1.IX.

Santu Egidiu. Santu Lupu.

Egidiu era un rimitu venutu d'Attene à stassi in Provenza. Hà datu u so nome à u paese è furesta di Saint-Gilles-du-Gard, nantu à u Rotanu, vicinu à Marseglia. A so pupularità vene da l'abbazia edificata nantu à a so tomba, forse à u seculu sestu, tomba chì si truvava nantu à una strada da Roma à Santiagu di Compostella. I pelegrini ci si arrestavanu è, di ritornu in i so paesi, cantavanu e lode di u santu.

A legenda dice chì Egidiu era dilicatu di stomacu è chì, ogni matina, una cervetta venia à truvallu è si lasciava munghje cum'è una sciocca.

Etimolugia: da u germanicu "gisil" (talla, cacciu, discendente). Anu dettu dinù chì u nome vene da una parulla greca chì vole dì "piccula capra".

Nomi: Aegidia, Aegilius, Egede, Egid, Egide, Egidia, Egidio, Egidiu, Egidius, Eguidi, Gil, Gildrina, Gilet, Gilia, Gill, Gilles, Gilleske, Gillet, Gillette, Gillis, Gillo, Gillot, Idzi, Ilian, Jileta, Jilez.

Prutezzione: A' u Medievu, Egidiu era pregatu per vince a pesta è altre epidemie, è a sterilità di e donne. In Inghilterra hè u santu patrone di i mendicanti è di i paralitichi.

Lupu hè natu accantu à Aurelianoru (l'attuale Orléans, dipartimentu di u Loiret) è ghjè mortu in Senone (l'attuale cità di Sens, dipartimentu di l'Yonne), l'annu 623.

Fattu vescu di Senone, era inviliatu è calunniatu da un abbate chì vulia u postu. Fù ancu esiliatu un certu tempu. Quand'ellu vultò, fù accoltu cù gran gioia da e pupulazioni, è dinù da a ciccona di a cattedrale.

Issa ciccona, quand'ella vedia à Lupu, si mettia à tintinnulà cù armunia è , quandu i nimichi si avvicinavanu da a cità, sbattagliulava à diruttera. U rè di a Burgogna a volse, è a si pigliò. Tandu si ammutulì è u rè ùn pobbe fà di menu chè di rimandalla in Senone.

Etimolugia: da u lat. "lupus" (lupu), in germanicu "wolf".

Nomi: Loup, Leu, Lowell, Lovel, Lupo, Lupu, Lope, Lobo, Wilf, Ulf, Uffe, Wolf, Wolfilo, Wölfel.

Prutezzione: San Lupu hà a riputazione di guarisce u mal cadutu, a pena in corpu, è di francà da a paura.

 

2.IX.

Santu Antuninu d'Appamea. Santu Ghjustu.

Antuninu era un scalpellinu chì campava à u seculu quartu. Un ghjornu ch'ellu passava versu Appamea, accantu à Antiocca, ghjunse in un paese duve a ghjente festighjava i so dii. Fece una predica senza riesce à cunverteli à a religione cristiana. Dui anni dopu, in cumpagnia di un rimitu chjamatu Teotimu, vultò in quellu paese è sciapponu tutti l'idduli.

Cuntentu di a so prova, Antuninu si n'andò in Appamea è, cù l'accunsentu di u vescu, principiò a custruzzione di una chjesa dedicata à a Santissima Trinità.

Una notte, quelli di u paese duv'ellu avia rotte e statue, ghjunsenu à inguantallu. L'anu tombu è tazzatu à pezzi. Avia tandu una vintina d'anni.

Etimolugia, casate è nomi: Cf u 17 ghjennaghju.

Paesi è cità: A' u seculu X, una parte di e so reliquie sò gjunte in Gallia. Una abbazia di l'attuale dipartimentu di l'Ariège ne avia qualchiduna. Quand'ellu si creò un paese intornu à l'abbazia, u chjamonu Appamea in l'onore di u santu. Hè l'attuale cità di Pamiers. - In Corsica, u 2 sittembre hè festa patrunale in Ucciani.

Ghjustu, un diacunu di Vienna, in l'attuale dipartimentu di l'Isère, fù elettu vescu di Lione versu l'annu 374.

In 381, participò à u Cunciliu d'Acquilea duv'ellu ritruvò u so grannde amicu, Santu Ambrosgiu.

Un ghjornu, in Lione, un scemu chì si era discioltu, si cuzzava à qual'ellu truvava à colpi di sciabbulate. Li si stipponu è, ellu, si rifugiò in una chjesa. U vescu si messe tramezu per ch'elli ùn u tombinu ma, malgradu e prighere di u vescu, l'anu massacratu. Dillusu, Ghjustu si ne và, imbarca, ghjunghje in Egittu è face u rimitu.

Dopu à a so morte, i Lionesi sò andati à racoglie e so osse è l'anu poste in una basilica.

Etimolugia, casate è nomi: Cf Ghjustinu (1u ghjugnu).

Paesi è cità: Lione.

 

3.IX.

Santu Gregoriu.

