GHJENNAGHJU

1.I.

Maria Vergine, Madre di Diu.

Maria, in Ebreu Miriam, era figliola di Ghjuvacchinu è d'Anna. Cù Ghjiseppu, u so sposu, chì ùn l'avia ancu "cunnusciuta", stavanu in Nazaret di Galilea quandu ella ricevì a visita di u Spiritu Santu, è si truvò incinta.

Dopu, durante trè mesi, si ne và à stà ind'è a so cucina Lisabetta, a mamma di u Precursore.

Quandu i Rumani facenu u censimentu di a pupulazione, Maria è Ghjiseppu sò arregistrati in Bettelemme, à ottu chilometri da Ghjerusalemme. Custì, Maria parturisce di Ghjesù.

Per salvà u criaturu da u massacru di i Nucenti, cumandatu da Erode, i genitori u si portanu in Egittu.

Rivenuti in Bettelemme à a morte d'Erode, Maria ci stà torna vinticinque anni.

Dopu avè assistitu à a crucifissione, a Madre addulurata si ne và à stà ind'è Ghjuvanni. Hè forse morta in Ghjerusalemme.

Etimolugia: da l'ebraicu "Myriam", significatu incertu, forse "vidente", forse "signora". In Corsica, in u 1981, u nome Maria, solu o accuppiatu à un altru, era purtatu da 264 donne nantu à 100O. In più, era datu à certi maschji, accuppiatu à un altru nome: Petru Maria, Filippu Maria, ecc.

Nomi: Maai, Maaike, Mae, Maei, Mair, Maire, Maja, Mall, Mally, Mamie, Manioussa, Manon, Mara, Marei, Mareïa, Märge, Mari, Maria, Mària, Mariam, Marica, Marichka, Marie, Mariedel, Marieke, Mariekje, Mariella, Marielle, Marietta, Mariette, Marig, Marija, Marinette, Mariola, Mariouchk, Mariquita, Marisa, Marise, Mariska, Marita, Marite, Marja, Marjelle, Maroussia, Maruja, Maruska, Maryse, Maureen, May, May, Mia, Miempie, Mietta, Mikke, Mimi, Minnie, Miriam, Mirzel, Mitzi, Moira, Moire, Moll, Molly, Molly, Moyra, Muire, Myra.

Nomi traversi: Assunta, Carmel, Carmen, Cuncetta, Nunziata.

2.I.

Santu Basiliu Magnu. Santu Gregoriu di Nazianzu.

Basiliu hè natu versu l'annu 330 in a cità turca di Cesarea.

Ellu, Gregoriu di Nazianzu (festighjatu u listessu ghjornu) è Ghjuvanni Crisostomu, sò i trè duttori ecumenichi di a Chjesa ortodossa, è i megliu scrittori di i Patri grechi.

Basiliu hà lasciatu scritti chì provanu ch'ellu hè statu u regulatore di a vita munastica in Oriente.

Dopu à avè passatu cinque anni à e scole d'Attene è à u munasteru d'Anessi, hè statu fattu vescu di a cità nativa. Custì ebbe à scumpete cù l'imperatore chì vulia impone l'arianisimu in a Cappadocia. Fece di manera chì ci volse à discute è à neguzià cù u papa di Roma per ristabilì l'unità di a Chjesa cristiana.

Issa lotta ruvinò a so salute, è morse à 49 anni, u primu ghjennaghju di l'annu 379.

Cunsideratu tantu da i pagani chè da i cristiani, u chjamavanu Basiliu Magnu.

Etimolugia: da u grecu "basileus" (rè).

Nomi: Basil, Basile, Basileo, Basilide, Basiliu, Basilius, Vassil, Vassily.

Paesi è cità: Parigi (31 marzu).

Litteratura: Basilea, hè u capilocu di l'Atlantide di Platone. Basile hè u calunniatore in u "Barbier de Sévile" (1775) di Beaumarchais.

Gregoriu avia un annu di più chè Basiliu. Eranu stati inseme à e scole d'Attene è à u munasteru d'Anessi. L'omu ùn era fattu per vive in sucietà. Ciò chì li piacia era a sulitutine. Avia 33 anni quandu u babbu, chì ghjera vescu di Nazianzu, l'ubligò à fassi prete. Nove anni dopu, Basiliu u cunvincia di lasciassi cunsacrà vescu. Per qualchì annu, ebbe a rispunsabilità di e dioccesi di Sasime è Nazianza. Fù ancu, per qualchì settimana, patriarca di Custantinopuli.

A' 54 anni, cù a scusa chì i Cristiani ùn temianu più nisun disturbu, si ritirò in una pruprietà di a famiglia per pregà è scrive. E' cusì, hà lasciatu 400 puesie.

Hè mortu l'annu 389, dece anni dopu à Basiliu.

3.I.

Santa Ghjenuveffa.

Ghjenuveffa hè nata "in vicu Nemptu doro", l'attuale cità di Nanterre in u dipartimentu di i Hauts-de-Seine.

Dopu à a morte di i genitori, si ne hè andata à stà cù a cumare in a capitale gallica di i Parisii. Custì, pè u più, campava rinchjusa. Avia u donu di leghje in e cuscenze, è di tranquillizà l'esaltati. U rè Childericcu, è u figliolu Clodoveu, avianu, per ella, assai cunsiderazione.

U miraculu hè chì, issa donna, senza appartene à una famiglia di signori, abbia avutu tanta influenza nantu à l'evenimenti di l'epica. Pretendenu chì sì Attila, u rè di i Uni, fù battutu, fù grazia à ella. In l'annu 451, Attila avia invasu a Gallia, è i Parisii vulianu abandunà a capitale. Ghjenuveffa l'hà impediti di parte dicendu: "in altrò ùn serete micca più preservati". E' si messe à pregà. I Uni cambionu strada, andetenu versu Aurelianoru, l'attuale Orléans, è funu disfatti à i Campi Catalonichi.

Ghjenuveffa hè morta à 80 anni, versu l'annu 500.

Etimolugia: da u germ. "gen" (giovana?) è "waiba" (donna).

Nomi: Geneviève, Genevièvre, Genovefa, Genoveva, Genovevo, Geva, Ghjenuveffa, Gina, Ginette, Ginou, Guenia, Guenièvre, Guenovefa, Veni, Veno.

Paesi è cità: Nanterre, Parigi (trasl. 28 uttobre).

Prutezzione: pulizzeri, gendarmi, accuglitrici in l'aviazione.

4.I.

Santa Anghjula di Foligno.

Nata in u 1248, in a cità taliana di Foligno, pruvincia di l'Ombria, Anghjula hè morta in issa cità u 4 ghjennaghju 1309

U racontu ch'ella hà dettatu di e so sperienze spirituale, hè unu di i più belli di a litteratura mistica. Quandu ella perde tutti i soi, prova à fà un acconciu di issu sconciu. Si cunverte, face penitenza, è campa da povera. Era favurizata da e grazie e più strasurdinarie, ma dinù oppressa da e suffranze è da e persecuzioni. Pocu nanzu di more e suffranze stancionu, è campò l'ultimi ghjorni in una altissima felicità.

U so mudellu era San Francescu d'Assisi, è fece parte di u Terzu Ordine franciscanu. Di tantu in tantu, andava in pelegrinaggiu nantu a tomba di u Santu. Intornu à ella, ùn vulia chè Franciscani spirituali, quelli chì praticavanu e regule prime di San Francescu, secondu u testamentu di u Poverellu. Quelli chì avianu cambiatu isse regule, cum'è San Bonaventura è i prelati rumani, ùn i pudia pate.

Etimolugia: da u grecu "eggelos" (messageru).

Nomi: Ange, Angela, Angèle, Angelica, Angélina, Angéline, Angélique, Angelo, Anghjula, Anhjulu.

Cf S. Anghjulu, 5 maghju.

5.I.

Santu Eduardu. Santu Simeone u Stilitu.

Eduardu, dettu u Cunfessore, hè natu in Westminster versu l'annu 1004. Figliolu d'Ettelred u Malaccortu, guvernò l'Inghilterra da l'annu 1042 à quandu ellu hè mortu, u 5 ghjennaghju 1066. Fù l'ultimu rè anglosassone avanti à a cunquista di l'Inghilterra da Guglielmu di Nurmandia, dettu u Cunquistadore.

Era pacificu, assai devotu è s'interessava à i poveri. U so populu u tenia caru, ma ùn era fattu per fà u rè.

Etimolugia: da u germ. "ed" (bebi, patrimoniu) è "ward" (guardianu). Eduardu hè unu di i rari nomi anglosassoni à avè francatu u mare per diventà à a moda nantu à u cuntinente eurupeu, forse per via d'opere literarie, di Jean-Jacques Rousseau, Goethe è d'altri.

Nomi: Duarte, Eddy, Edoardo, Edouard, Edouarda, Edouardik, Edouardine, Eduarda, Eduardo, Eduardu, Edvard, Edward, Edwarda, Ned, Odoardo, Orward, Ted, Teddy.

Paesi è cità: Inghilterra, Westminster.

