Six millénaires en Balagne
2021-07-07 15:10:06

Dopu à l'urganizazione d'un cullocchiu in Belgudè d'ottobre 2016, u LRA (Laburatoriu Regiunale d'Archeolugia) publicheghja u libru "Six millénaires en Balagne: Balagna, Ghjussani, Ostriconi, Falasorma" in cullaburazione cù parechji autori nant'à i travaglii storichi è archeologichi da a Prestoria à a perioda cuntempuranea. Ogni trè anni, stu laburatoriu urganizeghja un cullocchiu pè parlà di sfarenti aspetti di u patrimoniu isulanu. In u 2016, u LRA hà sceltu a cumuna di Belgudè è aldilà a Balagna pè presentà unepochi di travaglii archeologichi è storichi fendu intervene parechji cercadori, ognunu specializatu ind'una perioda definita. Grazia à e ricerche è à l'impegnu d'ognunu, u LRA hà pussutu publicà un libru nant'à sei millenarii di storia balanina.

Durante u cullocchiu di Belgudè, ci eranu cunferenze nant'à a tematica lucale è nant'à l'attualità di e ricerche. In u libru esciutu da stu cullocchiu, u lettore puderà truvà travaglii trattendu d'archeolugia prugrammata ma dinù preventiva, di Storia. Trattanu di l'occupazione di l'Età di u Bronzu è di l'Età di u Ferru, di a piazza primurosa di a Balagna à u medievu.