1676, mortu in u 1751, era figliolu di un patrone di barca chì navigava longu à e coste di a Liguria è di a Toscana. A' 21 annu, si hè fattu frate. A' 30 anni hà principiatu à predicà. Hà predicatu durante più di 40 anni, fendu missioni quindi è culandi. Santu Alfonsu Maria, di i Liguori, hà dettu chì missiunariu famosu cum'è ellu ùn ci ne era mai statu. I Corsi anu cunnusciutu e so qualità strasurdinarie in u 1744, da u 12 maghju à u 18 nuvembre.
Duv'ellu andava, urganizava Via Crucis in 14 stazioni per ramintà a strada fatta da Ghjesù striscinendu a so croce da Ghjerusalemme à u Calvariu. A Via Crucis di San Leunardu, stampata è ristampata, principia cusì:
L'orme sanguigne
Del mio Signore,
Tutto dolore,
Seguiterò.
E il core intanto
per li occhi in pianto
Sopra il Calvario
Distillerò.
E' u populu rispundia à ogni stroffa:
Vi prego o Gesù buono,
Per la vostra passion
Darci perdono.
U 23 nuvembre 1751, era un marti. Rientrendu in Roma, San Leunardu fù persuasu ch'ellu avia più pocu à campà. Quand'ellu passò a Porta del Popolo, disse à u cumpagnu Frà Diego: "Canta u Te Deum, eiu feraghju e risposte". U venneri era mortu.
Etimolugia, casate è nomi: Cf u 6 nuvembre.
Santu Severinu.
Severinu era un rimitu chì campava nantu à e sponde di a Senna, vicinu à duv'ellu hè oghje Parigi. Serebbi mortu versu l'annu 540.
Nantu à a so tomba, averebbinu fattu un oratoriu, rottu da i Nurmani. Oghje ci hè a chjesa di San Severinu, una di e più anziane è di e più belle chjese gottiche di Parigi.
Etimolugia: da u lat. "severus" (severu).
Casate: Severi, Severuni, Severoni.
Nomi: Frein, Freng, Frin, Frings, Saverina, Saverinu, Seva, Seve, Sévéra, Sévère, Severiana, Severiane, Severianka, Severiano, Severianu, Sévérien, Sévérienne, Séverin, Séverine, Severinje, Severinu, Severinus, Sevir, Sören, Sövrin, Vira.
Nanzu, in Roma, celebravanu a memoria di Guglielmu di Spiluncatu. Frate Minore, Pruvinciale di l'Ordine, avia fattu u cunventu di Vicu. U 15 marzu 1481 diventava vescu di Sagone. In u 1493, si ne andava in Roma cum'è vicicuratu di Santa Maria Maggiore. Muria l'annu stessu è ghjera sepoltu in a chjesa San Ghjilormu. Era un gran predicadore chì avia cunvertitu una massa di peccadori è fattu stancià parechje nimicizie. Avia u donu di prufetizà è di fà miraculi. U papa Sistu Quartu li averebbi accurdatu l'indulgenzia pienaria per una chjesa Santa Maria di Loretu, in Casinca.
Santu Ghjacumu di a Marchia. Santu Sostene.
Ghjacumu di a Marchia era un Talianu natu versu l'annu 1394, in Montebrandone, vicinu à Ascoli Piceno, in a Marchia d'Ancona. A' 22 anni si era fattu frate in Assisi. Hè statu unu di i più famosi predicadori franciscani. Era u discepulu di San Bernardinu di Siena (Cf u 20 maghju) è hà avutu cum'è elevu à San Ghjuvanni di Capistranu (Cf u 23 uttobre). Hà predicatu una quarantina d'anni in tutta l'Europa sinu à i paesi Scandinavi. Hè mortu in Napuli u 28 nuvembre 1476.
Etimolugia, casate è nomi: Cf u 3 maghju.
Paesi è cità: Chemnitz.
Sostene era accantu à San Paulu quand'ellu scrisse a so prima epistula à i Corinti, epistula chì principia cusì: "Paulu, chjamatu à esse apostulu di Ghjesù Cristu da a vuluntà di Diu, è u so fratellu Sostene, à tutti quelli chì invocanu u nome di Ghjesù, grazia è pace à voi".