Simeone hè natu in Turchia versu l'annu 390. Avia 13 anni è facia u pasturellu cù u babbu quand'ellu intese e parulle di Santa Lucia chì dicenu: "Guai à voi chì oghje ridite, dumane pianghjerete". Fù tandu ch'ellu decise di fassi frate. Dopu à avè girandulatu quindi è culandi cù d'altri rimiti, stete dece anni à u munasteru di Teleda. Per via di certe murtificazioni bizare, fù cunsideratu cum'è un uriginale è l'anu messu fora. Allora, si ne hè andatu in Antiocca è si hà fattu una cellula. U mercuri di e Cenere murava a so porta è ùn l'apria chè u ghjornu di Pasqua, stendu senza manghjà. Diventò tantu celebre chì venianu à vedelu da ogni locu. Numerosi eranu quelli chì si strappavanu un pezzu di i so panni per tenelu cum'è reliquia. Per evità issi strazi, decise di campà in cima di un stile, vene à dì: di una culonna. Fù u primu à avè issa idea. Dopu à ellu ci ne fù d'altri in Oriente sinu à u dodecesimu seculu.

Nantu à issa culonna, passava u tempu à pregà è à dà cunsigli. Ancu l'imperatore di Bizanziu vense à vedelu. Volse fughje issa ghjente nuiosa è andassine in altrò, ma u vescu d'Antiocca ùn u lasciò parte. Hè mortu u 24 lugliu di l'annu 459.

Contanu chì, un ghjornu, fù visitatu da pelegrini gallichi. Simeone li dumandò chì, di ritornu in i so lochi, passendu per duv'ella hè ohje a cità di Parigi, li salutessinu à Santa Ghjenuvefa.

6.I.

Santu Melaniu. A Beata Raffaella.

Melaniu, mortu versu l'annu 530, era u vescu di a capitale gallica di i Redoni, l'attuale cità di Rennes, in u dipartimentu di l'Ile-et-Vilaine. In i tempi, i Brettoni u festighjavanu trè volte à l'annu.

Etimolugia: da u grecu "melas" (neru, moru, scuru).

Nomi: Malania, Mel, Melania, Melânia, Mélanie, Melanija, Melanio, Melaniu, Melanius, Melany, Mélas, Melina, Mellie, Melloney, Mellony, Melltje, Meloney.

Paesi è cità: Rennes.

Raffaella Maria Porras era una Spagnola nata in Cordoba in u 1850. Hè morta in Roma u 6 ghjennaghju 1925.

A' 27 anni, cù a surella Maria del Pilar, avia fundatu l'Ancille di u Sacru Core, vene à dì e Serve di u Sacru Core di Ghjesù. Si occupavanu di l'educazione di i zitelli poveri, o passavanu u so tempu à adurà u Santissimu Sacramentu.

Durante 14 anni, Raffaella fù a superiora è Maria del Pilar l'economa.

Raffaella rimpruverava à a surella di troppu scurrizà. Allora, in u 1893, Maria face di manera chì Raffaella sia destituita è piglia u so postu. Per dece anni, hè stata a superiora di a Cungregazione.

Issi dece anni, è torna vintidui, Raffaella i passò in un catagnone, disprezzata, ma cuntenta di ùn avè altru à fà chè di pregà.

Quand'ella hè morta, u papa hà sappiutu ciò chì si era passatu è urdinatu un prucessu in beatificazione. Vintisette anni dopu, in u 1952, era messa nantu à l'altari.

7.I.

Santu Raimondu di Pennafort.

Raimondu, un Catalanu natu à Pennafort, accantu à Barcellona, versu l'annu 1175, era un frate di San Dumenicu.

Avia 55 anni quandu u papa Gregoriu IX li dumandò di redige i decreti puntificali. Issi decreti, publicati u 5 sittembre 1234, anu guvernatu a Chjesa sinu à l'annu 1917 quandu elli anu stampatu u Codice di Dirittu canonicu.

Finitu issu travagliu, Raimondu si hè spicciatu di riturnà in u so cunventu duminicanu di a Catalogna.

Quattru anni dopu, i so cunfratelli u facenu Generale di l'Ordine. Tene issa funzione dui anni è po dà a so demissione, pressatu ch'ellu era di cuntinuvà e so prediche in lingua catalana. Cum'è scusa, disse ch'ellu era troppu vechju. Ellu, chì camperà un centu d'anni, n'avia tandu 65. Hè mortu in Barcellona u 6 ghjennaghju 1275.

Di San Raimondu, contanu un miraculu chì ghjè una maraviglia: era andatu in l'isula Maiorca cù u rè d'Aragona. Quandu ellu s'avvede chì u rè avia purtatu cun ellu a so cuncubina, li dumanda di rinvialla. U rè ricusa. Allora decide d'andassine. Cerca un battellu, ma ùn ne trova chì u rè avia datu i so ordini. Chì face Raimondu? Stende u so mantellu nant'à u mare, rialza un angulu per fà vela, è l'appicca à u so bastone. Dece ore dopu era in Barcellona.

Etimolugia: da u germ. "ragin" (cunsigliu) è "mund" (prutettore), cù u significatu: "prutezzione divina". U nome Raimondu hè statu difusu à u medievu in Spagna è in u meziornu di a Francia duv'ellu hè statu quellu di sette conti di Tolosa. In Alemagna hè statu rimessu à a moda à u seculu scorsu. In Inghilterra si hè spartu assai da u 1925 à u 1950. U più ch'ellu usa hè in Spagna cù a forma "Ramon".

Casate: Raimondi.

Nomi: Moncho, Raimo, Raimo, Raimond, Raimonda, Raimondo, Raimondu, Raimund, Raimunde, Raimundo, Raimunds, Rajmond, Ramon, Ramona, Ramuncho, Ray, Raymond, Raymonde, Reamonn, Reemt, Rehm, Reim, Reime, Reime, Reimund, Reinmund, Remus, Remus, Reum, Reum.

Paesi è cità: Barcellona, Toledo.

Prutezzione: ghjuristi.

8.I.

Santu Lucianu. Santu Severinu.

Lucianu serebbi statu un prete rumanu mandatu per evangelizà a Gallia. Hè statu marturiatu, versu l'annu 300, accantu à Bellovacum, l'attuale cità di Beauvais, dipartimentu di l'Oise.

Etimolugia: da u lat. "lux" (luce).

Casate: Luciani, Lucciani. In u 1981, in Corsica, a casata Luciani venia à u terzu rangu, dopu à Casanova è Albertini. 17% di i Luciani eranu in Niolu-Omessa, 9% in Aiacciu, 8% in Bastia è 7% in Corti.

Paesi è cità: Beauvais (tras. 1u maghju)

Nomi: V. Lucca (18 uttobre).

Severinu di i Norici hè mortu in l'annu 482.

Issu famosu apostulu austriaccu, ùn si sà da duv'ellu surtia. Affaccò un ghjornu in a cità d'Astura annunziendu chì i Barbari ghjunghjianu. U si ghjuconu à a risa. Qualchì settimana dopu, a cità era distrutta.

Certi storichi pretendenu chì Severinu era l'amicu secretu d'Odoacru, u rè d'Italia chì, in l'annu 476, scacciò l'ultimu imperatore rumanu d'occidente.

Durante trenta anni, Severinu predicò u Vangellu longu à l'Altu Danubiu, da Vienna à Passau. Cunvertia i paisani, ma dinù i barbari ghjunghjiticci. Facia chjese è munasteri. U volsenu fà vescu, ma ricusò dicendu ch'elli si cuntentinu ch'ellu abbii abandunatu a so vita di rimitu per dalli succorsu... Forse dinù chì ùn era mai statu prete.

Etimolugia: da u lat. "severus" (severu, fermu).

Casate: Severi, Severoni, Sevieri.

Nomi: Frein, Freng, Frin, Frin, Frings, Saverina,Saverinu, Seva, Sevariane, Seve, Sévéra, Sévère, Severianka, Severiano, Sévérien, Sévérienne, Severijn, Séverin, Severina, Séverine, Severinu, Severinus, Sevir, Sören, Sövrin, Vira.

Paesi è cità: Austria, Baviera, Vienna, San Severino.

9.I.

Santu Ghjulianu. Santu Adrianu di Canterbury.

L'antichi martirologhi ci facenu sapè chì Ghjulianu è Basilissa, dui omi maritati, avianu decisu d'ùn onurà più e so moglie per megliu onurà u Signore. Cunsacravanu u so tempu è i so rivenu ti à sullevà i poveri è i malati.

Avianu un casamentu in Egittu chì ghjera diventatu una specia d'uspidale cù appartamenti pè e donne è appartamenti pè l'omi. Basilissa s'occupava di e donne. Era sempre abbastanza giovanu quandu ellu hè mortu marturiatu. Ghjulianu hè invechjatu. A so casa era u rifugiu di i cristiani persecutati. Hè mortu marturiatu versu l'annu 304, ùn si sà induve: Egittu, SIria, o Tebaide.

Etimolugia, casate, nomi: V. Ghjuliu (12 aprile)

Adrianu era natu in Africa, è ghjera abate di Nerida, accantu à Roma. Hè mortu in Inghilterra u 9 ghjennaghju di l'annu 710.

Quandu morse l'arcivescu di Canterbury, u papa Vitalianu (657-672) u volse sustituì da Adrianu. Adrianu ricusò dumandendu chì a carica sia data à u so amicu Teodoru. A pruposta fù accettata da u papa, à cundizione chì Adrianu andessi cù Teodoru per assistelu.

