San Ghjuvà, u novu dischettu di Daniel Vincensini
2021-06-29 14:43:42

"Un dischettu d'8 tituli cù folk rock è una sunurità acustica" spiega Daniel Vincensini. L'opera hè stata arrigistrata in u so studio cù l'aiutu di Atom Studio in Biguglia. 8 canzone, frà quesse u cumuvente San Ghjuvà, ma cù una musica rimanighjata. I testi sò scritti da Dédé Nobili, Ghjacumu Fusina, Frédéric Manaut è Laetitia Cosimi. "Quassù" hè a storia d'un amore chì hà duratu pocu, "Siria", una canzona dedicata à a so figliulina, "L’amore hè mortu", nant'à i strazi d'un coppiu chì si separa, "Bastia" parla di a cità nativa di u canterinu, "Dimmi tù" hè una ballata irlandese, specia di seguita à Surella d’Irlanda, cantata cù Jean-Marc Ceccaldi… 

Avemu dinù e famose canzone macagna, scritte da Daniel : "Alors on mange" (parudia di a canzona di Stromaé) è "La Balagne des Pinz heureux" (parudia di quella di Gérard Lenorman). Ind'è i musicanti, si ritrova à Patrick Mattei chì sona a chitarra, Laetitia Garcia à u viulinu, Claude Mazzieri à a bassa, Vincenzo Lota à a batteria.