« Aiò » : cinque ghjurnate tematiche in immersione pè favurizà l'usu di a lingua corsa
2021-06-24 14:37:12

Cinque ghjurnate immersive nant'à diversi temi (cultura, sportu, religione, credenze, patrimoniu, ambiente…) sò previste di lugliu 2021 in Prunelli di Fium’Orbu u 2 (Piazza di a Nazione), u 9 in Carghjese (piazza à a chjesa greca), u 16 à u teatru di Sartè, u 23 in Bunifaziu (loghja di l’arsanale) è u 30 in Aiacciu. Sò urganizate in u quadru di « E case di a lingua » iniziate da a CDC è induve participeghja u centru di furmazione Afflokat cù a creazione d’« Aiò ».

Dapoi u 2019 è a so adesione à e « Case di a lingua », iniziate da a Cullettività di Corsica, u centru di furmazione Afflokat s'impegna à prò di a lingua corsa. Cusì, hè natu « Aiò », un cuncettu induve u corsu hè adupratu cum'è lingua ogettu è lingua arnese. Cultura, patrimoniu, cantu è musiche tradiziunale, chitarra, scacchi, cucina, orticultura... Tanti temi aghjustati à l'insignamentu di u corsu è à prò di a prumuzione è di u sviluppu di a lingua.  L'amparera in immersione hè un puntellu di a struttura è hà assai successu dapoi parechji anni è in altre regione...  « Ghjè a nostra priurità annunzia Gilbert Reboli, cuurdinatore incaricatu di a lingua corsa, avemu travagliatu nant'à trè siti, Aiacciu, Valincu è Fiumorbu ma a crisa sanitaria hà ubligatu à chjude l'attelli. Eppuru, a struttura hà decisu di fà attelli numerichi di rigalu pè i so aderenti. « L’ogettivu hè di cuntinuà l'opera principiata in u 2019, è hè dinù una manera di ritruvà u publicu aldilà di l'aderenti spiega Benjamin Pereney. » À u prugramma, attelli participativi, cunferenze, reunione, dibattiti, canti è musiche corse cù giovani d'ogni regione cù un'idea nuvatrice : ogni cunferenza in lingua corsa serà tradutta à tempu in francese pè favurizà a capiscitura di quelli ch'ùn capiscenu u corsu. Frà i tempi scelti pè sta prima edizione, l’arte musicale (u 2), l’ambiente (u 9), credenze è rituali (u 16), sportu è sucetà (u 23) è Aiacciu tempi fà (u 30). Ingiru à dibattiti animati da Thomas Brunelli, persunalità di a lingua è a cultura corsa participeranu : Philippa Santoni, Ghjiseppu Turchini, Bernard Filippi, Marc’Andria Castellani, Pierre-Joseph Ferrali (u 2 in Prunelli di Fium’Orbu), Jean-Louis Pieraggi, Muriel Poli, Jean-Michel Culioli (u 9 in Carghjese), Antone Peretti, Joseph Spano, Vannina Lari, Joseph Cesari (u 16 in Sartè), Félix Bonardi, Jean Angelini è Didier Rey (u 23 in Bunifaziu), Roger Miniconi, Jean-Pascal Graziani è Petru d’Orazio (u 30 in Aiacciu)…

A Cullittività di Corsica, in lu quadru di u « Pianu Lingua 2020 », hà idintificatu a prumuzioni è a sparghjera di a lingua corsa in a sucità cumu punteddi maiori di a so pulitica linguistica.

Mittindu in baddu u prughjettu «  case di a lingua » a cullittività di Corsica prova à incuraghjì è sviluppà i manifistazioni immirsivi.

Hè par quissa chì avemu fattu crescia i casi di a lingua « Aiò ». 

Prupunemu in Aiacciu è in i so circonda, in u Valincu, u Fium’Orbu è in linea in a noscia Casa Numerica sfarenti atteddi pà ugni pubblicu :

  • I maiori (da 18 anni à cuddà)
  • I ghjuvanotti (da 12 à 18 anni)
  • I ziteddi (da 3 à 12 anni)

Aflokkat issendu un urganismu di furmazioni, tutti l’attività pruposti ani à tempu un ughjittivu pidagogicu in lingua, ma dinò in a disciplina pruposta da l’atteddu.

Frà altri atteddi prupunemu : 

  •        I cursi in sirintina 
  •        I punteddi di storia 
  •        Cunfarenzi dibattiti 
  •        Ghjurnati d’imirsioni 
  •        Ghjochi 
  •        Fà l’ortu
  •        Cucinà 
  •        Scopri u to patrimoniu
  •        Prugrammazioni infurmatica

In ugni casu, i participanti di st’atteddi sarani cunviati à passà u cirtificatu di lingua corsa. St’attività t’ani comu scopi di tuccà a maior’parti di a ghjenti è di prumova l’usu di a lingua corsa in ugni locu.