I dui amichi partenu.

Adrianu fù messu à a testa di l'abbazia di i santi Petru è Paulu di Canterbury. A guvernò trenta anni è ne fece un centru di fede ardente è d'umanisimu. Insegnava u grecu è u latinu, è parechji di i so frati parlavanu isse duie lingua cum'è a lingua materna.

Teodoru, chì fù vintunu annu arcivescu di Canterbury, è Adrianu, chì hà campatu torna dece anni dopu a morte di u so amicu, anu datu vita è forza à a Chjesa anglicana.

Etimolugia: da u lat. "Adrianus", da Adria, cità creata da l'Etruschi nantu à u mare Adriaticu.

Nomi: Adrian, Adriana, Adriane, Adriano, Adrianu, Adrien, Adrienne, Adrion, Hadrien.

10.I.

Santu Guglielmu.

Guglielmu era u figliolu di u conte di Niverni (l'attuale cità di Nevers) è u nipote di Petru u Rimitu chì predicò a prima Cruciata. Hè statu fattu vescu di Biturigi (l'attuale cità di Bourges (dipartimentu di u Cher) u 23 nuvembre 1200, è sceltu cum'è prutettore di l'Università di Parigi. Hè mortu u 18 ghjennaghju 1209. Hè statu vescu à casu. L'arcivescu di Parigi avia messu trè nomi in un scartellu postu nant'à l'altare. Dopu a messa ne surtì u nome di Guglielmu. In ottu anni di guvernu di a so dioccesi, i strazi ùn li manconu. I so canonichi li ne vulianu, chì Guglielmu tenia à ch'elli fussinu più credenti è menu suldai. E' po hè statu persecutatu da Filippu Augustu, rè di Francia, per via chì l'avia rimpruveratu d'avessi lasciatu a moglia per spusà a figliola di u duca di u Tirolu.

A' Guglielmu, i so più cari eranu i poveri, i prigiuneri è i malati abbandunati. Fece una vita tantu santa chì u papa u messe nant'à l'altari ottu anni dopu a so morte.

Etimolugia: da u germ. "wil" (vuluntà) è "helm" (prutezzione, elmu). A' u seculu IX, u nome Gugliemu - Wilhelm in alemanu, William in inglese, Guillaume in Francia - spartu soprattuttu da i Nurmani, era pupulare in tutta l'Europa. Hè statu quellu di una massa di persunagi celebri, cum'è Guglielmu u Cunquistadore, Guglielmu Tell (l'eroe di l'indipendenza elvetica), Villiam Shakespeare, ecc.

Casate: Guglielmi, Gugliermi, Guglielmini, Guglielmucci, Guglielmoni, Guglielmacci.

Nomi: Bill, Billie, Elma, Guglielma, Guglielma, Guglielmo, Guglielmu, Guilherme, Guillaume, Guillaumette, Guille, Guillelmina, Guillemet, Guillemette, Guillemin, Guillen, Guillerme, Guillermo, Guillou, Guilmot, Gulielma, Gwilhu, Gwylim, Helm, Helma, Helmet, Helmina, Helmke, Liam, Mina, Minella, Minka, Minnie, Mintgen, Vilguelm, Vilherlmina, Villerme, Villiam, Vilma, Vilmos, Wiley, Wilhelm, Wilhelmina, Wilhelmine, Wilkes, Wilkie, Wilko, Will, Willa, Willabelle, Willem, Willème, Willemintje, Willemtien, William, Williamson, Willie, Willis, Willy, Wilmette, Wilmot, Wilson, Wiltz, Wylma, Wymke.

Paesi è cità: Bourges.

11.I.

Santu Paulinu d'Aquilea. Santu Vitale di Gaza.

Paulinu hè unu di i veschi i più celebri di l'epica di Carlumagnu. Era un omu assai cultivatu. Scrivia cù assai facilità, tantu in prosa chè in rima. Alcuinu, unu di i principali cullaburatori di l'Imperatore, u cunsiderava cum'è u so maestru.

L'annu 776, Carlumagnu fece vene à Paulinu à a Corte, cum'è cunsiglieru per affari di Religione è di Chjesa. Ondeci anni dopu, l'hà fattu patriarca d'Aquilea, in u Friuli, oghje mezu à l'Italia è a Iugoslavia. Era un omu di fede è di pace. Tutti l'anni, à i cuncilii aduniti da l'Imperatore, si facia rimarcà cum'è nimicu di l'eresia è guida di l'umanità.

Hè mortu l'annu 802 o 804. Avia una settantina d'anni.

Etimolugia: da u lat. "paulus" (chjucu)

Casate: Paolini, Polini.

Nomi: Paavo, Pablito, Pablo, Pachata, Pachoukha, Paola, Paoli,

Paolina, Paolino, Paolo, Paul, Paula, Paulat, Paule, Päule, Paulette, Paulien, Paulienne, Paulille, Paulin, Paulina, Pauline, Paulino, Paulinu, Paulinus, Paulita, Paulot, Pauls, Paulu, Pauly, Pauw, Pauwel,Pauwel, Pauwels, Pavel, Pavla, Pavlia, Pavlik,Pavlina, Pavline, Pavlinka, Pavlounia, Pawl, Pèl, Pleins, Pol, Polu, Poul, Poulus.

Paesi è cità: Friuli (28 ghjennaghju).

Cf. Paulu (29 Ghjugnu)

Vitale hè mortu in Alessandria d'Egittu versu l'annu 625. Avia 60 anni quand'ellu si ramintò chì, secondu u Vangellu di San Matteu, e prustitute, ancu elle, avianu dirittu à u Paradisu. Allora, partì da Gaza di Palestina, duv'ellu campava cum'è un rimitu, è si ne andò in Alessandria duv'ellu ci era da fà.

Quallà, u ghjornu, dumandava a limosina in casa di i ricchi. Fattu notte, andava in u quartieru duve isse donne facianu u so travagliu. Tutte e sere, sceglia a più malavviata è a si purtava in una cameruccia ch'ellu avia appegiunatu, dopu à avelli datu u doppiu di ciò chì l'altri pagavanu. Custì, li cuntava u stalvatoghju di a pecura persa, cum'ellu hè statu contu da San Lucca, pregava cun ella è, à le volte, li riescia à falli cambià vita.

U vescu truvò e so fatture scandalose è u fece imprigiunà. Li rese a libertà dopu chì tutte e prustitute sianu venute sottu à e so finestre à falli u campanacciu.

Un ghjornu, un rofianu, chì avia persu e donne ch'ellu sfruttava, li dete una cultellata. A' Vitale li riescì à rientre in a so camera è, nanzu di more, scrisse nantu à una tavuletta: "Citatini d'Alessandria, ùn aspettate à dumane per cunvertevi, ma, per ghjudicà, aspettate u ghjudiziu finale".

Etimolugia: da u lat. "vitalis" (chì hà vita, pienu di vita, chì dà vita).

Casate: Vitali, Vitani, Viale, Viali.

Paesi è cità: Bologna, Ravenna.

Cf. San Vitu.

12.I.

Santa Tassiana. A Beata Margherita.

Si sà pocu è nunda di issa Santa Tassiana chì ghjera venerata da i Latini, i Grechi, è i Slavi.

Secondu una legenda scritta in grecu, tradutta in latinu, è po attribuita à Santa Martina, serebbi stata marturiata in Roma in i primi seculi di u Cristianisimu.

Certi pretendenu chì Santa Tassiana, festighjata u 12 ghjennaghju, Santa Prisca, festighjata u 18, è Santa Martina, u 30, serebbinu a listessa persona.

Etimolugia: forse da u lat. "Tatius", nome di persona.

Nomi: Tagra, Talna, Tana, Tanaïs, Tanaquil, Tania, Tanja, Tany, Tanya, Tassiana, Tassianu, Tatia, Tatiana, Tatiane, Tatien, Tatienne, Tatjana, Tiana.

Margherita Bourgeoys, nata in Troyes, dipartimentu di l'Aube, morta à u Canadà in u 1700, era a figliola di un cummerciante sciampagninu, babbu di dodeci figlioli. A' 33 anni, francò u mare Atlanticu cù unipochi di migranti chì andavanu à pupulà u campu militare di Ville-Marie, a futura cità di Monreale. Quallà, fece a stitutrice. Fù a prima stitutrice laica di u Canadà francese.

In u 1676, fece a Cungregazione di a Madonna, una cungregazione chì ùn serà ricunnusciuta da u vescu chè una vintina d'anni dopu. E sore avianu assai libertà è ùn facianu micca u votu perpetuu cum'è l'altre sore. Surtianu, facianu scola à e zitelle, denduli più educazione chè struzzione, fendune future moglie è mamme cumu si deve.

Una di isse sore fù un castigu per Margherita. Avia cunversazioni cù certe anime di u Purgatoriu chì li cuntavanu chì a superiora era in peccatu murtale. Isse discursate cù l'anime dannate duronu quattru anni sinu à ch'ella fù rimandata in Francia. Allora Margherita ritruvò a pace è guvernò u so istitutu torna tredeci anni. In u 1693, dete a so demissione è passò l'ultimi sette anni di a so vita à pregà.

