DICHJARAZIONE DI I DIRITTI DI
L'OMU E DI U CITATINU

Traduzzione : Ghjuseppu LEONI

I riprisententi di u populu francese, custituidi in Assemblea Naziunale, cunsiderendu chì l'ignuranza, a dimenticanza o u dispettu di i diritti di l'omu sò e sole cause di e sciagure publiche è di a curruzzione di i guverni, anu dicisu di spone, ind'una dichjarazione sulenna, i diritti naturali, inalienabili è sacrati di l'omu, di modu chì ista dichjarazione, in cuntinuu prisente à tutti i membri di a sucietà, li ramenti sempre i so diritti è i so duveri ; di modu chì l'atti di u Putere Legislativu è quelli di u Putere Esecutivu, pudendu esse ogni volta paragunati cù u scopu di qualsiasi istituzione pulitica, ne sianu di più rispettati ; di modu chì e lagnanze di i citatini, ghjustificate aramai da principii semplici è incuntestevuli, vaghinu sempre à u mantenimentu di a Custituzione è a felicità di tutti.
Per cunsequenza, l'Assembléa Naziunale ricunnosce è dichjara in prisenza di l'Essere Supranu, i seguenti diritti di l'Omu è di u Citatinu.

Articulu Primu. - L'Omi nascenu è fermanu liberi è pari in diritti. E distinzioni suciali ùn ponu ghjustificassi chè per l'utilità cumuna.

Art. 2. - U scopu d'ogni associu puliticu hè u mantenimentu di i diritti naturali è imprescrittibili di l'omu. Issi diritti sò a libertà, a pruprietà, a sicurità è a risistenza à l'uppressione.

Art. 3. - U principiu di tutta suvranità ripone essenzialmente ind'a Nazione. Nisun corpu, nisunu pò esercità autorità chì ùn venga precisamente da a Nazione.

Art. 4. - A libertà cunsiste à pudè fà tuttu ciò chì ùn nuce micca à l'altri : hè cusì chì a pratica di i diritti naturali d'ognunu pianta à e limite chì permettenu à l'altri membri di a sucietà di gode i listessi diritti. Isse limite ùn ponu esse stabilite chè da a Lege.

Art. 5. - A Lege ùn pò pruibì chè i fatti chì nucenu à a sucietà. Tuttu ciò chì ùn hè pruibitu da a Lege ùn pò esse interdettu, è nimu pò esse custrettu à fà ciò chì a Lege ùn impone.

Art. 6. - A Lege hè spressione di a vuluntà generale. Tutti i citatini in persona, o per mezu di riprisententi soi, anu dirittu di participà à a so cuncezzione. Deve esse a listessa per tutti, siasi ch'ella prutega, siasi ch'ella cundanni. Essendu pari in lege, tutti i citatini sò, à paru, ammissibili à tutte e dignità, piazze è impieghi publichi, secondu e so capacità è senza distinzione chè quella di e so virtù è di i so talenti.

Art. 7. - Nisunu pò esse accusatu, arrestatu o imprigiunatu chè in i casi previsti da a Lege, è secondu u modu chì a Lege prescrive. Quelli chì sulliciteghjanu, spediscenu, esecuteghjanu o facenu esecutà ordini arbitrarii devenu ese puniti ; ma ogni citatinu chjamatu o incausatu in virtù di a Lege deve ubbidì subitu : a resistenza u rende culpevule.

Art. 8. - A Lege ùn pò stabilì chè cundanne ghjustamente è veramente necessarie, è nisunu ùn pò esse punitu chè secondu una lege stabilita è prumulgata nanzu à u delittu è legalmente appiecata.

Art. 9. - Tuttu omu hè presuntu nucente sin'à ch'ellu ùn hè statu dichjaratu culpevule. S'è lu hè ghjudicatu indispensevule d'arrestallu, tuttu rigore chì ùn seria necessariu per catturallu deve esse ripressu cù se verità da a Lege.

Art. 10. - Nimu deve esse frasturnatu pè e so upinioni, ancu puru religiose, à cundizione chì spremendule ùn guastinu l'ordine publicu.

Art. 11. - A libera cumunicazione d'idee è upinioni hè un dirittu frà quelli più preziosi di l'omu : ogni citatinu pò dunque parlà, scrive, stampà liberamente, for chè à risponde di l'abusu d'ista libertà in i casi stabiliti da a Lege.

Art. 12. - A garanzia di i diritti di l'omu è di u citatinu necessiteghja a forza publica. Ista forza hè dunque istiuita pè u bè di tutti è micca per l'utilità particulare di quelli chì ne anu a carica.

Art. 13. - Pè l'intrattenimentu di a forza publica è pè e spese d'amministazione, una cuntribuzione cumuna hè necessaria : deve esse scumpartuta ugualmente frà tutti i citatini secondu i mezi d'ognunu.

Art. 14. - Tutti i citatini anu u dirittu di custatà da per elli, o per mezu di i so riprisentanti a necessità di a cuntribuzione publica, d'accunsentela liberamente, di surveglianne l'impiegu è di determinanne a quatoparte, à basa, u ricuveru è a durata.

Art. 15. - A sucietà hà dirittu di dumandà conti à tuttu agente publicu di a so amministrazione.

Art. 16. - Tutta sucietà duve a garanzia di i diritti ùn hè assigurata, nè a separazione di i puteri determinata, ùn hà custituzione.

Art. 17. - A pruprietà essendu un dirittu inviulabile è sacratu, nisunu ne pò esse privatu, for chè sì a necessità publica, legalmente custatata, n'abisogna veramente è à patti è cundizioni d'una ghjusta è anticipata indennità.