L'associu Mare Vivu unuratu à a Monaco Ocean Week
2021-04-22 11:55:29

Mare Vivu, stabilitu in Capicorsu, hè statu fundatu in u 2016 da dui studianti corsi pè sensibilizà à a prutezzione di l'ambiente marinu. Hè statu unuratu pè a seconda volta da a Fundazione Principe Albertu II di Monaco, Surfrider Europe Foundation è altri organismi. Un secondu premiu grazia à u so prugettu "CorSeaCare 2.0 " è a creazione d'una mascina pè trasceglie è riciculà una parte di u mullizzu plasticu racoltu durante a missione. Mascina chì hè presentata durante evenimenti di sensibilizazione vicinu à u publicu. In u quadru di CorSeaCare 2.0, l'associu Mare Vivu gira u litturale isulanu pè raccoglie dati scientifichi. Trasmessi à laburatorii specializati, l'ogettivu hè di definì l'origine di u mullizzu. Decisu à mustrà l'impegnu di a giuventù corsa contr'à a pulluzione plastica in Mediterraniu, i rispunsevuli ùn pudianu sperà megliu cum'è sustegnu à prò di stu prugettu di trascelta lucale. À tempu, organizeghjanu evenimenti è cunferenze pedagogichi pè sensibilizà a pupulazione à a pulluzione marina. 

Mare Vivu pulisce dinù e marine ma raccoglie soprattuttu dati pè agì nant'à a pruduzzione di u mullizzu. L'associu vole cuntribuì à "una più bona gestione di u mullizzu à terra". L'ultima parte di u prugettu "CorSeaCare 2.0 ", hè quellu di l'azzione cuncreta è rapida. I rispunsevuli facenu sapè chì anu da precisà u percentuale di riciculabilità di ogni mudellu di plasticu è serveci di i risultati pè prupone un prugettu ambientale limitendu u plasticu ind'è e cullettività. A so pruposta spiecherà tutti l'elementi di a pulluzione plastica, è hà da ricusà e suluzione chì ùn li parenu micca bone. Digià in leia diretta cù a cumunità di cumune di Calvi-Balagna, l'associu spera di pudè cullaburà prestu cù altre istanze pulitiche nant'à a prublematica ricurrente di u mullizzu. 

Mare Vivu hè statu chjamatu pè entre in u prugettu Capi Med, una reta di capitalizazione chì addunisce i prugetti principali à impattu di l'isule Mediterranie. L’ogettivu hè di custituì un gruppu di riflessione capace à custruì inseme ogettivi è misure cuncertate pè una prevenzione à longu andà di i plastichi in mare.