Etimolugia: da u persianu "margiritis" (perla). U fiore hè statu chjamatu cusì per via chì, avanti di apresi, si assumiglia à una perla.

Nomi: Daisy, Greda, Gredel, Greet, Greta, Gretal, Gretchen, Grete, Gretel, Grethel, Gretus, Grietje, Guite, Madge, Mag, Magali, Magerete, Maggi, Maggy, Maguelonne, Maguerie, Maidie, Mairead, Mairghread, Maisie, Marga, Margalo, Margaret, Margareta, Margaretha, Margarethe, Margarethus, Margaretta, Margarette, Margaride, Margarita, Margaritka, Margarte, Marge, Margerie, Margery, Marget, Märget, Margette, Margherita, Margie, Margit, Margo, Margory, Margot, Margotton, Margoucha, Margrethus, Margrieta, Margrit, Marguerita, Marguerite, Marhaïd, Marharid, Marjorie, Marjory, Maroussia, Meg, Mergit, Meta, Mog, Pag, Pegg, Peggie, Peggy, Rita, Ritocha.

13.I.

Santu Ilariu.

Ilariu hè natu versu l'annu 315 in Pictavi (l'attuale cità di Poitiers, dipartimentu di a Vienne) in una famiglia nobile è pagana. Era maritatu è avia una figliola. Studiendu a filosufia, è punendusi quistioni, hà trovu e risposte in a Bibbia. E' ghjè cusì ch'ellu s'hè fattu cristianu. Dopu battizatu, hà vulsutu cunverte a moglia è a figliola. Elettu vescu di Pictavi à 35 anni, si stacca fisicamente da a moglia per ùn scuntralla più chè à l'altare. Cù San Martinu - chì avia abbandunatu l'armata per esse u so elevu - cumbattianu per una vera fede cristiana.

A' l'epica, l'Imperatori pruvavanu à impone l'arianisimu cù a speranza di ristabilisce a tranquilità in l'Imperu. L'arianisimu era una duttrina comuda. Ci era Diu... è po ci era Ghjesù, un omu chì avia assai qualità divine, allora chì a Chjesa latina, pè u più, addimettia a Santissima Trinità.

Santu Ilariu, omu d'azzione è scrittore di valore, cumbattì l'arianisimu cù accanimentu. E' cusì fù esiliatu per quattru anni in Frigia. Fù in issa regione di l'Asia minore ch'ellu hà cumpostu u so famosu libru "De Trinitate" chì diventò u vademecum di i partitanti di l'ortodussia. S'ellu hè vultatu in i do lochi, hè chì i veschi ariani di l'Asia minore ùn dumandavanu chè à sbarazzassine. Rivenutu in a so dioccesi l'annu 360, hè mortu sette anni dopu.

Dicenu chì Santu Ilariu era un omu caritatosu, bravu è assai simpaticu. A' chì u vedia una volta diventava u so amicu.

Etimolugia: da u lat. "hilaris" (alegru).

Nomi: Allaire, Glares, Guilarka, Hélier, Hilar, Hilaria, Hilarie, Hilario, Hilarion,Hilarius, Hilary, Hillary, Hillery, Ilari, Ilaria, Ilarion, Ilarione, Ilariouchka, Ilariu, Ilarka, Ilaro, Kläres, Lariocha.

Paesi è cità: Parma, Poitiers, Luçon.

14.I.

Santa Nina.

Nina serebbi una giovana cristiana fatta prigiunera è purtata in a capitale di a Georgia versu l'annu 337.

Custì campava ritirata. Nimu sapia da duve ella venia, ne mancu cume ella si chjamava. L'avianu cugnumata Cristianina, per via di a so religione, è, à l'accorta, Nina.

Per fà penitenza, Nina purtava una camisgia di pilone nantu à a pelle. Un ghjornu guerì un zitellu cuprendulu cù issa camisgia.

A regina, chì si ne muria di un male stranu, ebbe nova di u fattu, è a mandò à circà. A risposta di Nina fù chì un era fatta per entre in un palazzu. Allora a regina s'hè fatta purtà in casa di Nina, è ghjè guerita.

Hè certa chì a vulia ricumpensà, ma Nina ùn volse nunda è disse: "S'è vo vulite fammi piacè, fatevi cristiani, voi è u rè". E' a regina si fece cristiana.

Si cunvertì ancu u rè, ma più tardi. Un ghjornu ch'ellu era à caccia si trova in periculu mezu à animali salvatichi, è prumette, s'ellu ci sorte vivu, di fassi battizà.

Contanu dinù chì, dopu, l'imperatore Custantinu Secondu (337-340) li mandò dui veschi per battizà tutti l'abitanti di a capitale. Hè cusì chì a Georgia hè diventatu un paese catolicu, cù Santa Nina cum'è patrona.

Etimolugia: da u lat. "christianus" (cristianu)

Casate: Christiani, Cristiani.

Nomi: Carsta, Carsten, Chrétien, Chrétienne, Chris, Chrissy, Christe, Christel, Christelle, Christiàn, Christian, Christiana, Christiane, Christie, Christina, Christine, Cristiano, Karsten, Kerst, Kerstin, Khristocha, Kirsten, Kristian, Kristiane, Kristina, Kristine, Nina, Stijn, Stina, Stinke, Tina.

15.I.

Santu Remigiu. Santu Mauru.

Remigiu hè un santu d'urigine gallica, mortu versu l'annu 530. Durante settanta anni fù vescu di u capilocu di a tribù di i Remi, l'attuale cità di Reims, in u dipartimentu di a Marne. Hà cunvertitu à Clodoveu, u rè di i Franchi, è l'hà battizatu a notte di Natale di l'annu 496.

Remigiu era un omu assai eloquente è d'alta virtù. Un' si sà s'ellu si chjamava veradimente Remigiu o s'ellu hè statu chjamatu cusì per via di a cità di Remi. Ci sò chì pretendenu ch'ellu si chjamava Remediu.

Etimolugia: da u germ. "ragin" (cunsigliu) è "waldan" (dirige, cumandà).

Nomi: Miek, Rehm, Rem, Remey, Rémi, Remies, Remigia, Remigio, Remigiu, Remigius, Rémy.

Paesi è cità: Reims (trasl. 1u uttobre).

Mauru avia una trentina d'anni di menu chè San Benedettu (u celebre fundatore di l'Ordine benedittinu di Monte Cassinu) chì u cunsiderava cum'è u megliu di i so discepuli. U mandò à fà un cunventu à Castellu Fossatu, l'attuale Saint-Maur-des-Fossés, à sette chilometri da Parigi. Hè mortu u 15 ghjennaghju 584.

In u 1618, quandu Dom Bernardu, direttore di u cullegiu di Cluny, hà vulsutu rifurmà l'Ordine di i Benedittini, hà creatu una cungregazione è l'hà datu u nome di San Mauru.

Etimolugia: da u lat. "Maurus" (Africanu di a Mauritania), da una parulla greca chì vole dì "scuru".

Casate: Maurizi, Moracchini, Moraccini, Morelli, Morellini, Moreschi, Moretti, Mori, Moroni.

Nomi: Maolmuire, Maur, Maura, Maurelius, Maurice, Mauricette, Mauricia, Mauricio, Maurie, Maurilia, Maurille, Maurin, Maurino, Maurita, Maurits, Maurizia, Maurizio, Mauriziu, Mauro, Mauru, Maurus, Maury, Mavr, Mavra, Mavriki, Meurig, Meurisse, Moor, More, Moric, Morics, Moris, Moritz, Morrell, Morris, Morus, Seymour.

16.I.

Santu Marcellu.

Marcellu hè statu papa in l'anni 308 è 309, trè anni dopu à a fine di a persecuzione di Dioclezianu. Tandu, i cristiani chì, dopu à avè rinnegatu a so fede, dumandavanu u perdonu, eranu numerosi. Marcellu l'hà impostu penitenze tantu dure chì si sò rivultati è anu messu u disturbu in a cità di Roma. Per ristabilisce a pace, l'imperatore Massenziu hà scacciatu u papa, chì ghjè mortu pocu tempu dopu. L'anu sepoltu in u cimiteriu di Balbine, via Adreatina.

A celebrità di Marcellu vene soprattuttu da a "Messa di papa Marcellu", cumposta da Palestrina à u seculu XVI.

Etimolugia: da u nome lat."Marcus", cù u significatu: dedicatu à u diu Marte.

Casate: Marcellesi, Marcelli, Marcellini, Sammarcelli.

Nomi: V. Marcu (25 aprile).

Paesi è cità. In Corsica: Aleria, Barbaghju.- Aregnu, Belgudè, Bigornu, Brusticu, Corti, a Croce d'Ampugnani, Santa Lucia di Moriani, Zalana...

Prutezzione: palafrineri o stallieri.

17.I.

Santu Antone abbate,
dettu dinù Antone Magnu, o Antone di u porcu, o Antone di mezu ghjennaghju per ùn cunfondelu cù Antone di Paduva, festighjatu u 13 ghjugnu.

