U museu archeologicu di Mariana apertu
2021-06-23 10:54:03

U museu archeologicu di Mariana, Principe Rainier III, hè apertu dapoi u 22 di ghjugnu nant’à cumuna di Lucciana. Un casamentu mudernu chì accoglie in particulare 500 ogetti di u medievu è di l'Antichità (stuvigliame, anfore, ghjuvelli…). Hè apertu sin'à u 26 di settembre ogni ghjornu da 10 ore di mane à 7 ore di sera, fora di u luni. Hè statu finanzatu da a CDC, u ministeru di a Cultura, a cumuna di Lucciana è u principatu di Monaco. Esiste dinù una sala di spusizione tempuranea cù opere di l'elevi di u cullegiu di Lucciana (ripruduzzione di u museu in Lego è nant'à u ghjocu video Minecraft). Screni interattivi permettenu di capisce megliu a storia di l'ogetti. U museu allughjerà cunferenze, scontri è altre attività culturale.

À parte da u 1u seculu nanz'à Cristu, Mariana hà principiatu à sviluppassi cù in particulare a stallazione di i veterani di Marius Caius. A u Vu seculu, hè stata u locu d'impiantazione cristiana a più primurosa cù l'edificazione d'una basilica è di u so battisteru. In tempu di a duminazione pisana, sò state custruite a Catedrale cù e so stallazione episcupale.