PALISGIA O CULISGIA

" NOMMA DI CAPRI "

ERNESTU PAPI
ADECEC 1986

Austu 1986. Tamanti caldamona ! Mi ni sò cuddatu à godda i me ossa in muntagna, annantu à u pianu di LUFIU, altu 1200 metri, à 5km di a foci D’IDDARATI. Cinqui o sei ceseddi di pastori murati à l’assiccu è cuparti di carta catramata fumichighjani i ghjorna di ventu sutt’à i larici vechji più di trecent’anni.

A ghjurnata hè guasgi par compia. Davanti à u caseddu di Ghjorghju F. u capraghju, un ghjovanu chì s’hè datu à fà i capri da l’annu scurzu, ci biimu u nosciu caffè tramendui. Sarani da cinqui à sei ori (pocu pò l’affari !) u vintuleddu di a serra si ni fala crista crista.

Lampendu un ochji ver di u fundu di a piana, Ghjorghju si pesa è dici : " avà cuntorrani ! mì à Culisgina ". Appena vinia d’aprasi a filetta.

Trà mèmè pensu " Bò comu farà à cunnosciala à tempu vista, è po da luntanu ". E’ ùn hè nudda. A’ pocu à pocu empia a piana a banda di trecentu capri. (menu quiddi chì ùn sò anc’à cunturrà).

Ghjorghju i fighjola una ad’una.

Fussiti stati à a me piazza à mezzu à tamanta banda, vi saristiti dittu ancu vò :

Un’ pudendu più tena a d’aghju ditta.
Tandu m’hà spiigatu.

ECCU :

U nommu di i me capri o di i me becca l’aghju datu sicondu ciì chì si vidi. Pò essa par via di :

  1. U culori di u pilu
  2. Una particularità
  3. Una qualità o un difettu (di parsona o di cumpurtamentu)
  4. U caprettu
  5. O maritendu u culori incù un’altra particularità.

    Eccu quì i nomma di i capri (ùn ci sò micca tutti, soli i capri fiddati sò stati arrigistrati) è di i becca incù a spiigazioni di l’origini di u nommu.

     

1. NOMMA DATI PAR VIA DI U CULORI

Culori unitu :

NIRETTA : capra tutta nera.
NIRONA : capra maiori tutta nera.
NIRINA : capra minuredda nera.
A NERA : capra nera.
TANERA : capra tutta nera (parolla muzza : TUT’TANERA)
FATIMA : capra nera catrama.
MORRACHINA : capruchja morra.
MURRINA : capra minuredda morra.
CARBONIA : capra tutta nera, culor di carbonu.
CARBUGNINA : capruchja nera, culore di carbonu.
CIRONA : caprona culor di cera.
CIRINA : capruchja culore di cera.
CIRATA : capra culor di cera.
CIRETTA : capra minuredda culor di cinnara.
CINNARINA : capra minori culor di cinnara.
GRISGIA : capra grisgia.
RISGINA : capra grisgia.
RISGETTA : capruchja grisgia.
A GIADDA : capra giaddiccia (culor pisciaddosu).
CASA’ : beccu culor di Casanis annacquatu.
MUGHEDDA : capra bruta, pari un mogu.
MURTINUCCIA : capruchja culor di u pedi di u murtonu.
MUSGINATA : capra incù u pilu chì pari brutu.
LISTINCA : capra culor di listincu vistu da luntanu. (culori bastardu).
MUVRINA : capra culor di muvra.
MUVREDDA : capruchja culor di muvra.
RUSSEDA : capruchja russa.
RUSSULANA : capra tutta russa.
TABIA’ : capra bianca (parolla muzza dui volti : TUT’TABIA’NCA).
BIANCONA : caprona bianca
BIANCHETTA : capruchja bianca.
BIANCAREDDA : capra minuredda bianca.

Dui culori :

PALISGIA : capra smizata, bianca davanti è nera daretu (spaddì bianchi).
PALISGIA RUSSA : capra bianca davanti, russa daretu.
PALISGIA CHJARA : capra i spaddi più bianchi è nera daretu.
PALISGETTA : capruchja palisgia.
PALISGIA NERA : capra incù i spaddi bruni è nera daretu.
PALISGINA : capruchja palisgia.
CULISGIA : capra smizata, bianca daretu (culu) è nera davanti.
CULISGINA : capruchja culisgia.
CULISGIA MAIO’ : caprona culisgia :
CULISGETTA : capruchja culisgia.
CULISGIO’ : caprona culisgia.
LUDINA : capra nera davanti, cinnarina daretu.
LUDINA MAIO’ : caprona lùdina.
LUDINEDDA : capruchja lùdina.
CINTU : beccu castagnu cintu biancu (incù una cinta bianca in giru à u corpu).
CINTA RUSSA : capra russa cinta di biancu.
CINTULEDDA : capruchja nera cinta di biancu.
CINTA BIANCA : a capra pò essa nera o russa cinta di biancu.
RUPPEDDA : capra di un solu culori incù i ruppi più chjari.
CORPIBIANCU : capra d’un solu culori (o nera o russa) incù a panza bianca.
COSCIBIANCA : capra nera incù i cosci bianchi.
CHJARASGIATA : capra sempri nera incù dui bandi bianchi in faccia chì falani annant’à l’ochji, bandi piuttostu minori.
CHJARASGINA : capruchja chjarasgiata.
CHJASGI : capra chjarasgiata.
FILATA RUSSA : capra bianca bianca incù dui fili russi in faccia à falera, più larghi insù chè inghjò.
FILOMENA : capra bianca bianca incù un filu neru annant’à i ruppi. Si chjamava FILINERA, a parolla hè stata sfurmata.
TACCULEDDA : capra bianca o nera taccata sighi di biancu, di russu o di neru.
BELLU’ : capra incù una grossa luna bianca par fiancu (Bellù) veni da Bella Luna).
SPICHJOLA : capra incù un spichju biancu in fiancu (com’è un spichju d’adda).
PIDIOLA : capra incù i peda d’un antru culori chè quiddu di u pilu.