Antone hè natu in Egittu versu l'annu 255. A' l'età di vinti anni, leghjendu u Vangellu di San Lucca, truvò ste parulle di Ghjesù: "Vendi ciò chè tù ai, dallu à i poveri, è seguitami". Cusì fece. Si n'andò in u desertu, dentru un castellu abbandunatu. Ci passò una vintina d'anni cù un porcu chì l'avia raghjuntu. Quandu ellu pregava, u porcu facia u tazzu; a notte li facia vede bellissime donne. Era u diavule.

Quand'ellu ebbe cinquanta anni, Antone hè statu raghjuntu da altri chì vulianu campà sulitarii. E' cusì sò nati munasteri di rimiti, d'omi spernucciati nantu à un certu reghjone, ma cuntrullati da un abbate.

Sette anni dopu, l'hè chjappa torna a voglia di campà solu, è ghjè partutu versu u Mare Rossu. Hè mortu u 17 ghjennaghju di l'annu 356; avia più di centu anni.

Etimolugia: forse da "Antonius", casata rumana.

Casate: Antognetti, Antonelli, Antonetti, Antoni, Antonietti, Antonini, Antonioli, Antoniotti, Tognati, Tognetti, Togni, Tognini, Tognoli, Tognotti, Tonelli, Toniati, Toninelli, Tonioli .

Nomi: Anthony, Antoine, Antoinet, Antoinette, Antoinon, Anton, Antone, Antonella, Antoni, Antonia, Antonien, Antonienne, Antonin, Antonine, Antunietta, Tognu (V. Santu Tognumaria Zaccaria, 5 lugliu, è Santu Tognumaria Claret, 24 uttobre), Toinette, Toinon, Toni, Tonies, Tonia, Tonio, Toniu, Tony, Tugnu, Tunietta.

In Corsica, in u 1981, u nome Antone venia à u secondu rangu di i nomi maschili dopu à Ghjuvanni. Era quellu di 68 omi nantu à mille. Antunietta era à u quartu rangu di i nomi feminili dopu à Maria, Ghjuvanna, è Francesca. Era quellu di 23 donne nantu à mille.

Paesi è cità: Ampurias in Sardegna. In Corsica: Aiacciu, Aregnu, Campumoru, Casalabriva, Figarella, u Lucu di Venacu, Mezavia, Partinellu, i Pughjali di Muru, a Riventosa, San Gavinu di Fiumorbu, Serra di Ferru, Siscu.

Prutezzione: Santu Antone prutegge l'animali dumestichi. U preganu pè e malatie di a pelle è pè e malatie appigliaticcie.

Pruverbii: San Lurenzu gran calura, Sant'Antone gran friddura, l'una è l'altra pocu dura.

Santu Antone di Paduva, cf u 13 ghjugnu.

18.I.

Santa Priscilia. Santa Liberata. Santu Leobardu.

Di Liberata ùn si sà nunda; di Priscilia, pocu, ancu s'ella hè cunsiderata da certi cum'è a prima martira cristiana. Ma quandu ella hè stata marturiata ùn si sà. A' chì dice trà l'annu 45 è l'annu 54, à l'epica di Claudiu Tiberiu Primu, à chì dice trà l'annu 268 è l'annu 270 à i tempi di Claudiu Secondu dettu u Gotticu. U cultu vene da ciò chì, in Roma, nantu à a via Salaria nova, ci hè una catacomba detta catacomba di Santa Priscilia.

Etimolugia: da u lat. "priscus" (anticu). U nomer era assai in usu in Roma, à i primi seculi. Si trova in l'Atti di l'Apostuli è in a lettera di San Paulu à Timoteu. Hè statu rimessu à a moda da i puritani inglesi.

Nomi: Illa, Pris, Prisca, Priscilia, Prisciliano, Priscilla, Priscillian, Priscillien, Priscillienne, Priscilo, Prisco, Priscu, Priscus, Prisk,Priska, Priskilla, Prisque, Prissie.

Leobardu era di famiglia ricca è passò a so giuventù à studià e Belle Lettere. U so primu frastornu fù quandu u babbu li disse ch'ellu li avia buscu una zitella cumu si deve. Ellu, chì ùn tenia à maritassi, ùn disse micca di nò, ma si ingeniò à fà pazientà u babbu, preghendu u Signore ch'ellu li venga in aiutu. L'aiutu l'ebbe, chì u babbu si morse. Allora, dete a zitella à un fratellu più giovanu è si ne andò in Turone, l'attuale cità di Tours, à pregà nantu à a tomba di San Martinu.

In Turrone fece a cunnuscenza di San Gregoriu, u famosu autore di una storia di i Franchi, un Alvergnese cum'è ellu. E' diventonu amichi.

Leobardu tenia à a sulitutine. Cumprò una grotta, a ingrandò, ci fece dui finestrini, è campò custì 22 anni preghendu è studiendu e Sante Scritture. Per vive, fabricava carta pecura è a vendia. Gregoriu li purtava libri.

U decesimu mese di l'annu 592, Leobardu si ammalò. A' Gregoriu chè venia à cumunicallu, disse: "ùn ghjunghjeraghju micca à Pasqua". U 18 ghjennagghju cullava in Paradisu. Nanzu di spirà, avia dettu, à u frate chì u curava, di sorte... è morse mezu à l'anghjuli.

Etimolugia: da u lat. tardiu "leopardus", da u gr. "leopardos" da "leon" (leone) è pardos (pantera).

Casate: Leopardi.

19.I.

Santu Appianu. Santu Canutu.

Appianu era vescu in l'Africa di u Nordu quandu, in l'annu 428, ghjunsenu i Vandali. Fù esiliatu in Corsica cù San Fiurenzu è San Vendemiale. Tutti è trè sò stati impiegati à fà a legna in e fureste sopra à Sagone, ma truvonu ancu u tempu d'evangelizà u paese. Quand'elli sò vultati in Africa sò stati marturiati.

Etimolugia: ?

Paesi: Sagone, u Borgu di Marana. Appianu avia una chjesa in a pieve di Verde è, in Niolu, sopra à Corscia, ci hè un locu dettu Sant'Appianu.

Canutu, natu in u 1040, era u rè di u Danimarca. I primi anni di u so regnu tuttu andava bè è megliu. Ma, quandu Guglielmu u Cunquistadore si stabilì in Inghilterra, partì per cacciaccilu. A spedizione fù un disastru... è ghjera custata caru. Allora Canutu creò un impositu nantu à a nubiltà. I nobili si sò rivultati è n'anu ancu prufittatu per ùn pagà e decime ecclesiastiche.

Un ghjornu chì u rè era à a messa in a chjesa Santu Albanu, l'avertenu di a ghjunta di i ribelli. Invece di preparassi à l'attaccu, s'hè cumunicatu, a dichjaratu ch'ellu perdunava à i so nimichi, s'hè stracquatu, e braccie in croce, è s'hè messu à pregà. I cunghjurati sò entrati in chjesa è l'anu massacratu. Era u 10 lugliu 1086.

Etimolugia: forse da u bassu lat. "canutus" da "canus" (biancu). Forse dinù da u german. "knutr" (arditu, risulutu), u nome Knut essendu assai adupratu in u nordu di l'Europa.

Paesi è cità: Canutu (Knut in Danese) hè u Santu Patrone di u Danimarca.

Nomi: Canudo, Canute, Canuto, Canutu, Knud, Knut.

20.I.

Santu Bastianu. Santu Fabianu

Bastianu serebbi un Milanese marturiatu in Roma un 20 ghjennaghju è sepoltu in e catacombe di a via Appia.

Era digià onuratu da dui seculi quandu, à u seculu sestu, hè nata una legenda.

Secondu issa legenda, Bastianu era un bellu ufficiale chì passava u so tempu à succorre e vittime cristiane di a persecuzione urganizata da l'imperatore Dioclezianu. Da a stizza, l'imperatore l'hà datu à l'archeri chì l'anu matraversatu di frezze.

A veduva, Irena, vense à piglià a salma di Bastianu per dalli una sepultura. U martiru respirava sempre. U si hà purtatu in casa, l'hà gueritu, è l'hà dumandatu di stassine piattu. Ma Bastianu, più decisu chè mai, s'hè impustatu per vede l'imperatore è dumandalli a libertà pè i cristiani. Quellu l'hà fattu tumbà à bastunate, cum'è un cane.

A legenda hà piaciutu tantu chì si ne sò servuti pittori, musicanti è pueti.

Etimolugia: da u grecu "sebastos" (carcu d'onori, venerabile).

Casate: Bastianacci, Bastianaggi, Bastianelli, Bastianesi, Bastiani, Bastianini, Sebastiani.

Nomi: Basch, Bast, Bästel, Basten, Bastiaan, Bastian, Bastiana, Bastiano, Bastianu, Bastiat, Bastien, Bastienne, Bastin, Bastina, Baustian, Sebass, Sébastian, Sebastiana, Sebastiane, Sebastiani, Sebastiano, Sébastien, Sébastienne, SebestyenSeva, Sevastiana, Sevastiane, Wastel.

Paesi è cità: Roma, Mannheim, Palma, Soissons, Oetting, Chiemsée (trasl. 9 dicembre). In Corsica: Arbellara, Castineta, Chigliacci di Campulori, Munticellu, u Silvarecciu, a Verdese.

Prutezzione: pulizzeri.