L'Atti di l'Apostuli contanu chì Paulu, partutu da Attene, ghjunse in Corintu, è stete ind'è Aquila è a so moglia Priscilia, fabricanti di tendoni cum'è ellu. In settimana travagliava cun elli, u sabbatu predicava à a sinagoga. Quandu, i discorsi operavanu cunversioni, quandu, pruvucavanu baruffe. Un ghjornu, i Ghjudei u inguantonu è u striscinonu davanti à u tribunale di u proconsule Gallione, dicendu chì i so discorsi eranu cuntrarii à a legge. Gallione disse: "S'ellu si trattava di inghjustizie o malfatte, vi sterebbi à sente, ma ùn si tratta chè di parulle, è ùn mi mischju di quessi l'affari". Dilusi, si ne piglionu à Sostene, capu di a sinagoga, è li detenu una battitoghja davanti à u tribunale.
Centu per una chì u Sostene di l'Epistula à i Corinti è quellu di l'Atti di l'Apostuli hè u listessu omu. Ma si discute sempre sì, à l'epica, Sostene era digià cristianu o s'ellu si hè cunvertitu dopu à quella frusta.
Etimolugia: da u gr. "sôs" (alzassi) è "slaw" (gloria).
Nomi: Sostène, Sostenea, Sosteneo, Sosthène, Sosthènes.
Santu Saturninu.
Saturninu serebbi un Grecu mandatu in Spagna è in Gallia da u papa Fabianu (240-253). Hà evangelizatu u Linguadocca è ghjè diventatu vescu di Tolosa, in l'attuale dipartimentu di a Haute-Garonne, duv'ellu hè mortu versu l'annu 250.
A legenda conta chì, duv'ellu ghjunghjia, u demoniu ùn avia più chè disfatte. A' u Capitoliu di Tolosa, i dii pagani si eranu ammutuliti. Allora, i so preti si sò aduniti per circà a ragione di issu fattu novu. A cunclusione fù chì a ghjunta di Saturninu ne era a causa.
Ghjustapuntu, Saturninu passava davanti à u Capitoliu. A folla u t'inguanta per ubligallu à participà à i sacrifizii. Saturninu ricusa è, in issu mentre, l'iduli cascani in terra à pezzi. Tandu, l'appendenu à a coda di un toru chì ghjera custì per esse sacrificatu. Danu a voce à u toru chì parte è di Saturninu ne face u striscinu.
Quessa hè a legenda, ma u fattu si stà chì, da almenu l'annu 1000, Saturninu hè un santu assai pupulare in u meziornu di a Francia duve più di vinti dipartimenti anu paesi chì portanu u so nome.
Etimolugia: da "Saturnu", u diu paganu di e seminere, di a divizia, di a ghjustizia è di a libertà.
Paesi è cità: Tolosa, Pamplona, Navarra.
Santu Andria l'Apostulu.
Andria è Petru, u fratellu, eranu dui Palestinesi nati in Betzaide, piscadori cum'è u babbu. Eranu discepuli di San Ghjuvan Battista, quand'ellu passò Ghjesù. E' Ghjesù disse: "Venite cù mè, oramai pescherete l'omi". Cusì conta u Vangellu secondu San Ghjuvanni.
Andria hè citatu trè volte in i Vangelli:
. quand'ellu dete cinque pani è dui pesci à Ghjesù
chì nutrì 5000 persone;
. quand'ellu prisentò i pelegrini grechi à Ghjesù;
. è quand'ellu vulia sapè da Ghjesù a data di a destruzzione
di u Tempiu di Ghjerusalemme.
Un' si sà duv'ellu hè andatu dopu à e Penticosti. Certi pensanu ch'ellu hè mortu in Grecia, liatu nantu à una croce in forma di icchisi: a croce di Santu Andria.
Etimolugia: da u gr. "andros" (omu virile, curaggiosu).
Casate: Andrei, Andreoli, Andreotti, Andreini, Andreani, Andreucci.
Nomi: Anders, Andor, André, Andrea, Andreani, Andreanu, Andreas, Andrée, Andreu, Andrew, Andria, Andrieu, Drew, Dries.- In Corsica, in u 1981, Andria venia à u tredecesimu rangu di i nomi maschili. Era quellu di 15 omi nantu à 1000.
Paesi è cità: Amalfi, Pienza, Sarzana, Russia, Scozia. In Corsica: Biguglia, a Campana, a Crucichja, Lecci, Loretu di Casinca, Olcani, Oletta, Omessa, u Poghju di Nazza, Sant'Andria di Boziu, Sant'Andria di u Cotone, Sant'Andria d'Urcinu, Sant'Andria di Tallà, Surbuddà, Ersa.
Prutezzione: Andria hè u santu patrone di i piscadori è di i marcanti di pesci. U preganu e donne in brama di figlioli..
Detti è pruverbii: Fin'à Sant'Andria, sumena in boscu è in via; da Sant'Andria in dà, guarda induve lampà.