 

2. NOMMA DATI PAR VIA D’UNA PARTICULARITA’

L’ochji

CECU : beccu cecu d’un ochji.
UCHJATU : beccu incù frisgi in faccia.
UCHJATA NERA : capra bianca uchjata nera (dui frisgi neri in faccia) ; a capra pò essa d’un antru culori ma micca nera.
UCHJATA BIANCA : capra bianca uchjata nera.
UCHJATA GRISGIA : capra grisgia uchjata bianca.
UCHJATINA : capruchja uchjata.
UCHJATA RUSSA : capra russa uchjata bianca.
OCHJI BIANCA : capra muvrina incù una tacca (un ochji tonda bianca in fiancu (ochji ùn hè micca listessi chè uchjata).

A faccia

FACCIATA : capra incù a faccia bianca.
FACCIULINA : capruchja facciata.
FACCIATA RUSSA : capra russa facciata.
FACCIARONA : caprona facciata.
MAGANATA : capra cinnarina incù dui tacchi castagni annant’à i bucceddi (com’è brutta in faccia).
MASCARATA : capra mascarata in faccia.
MASCARONA : caprona mascarata in faccia.
BUCCHISGIOLA : capra incù u muccichili biancu.
BUCCHIBIANCA : capra incù a bucca bianca.
CIUFFINA : capra incù un ciuffu annant’à u capu (ciuffu finu).
BARBOTA : capra incù a barba longa è grossa.

U nasu

NASINA : capruchja incù u nasu biancu.
NASINA NERA : capruchja nera incù u nasu fiuritu (mezu biancu pichjulatu).
NASICHJOLA : capra micca nera incù u nazsu fiuritu.

I corri

MOTINA : (cocia ind’è no’) a banda hè stata compra in Corsica suprana. Avia dighjà stu nommu.
COCCIU : beccu senza corri (= motinu in Corsica suprana).
CORRI SOLA : capra incù un solu corru.
CORRI STRINTA : capra incù i corri strinti chì si toccani in punta.
CORRI SIGATA : capra incù i corri sigati parchì crisciani troppu.
CORRI PIIGATI : capra incù un corru piigatu.
TRE PIIGATI : capra incù un corru piigatu.
TRE QUARTI : capra incù un corru troncu trè quarti.
CHJUPPEDDA : capra incù i corri chjoppi (allargati in davanti, i vacchi hani spissu i corri chjoppi).
PUNTACCI : capra incù i corri longhi à usu puntacci.

L’arrichji

ARRICHJI BIANCA : capra incù l’arrichji bianchi.
ARRICHJI SFITTATA : capra incù un’arrichji sfittata da cima à in fundu.
ARRICHJINA : capra incù l’arrichji minori.
ARRICHJONA : capra incù l’arrichji maiori.
ARRICHJI SFISSA : capra incù un’arrichji sfissa in punta. Sfissa ùn hè come inzzicata ; l’inzicca hè un signu fattu da u capraghju par cunnoscia i so animali.
PENCA : capra incù l’arrichji penchi (chì pendani).

U coddu

CUDDARUCCIA : capra incù u suttu di u coddu d’un antru culori.
CUDDARATA : capra di tuttu culori incù u supra di u coddu d’un antru culori.

A fronti

STIDDULANA : capra stiddata (incù una stedda bianca in fronti).
STIDDOLA : capra stiddata minori.
STIDDINA : capra stiddata è chjuca.
STIDDATA NERA : capra nera stiddata bianca in fronti (u culori di a capra si dici in fini).

Un culori spiciali

A PECURA : capra incù a stessa incapatura (corri arrunditi) è u stessu culori chè a pecura.
ALPINA : capra di razza alpina, culor muvrinu incù un frisgiu neru annant’à u spinu.
ALPINUCHJA : capruchja alpina.
ALPINACCIA : caprona alpina mal fatta.
ARCHJITEDDA : capre com’è l’arghjetu (u masciu di a muvra) listessa incurratura è listessu culori.
MINUREDDA : capra nera com’è a merula incù i dui bucceddi mezzi castagni.
STAMERLA : capra mirulata (nera com’è a merula).
CRUCCIATA : capra crucciata incù l’alpina.