Fabianu era un laicu fattu papa in 236, mortu martiru u 20 gjhjennaghju 250.

Etimolugia: da "Fabius", casata rumana, da "faba" (a fava). Cugnomi simili eranu assai in usu in l'Antichità: Ciceru venia da "u ceciu" è Lentulu da "a lentichja". U nome Fabianu s'hè spartu in Inghilterra à i seculu XIII. A u seculu XIX ci hè nata a "Fabian Society", creata in l'onore di Fabiu Cuntactor, un omou puliticu rumanu di u seculu terzu nanzu à Cristu, sucietà chì ghjè diventata u Partitu travaglistu. Ne facianu parte i rumanzeri B. Shaw è H.Ghj. Wells.

Casate: Fabiani.

Nomi: Faba, Fabia, Fabian, Fabiana, Fabiane, Fabiano, Fabianu, Fabianus, Fabie, Fabien, Fabienne, Fabiola, Fabion, Fabis, Fabiu, Fava.

Litteratura: u feminile Fabiola hè statu messu à a moda da u rumanzu di Wiseman in u 1845.

21.I.

Santu Fruttuosu. Santa Gnese.

Fruttuosu era u vescu di Tarragona, in Spagna, quandu ellu hè statu marturiatu, u 21 ghjennaghju di l'annu 259.

D'ellu n'anu parlatu u puetu Prudenziu è Santu Agustinu, è po, in u 1935, anu publicatu a so passione chì serebbi stata scritta da un testimone di l'epica.

Fruttuosu era statu arrestatu cù i so dui diacuni, è avianu passatu a nuttata in prigiò à pregà. U lindumane, u ghjudice li disse: - Sì dunque vescu? - Iè, rispose Fruttuosu, sò vescu. - Dì piuttostu chè tù ere vescu, disse u ghjudice. E' u cundannò à esse brusgiatu cù i so diacuni.

Quandu elli funu messi nantu à u legnaghju, un suldatu cristianu s'avvicinò è li disse: - Prega per mè. - Pregheraghju per tutta a Cristianità, da l'Oriente à l'Occidente, disse Fruttuosu.

Nantu à u legnaghju, i trè omi eranu stati liati arritti. I canapi funu i primi à brusgià. Allora si sò indinuchjati è sò morti preghendu.

U lindumane, i cristiani di u paese eranu venuti per racoglie e cendere di Fruttuosu è dalli una sepultura quandu elli anu intesu a voce di u Santu chì dicia: - Lasciatele stà, chì un omu fidu à Ghjesù ùn pò avè un onore particulare.

Etimolugia: ?

Paesi è cità: Segovia, Tarragona. In Corsica: Cagnanu.

Gnese era una zitella di tredeci anni, marturiata in Roma trà l'annu 250 è l'annu 306. Hè morta vuluntaria pè a so fede, curaggiosa davanti à u boia. U martiriu d'issa zitella hà cumossu tutti i cristiani di l'Imperu, è Gnese hè diventata un persunagiu di legenda. A legenda conta in l'Occidente ùn hè micca a listessa chè quella conta in l'Oriente.

Secondu i Latini, Gnese ricusa i sacrifizii à i dii pagani. A leganu à un piottulu, è li solcanu e carni cù unghje in ferru. A ghjente pianghje. Ella hè tutta gioia. Parechji giuvanotti si prisentanu per liberalla è spusalla. Gnese li dice: "Fidanzatu n'aghju digià unu, Ghjesù". E' po dice à u boia: "Spicciatevi chì m'aspetta". E' u boia li taglia u capu.

Secondu i Grechi, Gnese era di famiglia nobile, è u guvernatore avia decisu di falli rinnegà a fede cristiana. A porta in una casa cù e prustitute. Quella zitella pare un anghjulu è nisunu omu hà u curaggiu di prufittanne. For di unu chì a li prova è casca seccu. "Stà à sente, dice Gnese à u guvernatore, sì l'anghjulu mandatu da Diu hà fulminatu istu omu bestiale, hè chì ùn ci era altra manera per preservà a mio virginità; ma eiu u vogliu risuscità". E' cusì face, prima d'esse brusgiata.

Etimolugia: da u grecu "agnê" (pura, casta). U lat. "agnus" (agnellu) hà fattu cunfusione è a santa hè aspessu riprisentata cù un agnellu in collu.

Nomi: Agnès, Agnese, Agneta, Agnete, Gnese.

Litteratura: U nome francese Agnès, utilizatu da u Medievu, si hè spartu ancu più dopu à a pezza di Molière: "L'Ecole des Femmes", scritta in u 1662, è duve Agnès hè una niscentre. Arricurdatevi a frasa: "Le petit chat est mort".

22.I.

Santu Vincensiu.

Vincensiu era un diacunu spagnolu natu in Huesca, mortu in Valenzia l'annu 304.

Era un oratore tremendu. U vescu di Saragossa, chì ghjera tartagliulu, l'avia fattu diacunu è incaricatu di fà e prediche.

Arrestati tramindui, i mandanu in Valenzia. U guvernatore di a pruvincia principia per interrugà u vescu. Quellu, da a paura, ùn pudia caccià una parulla. U guvernatore si rallegrava digià, persuasu chì i dui omi accettavanu di rinnegà a fede cristiana. Allora, Vincensiu intervene, eloquente cum'è sempre, incuraggitu da i sguardi pietosi di u vescu, è spiega chì nunda i impediscerà d'esse fidi à a duttrina di u Cristu.

Vincensiu hè messu à a tortura. Mentre ch'elli u sgranfigneghjanu cù unghje di ferru, ch'elli u brusgianu à picculu focu, ellu stà intrepidu. Hè mortu pianu pianu, cantendu salmi.

Etimolugia: da u lat. "vincentius" (chì vince).

Casate: Vincensini, Vincentelli, Vincenti.

Nomi: Cencio, Cente, Centina, Centinus, Kenia, Nencio, Sensen, Sent, Uinsionn, Vicencia, Vicencio, Vicenta, Vicente, Vicentius, Vikacha, Vikenti, Vin, Vince, Vincensia, Vincensiu, Vincent, Vincente, Vincentius, Vincenz, Vincenza, Vinzene, Zens, Zenzel, Vikentia.

Paesi è cità: Vicenza, Cortona, Lisbona, Oporto, Leon, Valenza, Saragozza, Berna.

23.I.

Santu Ghjuvanni u Limusinariu.

Ghjuvanni hè mortu in 619 o 620, in l'isula di Cipru duve ellu era natu.

Era un anzianu funziunariu imperiale, veduvu, digià attempatu, quandu elli u fecenu patriarca d'Alessandria... è parte.

-"Quantu sò quì i mio patroni?" disse ghjunghjendu. U fighjavanu imbasgialiti: "Iè quantu ci hè poveri in stu paese? Sò elli i mio patroni. Sò elli chì riprisentanu u Signore nantu à sta terra".

Poveri n'anu trovu settemila è cinquecentu chì, oramai, ogni ghjornu, ebbenu a so limosina.

Quandu elli dicianu à Ghjuvanni: "Attenti! ci sò chì vi burlanu. Facenu i poveri, ma ùn sò!", Ghjuvanni rispundia: "Sè vo ùn erete cusì curiosi, ùn sapereste s'elli mi burlanu o nò. Gueritevi di issa curiosità, è lasciate fà, sinnò vi ghjunghjerà u zimbu. Eiu preferiscu esse burlatu centu volte, piuttostu chè di trasgredisce una volta a legge di a carità."

U miraculu era chì u bursellu ùn viutava mai.

Avia datu una barca nova à un piscadore, chì a vechja si n'andava in pezzi, è quellu ùn sapia cumu ringraziallu. "Ringraziemu inseme u Signore" disse Ghjuvanni.

In chjesa, ci eranu chì si ne surtianu nanzu à a fine di l'uffiziu. Un ghjornu, Ghjuvanni lasciò l'altare è, vestutu da vescu, pasturale in manu, si n'andò fora cun elli. "O zitelli, u pastore deve stà cù e so pecure. Ma ci vurebbi ch'o mi sparti in dui, chì ci sò chì sò restati dentru". Più nimu escì nanzu à a fine di a messa.

Scacciatu da Alessandria durante l'invasione di u 619, Ghjuvanni rientrò in l'isula nativa, è morse qualchì mese dopu.

Etimolugia: da l'ebraicu "Yohanân" (Diu ti hà aggraziatu).

Paesi è cità: Roma, Parigi (9 aprile), in Oriente (11 nuv.), Monacu.

V. Ghjuvanni (27 dicembre).

24.I.

Santu Francescu di Sales.

Francescu, figliolu di u marchese di Sales, hè natu in u 1567 à u castellu di Thorens (in l'attuale dipartimentu di Haute-Savoie). Hà fattu i so studii, da chjucu in Annecy, da 14 à 21 annu in Parigi, da 21 à 24 anni in Paduva. A' 26 anni hè urdinatu prete da u vescu du Ginevra chì, l'annu dopu, u manda à circà di cunverte i Calvinisti di u Chablais. A' 32 anni hè cuaghjutore di u vescu chì l'hà fattu prete è, trè anni dopu, li succede. A so dioccesi era chjuca è avia pochi catolichi; Arrigu Quartu di Francia, chì cunsiderava ch'ellu avia tutte e qualità, li prupunia megliu in i so Stati. Francescu rispose: "Un' rinnegu micca a donna povera ch'o aghju spusatu per piglianne una altra più ricca è più bella". Un' impedisce micca chì, aspessu, andava in Francia à predicà.

In u 1604 - hà tandu 37 anni - scontra, in Digione, duve ellu era andatu à predicà a Quaresima, Jeanne de Chantal (a mammone di a futura Madame de Sévigné), è creanu inseme a Cungregazione di e sore di a Visitazione.

U 28 dicembre 1622, more in Lione duve ellu avia accumpagnatu u duca di Savoia cum'è cunsiglieru puliticu.

San Francescu dicia: "U peghju di i vigliacchisimi hè u scuraggimentu". Hè cunsideratu cum'è unu di i megliu scrittori di l'epica. U so capu d'opera hè l' "Introduction à la Vie dévote", scrittu in u 1607 è u 1608 pè a so cucina, Madame de Charmoisy, per spiegalli e virtù chì una donna nobile pò acquistà cù una vera fede.

Etimolugia: forse da u german. "frank" (curaggiosu), forse da u nome etnicu di i Franchi.

Paesi è cità: Annecy, Chambéry.

Prutezzione: scrittori è ghjurnalisti.

25.I.

A cunversione di San Paulu

San Paulu, l'Apostulu, natu in Turchia, era un Ghjudeiu di citatinanza rumana chì avia studiatu in Ghjerusalemme. A so cunversione hè stata conta da ellu stessu è da San Lucca.

"A' mè - dice San Paulu - mi si paria un duvere d'avè à cumbatte à Ghjesù u Nazareu. In Ghjerusalemme, aghju messu in prigiò una massa di i so discepuli, è mi rallegrava quandu ch'elli eranu cundannati à morte. Aspessu, in e sinagoghe, l'aghju marturiati per ch'elli rinneghinu a so fede. Era talmente furiosu chì andava à circalli in e cità strangere.

"Fù cusì chì sò andatu in Damascu per incatenanne unipochi è purtalli in Ghjerusalemme.

"Ci avvicinavamu da a cità, eiu è i mio cumpagni, quandu, versu meziornu, una luce più forte chè u sole ci accecò, è cascheimu in terra."

"E' tandu, una voce disse:

- Perchè mi persecuteghji?

"E' eiu dissi:

- Quale sì, signoru?

"A voce rispose:

- Sò Ghjesù, u Nazareu, quellu chè tù persecuteghji. T'aghju sceltu per esse u mio testimone davanti à i Ghjentili, per annunzialli qualcosa, per ch'elli credinu in mè, è passinu da e tenebre à a luce, è ottenghinu, cù u perdonu di i so peccati, a lascita di Diu. Alzati, entri in cità, ti spiegheraghju.

Paulu era sempre cecu. I cumpagni u guidonu tenendulu pè a manu, è ghjunsenu in un certu Ghjuda.

Un omu, chì si chjamava Amania, li disse:

- U Signore mi manda per rendeti a vista è datti u Spiritu Santu.

L'hà impostu e mani, è l'hà battizatu. E squame chì ghjeranu nantu à l'ochji casconu. Ellu chì ghjera statu dui ghjorni senza manghjà è senza beie, si messe à tavula è manghjò.

E', dui ghjorni dopu, si n'andò à sparghje a duttrina di Ghjesù

Etimolugia: da u lat. "paulus" (chjucu)

Paesi è cità: Roma, Bologna, Massa, Lombardia, Berlinu, Avignone, Cluny, Brema, Londra, Saragozza, Valladolod (trasl. 16 aprile),

V. Paulu (29 ghjugnu).

Nanzu, u 25 ghjennaghju, si celebrava a memoria di frate Franceschinu di Ghisoni.

Si chjamava Orsu Francescu. Era natu u 17 dicembre 1777, figliolu du Martinu Mucchielli è d'Anna Gregori. Da chjucu, hà persu u babbu, è po, à 11 anni, a mamma. U si anu pigliatu i frati di u cunventu di Ghisoni.

A' 21 annu, si ne hè andatu in Roma duv'ellu avia un ziu medicu. U 24 uttobre 1800 hè entratu ind'i Franciscani è, u 26 uttobre 1801, facia prufessione di voti munastichi.

Hà dumandatu à u Signore a grazia di ùn esse prete è u Signore l'hà statu à sente danduli u mal cadutu.

Hà campatu in u ritiru di Civitella, l'attuale Bellagra, accantu à Subiacco, cum'è u so cumpatriotu San Teofilu di Corti. Hè mortu à 54 anni, u 25 ghjennaghju 1832.

Franceschinu avia u donu di fà i miraculi è di prufetizà. U patre superiore l'avia dumandatu quand'ellu vulia more. Ellu rispose: "Aspettu i vostri ordini". Allora, mentre ch'elli cantavanu u salmu "Laetatus sum", à e parulle: "in pace in idipsum dormiam et requiescam", hà resu a so anima à Diu.

A Sacra Cungregazione di i Riti l'hà dichjaratu Venerabile in u 1848.

26.I.

Santa Paula. I Santi Timoteu è Tittu.

Paula era una signora rumana nata l'annu 347. A' 17 anni s'era maritata è avia avutu cinque figlioli, quattru femine è un maschju.

A' trentadui anni perde u maritu ch'ella tenia assai. Cerca rifugiu in a religione è frequenta un circulu di donne di l'aristocrazia creatu da Santa Marcella è direttu da San Ghjilormu

L'annu 385, Ghjilormu parte pè a Terra santa. Certe donne si ne vanu cun ellu. Paula u seguita, purtendusi una di e figliole chì si chjamava Eustacchia.

A' Bettelemme, Paula face dui munasteri, unu per Ghjilormu è i so discepuli, l'altru per ella è e so cumpagne.

Ghjilormu facia travaglii di scrittura, traducendu a Bibbia. Ella li dava di chè campà, è circava di tranquillizallu, chì ghjera un omu assai suffisticu.

Hè morta u 26 ghjennaghju di l'annu 404. Avia 57 anni. A figliola, chì serà canunizata ancu ella, l'hà chjusu l'ochji è l'hà interrata accantu à a casa duve ellu era natu Ghjesù.

V. Paulu (29 ghjugnu)

Paesi è cità: Roma, Parigi (22 ghjugnu).

Timoteu è Tittu eranu dui cullaburatori di San Paulu l'Apostulu.

Timoteu, figliolu d'un babbu grecu è d'una mamma ghjudeia, San Paulu l'avia trovu in l'Asia minore, l'avia cunvertitu è battizatu. Da tandu, u s'avia purtatu cun ellu da a Macedonia à Roma.

Tittu, ellu, era digià cunvertitu quandu San Paulu l'hà scontru in Antiocca. U si hà purtatu in Ghjerusalemme, , è po l'hà mandatu in Grecia, è in altrò, à sparghje a duttrina di Ghjesù. Hè mortu in l'isula di Creta duve ellu avia intruduttu u Cristianisimu.

Etimolugia: Timoteu:da u grecu "timaô" (aghju rispettu) è "theos" (Diu). Tittu: da u nome latinu di persona, Titus.

Casate: Timotei.

Nomi: Theus, Thiemo, Tim, Timetheus, Timmie, Timms, Timmy, Timo, Timofej, Timotea, Timoteo, Timoteu, Timothée, Timothy, Tiomoid.

Paesi è cità: Roma (24 ghjennaghju), Parigi (31 marzu), Custantinopuli (trasl. 24 ferraghju).

27.I.

Santa Divota. Santa Anghjula Merici.

Divota hè a santa patrona di a Corsica è di a principalità di Monacu. Secondu vechji scritti, tradizioni è legende, eccu ciò chì pò esse a so storia:

Divota serebbi nata nantu à l'attuale territoriu di a cumuna di Lucciana, in un locu chjamatu Querciu, à quattru chilometri da l'antica cità di Mariana, versu a muntagna.

Hè stata allevata da una balia cristiana è, cù d'altre cristiane, andava à pregà in a grotta di a Nepiticcia chì si trova accantu à u paese di u Borgu.

Era prutetta da un certu Ticchiu, patriziu è senatore. Tandu - simu à u principiu di u seculu Terzu - a Corsica dipendia da u prefettu rumanu di a Sardegna, chjamatu Barbaru.

Quandu Barbaru ghjunse in Mariana, dumandò chì omu li metti in manu i cristiani. Ticchiu ricusò è fù avvelenatu.

Divota more marturiata. Tandu, un prete è un diacunu arrubanu u so cadaveru, u imbalsameghjanu, u mettenu nantu à una barca per purtallu in Africa, ma una culomba guida a barca versu u portu d'Ercule, l'attuale Monacu, trà Nizza è Vintimiglia. E' cusì hè stata sepolta culà.

A' u XVIImu seculu, i Ghjesuiti di Bastia anu ottenutu qualchì reliquia di a santa.

In u 1731, i patrioti corsi in guerra contru à Genuva, aduniti in u cunventu di u Boziu, anu pruclamatu à Santa Divota prutettrice di u Regnu di Corsica.