3. NOMMA DATI PAR VIA D’UNA QUALITA’ O D’UN DIFFETTU

SALTULEDDA : munghjindula saltuchjighja cù i ghjambi di daretu (com’è a saltuledda).
CANCARU : capra sempri malata.
A VECHJA : capra vechja.
CIUFFEDDA : capra ciuffuta (pililongu dapartuttu).
CIUFFINA : capra incù un ciuffu in fronti più chjucu.
PUPPULONA : capra incù l’uari tondi è maiò.
" ANDRUET " : trè capri chì viaghjani sempri in testa di a banda.
" DARNICHE " : Darniche hè una capra coccia (munda in capu com’è Darniche).
" MOUTON " : Mouton hè una capra bianca.
CALA CAPU : capra chì cala u capu munghjindula.
DUPPIU METRU : capra longa longa.
CAMPAGNOLA : capra manza è fida ; veni à manghjà i buttaccioli in manu.
BUSCIUNEDDA : nommu datu da minori ; li s’hè firmatu (una busciona ùn hè nè capra nè caprettu).
PEDI PLATTA : capra incù i pedi allungati in davanti.
ZUPPONA : caprona scianca.
MULETTA : capra incù a stessa fattoghja chè un mulu (alta annant’à ghjambi).
CAMIO : capra grossa è alta.
CAREZZA : capra chì si strufina sempri à u capraghju quand’iddu entri in u stabiu.
RIBERBIA : capra minori, bilava micca lindu, avia un belu spicciali, un pocu com’è u son di a riberbia (riverbula).
DAMISGIANA : capra incù l’uaru com’è una damisgiana (longu è grossu in ghjò).
TRE TITTULI : capra incù trè tittuli. Un uaru hà dui capitignuli.
SPIRITA : capra spiritata, meza tonta.

4. NOMMA PAR VIA DI U CAPRETTU

ZUPICHEDDA : capra incù u caprettu chì era natu sciancu.
PEPEPE’ : capra incù u caprettu chì sughjia è bilava à tempu fendu pè pè pè incù u capitignulu in bucca.
MONGOL : capra incù u caprettu mezzu tontu (Mongol veni da " Mongolien ").
TAVULETTA : capra chì ùn vulia micca dà à sughja à u caprettu. Li sò falati colpi di tavuletta (è tandu po…).
TAILLE FINE : capra incù u caprettu chì sughjindu sughjindu avia sempri u corpu viotu.

5. NOMMA DATI MARITENDU U CULORI INCU UNA PARTICULARITA’

PALISGIA CORRI STRINTA : capra pàlisgia incù i corri strinti.
PALISGIA CORRI SIGATA : capra pàlisgia incù i corri sigata.
PALISGIA A UN TITTULU : capra pàlisgia incù un tittulu.

 

Eccu qualchì parolla scontra quinci è culandi :

  • Capra spidita : hè una capra chì ùn hà micca fiddatu.
  • Fidà : fà u caprettu.
  • Capra bracata : incù i brachi diffarenti à u restu.
  • Capitignulu : tittulu ; si dici un tittulù pà una busciona chì ùn hà mai fiddatu ; un uaru pà una capra (l’uaru hè furmatu à capu di trè fidderi) ; è un pisturu pè una lofia.
  • L’uari : i puppuli.
  • U stabiu : ricintu pà sarrà i capri.
  • U compulu : ricintu pà sarrà i pecuri.
  • U sarconu : cascietta pà sarrà u caprettu in a ghjurnata.
  • U bugnulu : un pezzu di legnu di murti liatu in bucca à u caprettu pà impidiscialu di sughja.
  • U cacarugnulu : cacati di capri.
  • Una busciona : capretta da addivà, dighjà lintata à mezzu à a banda.

     

    Dopu avelli spiigati è assistiti si capisci meddu parchì Ghjorghju i cunnoscia à tempu visti.
    Tutti i nomma sò stati dati par tenali à menti più prestu : facini travaddà a mimoria visuali. A suffissera li parmetti di ricunnoscia capri di listessu culori.

    Entrini in baddu i rilazioni :

  • trà u capraghju è i so animali (CAREZZA, TAVULETTA…) ;
  • trà u capraghju, a natura è u locu (MURTINICCIA. LISTINCA.  MUVREDDA…) si trova in u rughjonu nomma di loca (A Punta Coccia, I Puntacci, A Punta Russedda, U Tafon’di Mugheddu) ;
  • trà l’omu è u so campà (CAMPAGNOLA.  RIBERBIA.  SPIRITA’ CASA, MUGHEDDA…).

     

    E pà ringrazià à Ghjorghju d’avemi datu incù pacienzia tutti i spiigazioni li diciaraghju : " e vera chì i trenni di a lingua sò in mossa, spicciemuci di pidani unu. Un’ aspittemu micca chì l’ultimu sighi partitu, chì tandu sarà difficiuli à richjappallu è dopu… ùn ci ni serà più ".