U 14 marzu 1820, a Sacra Cungregazione di i Riti hà fattu di Santa Divota a Patrona principale di a Corsica, cù festa doppia è uttava.

Etimolugia: da u lat. devotus" ( fidatu, divotu).

Casate: Devoti.

Nomi: Devote, Divota, Divotu.

Paesi è cità: Monacu. In Corsica: Petranera.

Anghjula Merici hè una santa taliana nata in Desenzano in u 1474, morta in Brescia in u 1540.

Orfana à sedeci anni, bella è ricca, avia decisu di cunsacrassi à l'educazione di e zitelle. Passò trentacinque anni à amparalli a duttrina cristiana è po, cinque anni nanzu di more, riescì à creà un istitutu ch'ella dedicò à Santa Orsula. Nascì cusì a prima cungregazione insegnante d'Europa.

L'Ursuline eranu sore libere, senza nisunu ingagiamentu. Nè mancu purtavanu una vestura particulare cum'è l'altre sore. Ricevianu e zitelle in i so munasteri, è andavanu dinù à fà scola in e case.

Dopu à a morte d'Anghjula Merici, a Chjesa ubligò l'Ursuline à avè una disciplina... è una vestura.

Cf S. Anghjulu, 5 maghju.

28.I.

Santu Tumasgiu d'Aquino.

Tumasgiu era un frate di San Dumenicu natu versu l'annu 1225 à a Roccasecca d'Aquino.

Quandu i genitori u mandanu in Napuli per studià, decide di fassi frate è principia u nuviziatu. A famiglia si oppone. Prova à scappà per andassine in Parigi, ma dui fratelli u raghjunghjenu in Siena è u chjudenu in un castellu. Un ghjornu, provanu à metteli una prustituta in lettu. Ellu chjappa un tizzone infiaratu è a ci caccia.

Quandu ellu hè liberatu, secondu l'ordini dati da l'imperatore Federiccu Secondu, Tumasgiu ritorna à u cunventu di Napuli. Avia una vintina d'anni.

A' vintiquattru anni hè fattu sottudiacunu in Parigi. A' vinticinque anni hè fattu prete in Cologna. U so prufessore, tantu in Parigi chè in Cologna, era u famosu Santu Alibertu, un frate duminicanu assai sapiente, unu di i maestri di a scolastica. Tumasgiu hè diventatu prufessore ancu ellu è hà fattu scola in Parigi, in Roma, in Bologna è in Napuli.

Di ghjennaghju 1274, parte per andà à u Cunciliu di Lione. Per istrada s'ammala, è more u 7 marzu in l'abbazia di Fossanova.

A' San Tumasgiu, u chjamavanu u "duttore angelicu". Hà scrittu assai, è ghjè cunsideratu cum'è unu di i grandi maestri di a scolastica. A so opera principale, intitulata "Somma teologica", s'hè restata da finì. Quandu u so secretariu li dicia di compiela, ellu rispundia: Innò chì tuttu ciò ch'o aghju scrittu, avà mi pare paglia è fenu".

Etimolugia: da l'aramaicu "toma'" (picciaiu).

Casate: Masi, Masia, Masetti, Masini, Masotti, Toma, Tomasi, Tomasini, Tomei, Tomi, Tommasi, Tommasini.

Nomi: Dehmel, Foma, Foma, Fomaïda, Khoma, Maas, Masetto, Maso, Massey, Tam, Tammy, Thoma, Thomas, Thomase, Thomasin, Thomasine, Thomasje, Thomé, Thömel, Thomelin, Thoms, Thum, Tom, Tomas, Tomàs, Tomasa, Tomasi, Tomasina, Tomaso, Tomé, Tommie, Tommy, Toms, Tumasgiu, Tumasina.

Paesi è cità: Napuli, Roma (7 marzu), Parigi (18 marzu)

Prutezzione: università

29.I.

Santu Gilda. Santu Ghjulianu l'Uspitalieru.

Gilda, dettu u Saviu, era un Scuzzese fattu prete versu l'annu 518, mortu in u 570. Hà esercitatu u so ministeru in Irlanda, in Inghilterra, è in Brettagna. Hà creatu parechji munasteri. In a penisula di Rhuis (in l'attuale dipartimentu di u Morbihan) si vedenu sempre e ruine di quellu ch'ellu avia fattu avanti di ritirassi in l'isula di Huat, chì ghjè in faccia, una isula chì deve u so nome à a so forma ("huad", in brettone, vulendu dì "anatra").

Gilda era assai struitu. Da giovanu avia studiatu a filosufia è a litteratura.

Etimolugia: da u nome latinu di persona "Gildo" (?)

Nomi; Gilda, Gildas

Di Ghjulianu ùn si sà nunda for di una legenda.

Vultendu da viaghju, u signoru Ghjulianu entre in a camera cunghjugale per basgià a moglia. Spuntava u ghjornu. Chì vede in lettu? A moglia cù un omu. Tira a spada è taglia u capu à tramindui. E' parte. Per istrada, trova a moglia chì ghjera andata à a messa è chì li conta chì, avendu ricevutu a visita di u soceru è a socera, l'avia datu u so lettu.

Addisperatu di avè tombu u babbu è a mamma, Ghjulianu parte cum'è un scemu, senza sapè duve andà. A moglia u seguita.

E' viaghjanu, è viaghjanu... Un ghjornu entrenu in una furesta è sò arrestati da un fiume grossu. Facenu una capanna per elli è un picculu uspiziu pè i pelegrini è l'andacciani. Ghjulianu si face barcaiolu per chì a ghjente possi francà u fiume.

Moglia è maritu campanu cusì una trentina d'anni. Disgraziati ùn eranu, chì si tenianu caru. Ma, di tantu in tantu, Ghjulianu si ramintava a so malfatta è u rimorsu li macinava u core.

Un ghjornu, ghjunghje un vagabondu leparosu chì li dumanda di fallu passà nantu à l'altra sponda di u fiume. Sbarcandu da culandi, l'andaccianu era diventatu un anghjulu, vistutu di biancu, bellu cum'è u sole.

- "Sie in pace - li disse. Hè un pezzu chì u Signore ti hà perdunatu. Hè ellu chì mi manda per dittila. Addiu... o piuttostu à prestu."

Qualchì ghjornu dopu Ghjulianu è a moglia murianu è, inseme, cullavanu in Paradisu.

30.I.

Santa Martina.

Martina, vergine è martira, campava in Roma à u seculu terzu. Altru ùn si sà. Ci sò chì a chjamanu Tassiana.

In Parigi, à u museu di u Louvre, Santa Martina hè riprisentata in trè pitture di Berettini, più cunnusciutu cù u nome di Petru di Cortona.

In una, a principale, pinta in u 1634, forzanu a santa à entre in u tempiu d'Appollu. Ella face u segnu di a croce, è u tempiu si ne fala.

Etimolugia: V. Martinu (13 aprile).

31.I.

Santa Marcella. Santu Ghjuvanni Bosco.

Marcella era una signora rumana nata versu l'annu 345. Veduva dopu à sette mesi di matrimoniu, custruisce, nantu à l'Arentinu, un palazzu, una specia di munasteru, un circulu di donne.

Era bella, ricca, struita, assai cultivata. Era à paru à l'omi i più distinti, i più sapienti. E' nisunu si hè permessu di ridesine o di criticalla, malgradu d'esse stata a prima di e signore à mettesi in vista cum'è cristiana.

Quandu, in l'annu 382, San Ghjilormu vultò da Custantinopuli, duve ellu avia studiatu e Sante Scritture, stete in u palazzu di Marcella per spiegà u Vangellu à isse donne.

Trè anni dopu, i Barbari s'avvicinavanu da a cità. Ghjilormu si ne và in Palestina purtandusi l'amiche di Marcella: Santa Melania, Santa Paula, è d'altre. Marcella disse ch'ella era troppu vechja per parte. Avia una quarantina d'anni.

A' l'età di ottantacinque anni, hà vistu entre in Roma l'armate di u rè di i Visigoti. Per sapè duve ella avia piattatu e so ricchezze, l'anu tantu pesta chì si n'hè morta.

Ghjuvanni Bosco, un Piemuntese natu in u 1815 in Castelnuovo d'Asti, hè mortu in Turinu in u 1888.

Quandu, à 26 anni, s'hè fattu prete, hà vistu un altru prete dà una frusta sulenne à un picculu sgaiuffu. U l'hà cacciatu da e mani, l'hà ammasgiulatu è l'hà preparatu pè a prima cumunione. Era tantu affettuosu, e so lezziò eranu tantu piacente, chì d'altri zitelli volsenu amparà a duttrina cun ellu. Ebbe una vintina d'elevi, è po un centu. Allora fù ublicatu di dispone d'un casamentu. A prima scola di Don Bosco venia di nasce.

Pianu pianu, stabilimenti simili ne fece in l'altre cità d'Italia, è po in Sicilia, à u Tirolu, in Francia, in Belgica, è ancu in l'Ameriaca suttana. Per occupassine hà creatu duie cungregazioni: in u 1857, quella di i Salesiani, chì hà per Santu Patrone à Francescu di Sales è, in u 1872, quella di e sore di Maria Ausiliatrice.

Etimolugia: V. Ghjuvanni (27 dicembre).