Gregoriu, natu in Roma versu l'annu 540, hè mortu in 604.

A' 32 anni, era statu fattu prefettu di Roma. Trè anni dopu, si facia frate è, di a so casa - un riccu casamentu - ne facia un cunventu.

A' 40 anni, era imbasciadore di a Santa Sede in Custantinopuli.

U 3 sitetmbre di l'annu 590 hè elettu papa. Hè unu di i più famosi trà quelli chì anu guvernatu a Santa Chjesa: hà rifurmatu a disciplina ecclesiastica, hà permessu à i frati di San Benedettu di multiplicassi, hà fattu a guerra à i scismatichi d'Africa è di Gallia, è hà mandatu à Santu Agustinu in Inghilterra per cunverte i Sassoni chì ci si eranu stabiliti dopu à a caduta di l'imperu rumanu. In Roma, avia creatu una scola di cantori chì fece u successu, in Italia è in altrò, di un novu cantu: u gregurianu.

Gregoriu hà lasciatu libri è lettere. Qualchiduna di isse lettere cuncernanu a Corsica. Parlanu di e dioccesi di Sagone, Aleria è Aiacciu, di un vescu di Tainum (chì purebbi esse Tavagna). Si sà, secondu isse lettere, chì a religione di unipochi di Corsi era sempre l'adurazione di u legnu è di a petra.

Etimolugia: da u gr. "Egrégorein" (chì ghjè svegliulu).

Casate: Gregori, Gregory;

Nomi: Gore, Gorius, Görres, Greagoir, Greer, Greg, Greger, Gregg, Gregh, Grégoire, Gregoor, Gregor, Grégori, Gregoria, Grégorine, Gregorio, Gregoriu, Grégorius, Grégory, Grels, Grigori, Grinia, Griogair, Grioghar, Jerina, Jorina, Joris.

Paesi è cità: Granata, Petershausen. In Corsica: u 3 sittembre hè festa patrunale in Grussettu Prugna duve, da u 1912, una dispensa di u papa li permette di celebrà a festa di San Cisariu.

Prutezzione: Gregoriu hè u santu patrone di i cantori, di i cantarini, di i musicanti è di i sculari.

 

 4.IX.

Santa Rusalia.

Rusalia serebbi a figliola di u duca di Sinibalde - un discendente du Carlumagnu - è a nipote di Ghjilormu Secondu, rè di Sicila.

A legenda dice chì, à 14 anni, era una bellissima zitella è chì a so anima era in periculu. Un ghjornu hà vistu a Madonna. E' a Madonna l'hà cunsigliatu di andassine sola in una furesta. Di notte tempu, parte da u castellu paternu, à crucifissu in manu. Un anghjulu, armatu cum'è un cavalieru, un altru vestutu da pelegrinu, a portanu in una grotta. Custì risicava di esse ritrova da i genitori, allora, qualchì mese dopu, l'anghjuli venenu à circalla è a cunducenu in cima di u monte Pelegrinu.

Rusalia campa 16 anni in una caverna, nutrita da l'anghjuli di l'Eucaristia. E so osse sò state ritrove dui seculi dopu, u 15 lugliu 1624, un annu chì curria a pesta. Da tandu, a grotta hè stata trasfurmata in cappella cù una statua stracquata di a santa, fatta da Gregoriu Tedeschi.

Etimolugia è nomi: Cf Rosa (23 agostu).

Paesi è cità: I Palermitani festighjeghjanu à Santa Rusalia duie volte l'annu: u 4 sittembre, anniversariu di a morte (?), è u 15 lugliu, anniversariu di a scuperta di e reliquie. U reliquiariu hè postu nantu à un carru altu quant'è e case, tiratu da 40 mule è carcu di musicanti. E prighere, i canti, l'evive, duranu cinque ghjorni.

Prutezzione: Santa Rusalia hè pregata in Sicilia quandu l'Etna minaccia.

 

5.IX.

Santa Raissa.

Raissa, figliola di un prete di Tamièh, nantu à a fruntiera di u desertu di Libia, hè morta in Alessandria d'Egittu versu l'annu 300. Avia una vintina d'anni.

Era l'epica di e persecuzioni di Dioclezianu. L'imperatore avia datu l'ordine di arrestà tutti i veschi è preti cristiani è di cundannà l'omi è e donne chì ricusavanu i sacrifizii à i dii pagani.

Raissa era andata à piglià l'acqua à a funtana quand'ella scontra una filarata di monachi è di vergine cunsacrate chì a pulizza purtava à u tribunale d'Alessandria. Cappia a giaretta è dumanda di fà parte di u gruppu. A scacciafughjeghjanu, ma ritorna stridendu ch'ella era cristiana è insultendu l'imperatore. E' cusì, hè ghjunta ancu ella davanti à u trinbunale. L'anu tagliatu u capu è a so carni sò state lampate in u focu.

 

6.IX.

Santa Eva. Santu Magnu.

Eva hè stata marturiata, ùn si sà nè induve, nè quandu.

In i tempi, ci era in Dreux, (dipartimentu di l'Eure-et-Loir), una croce di Sant'Eva. In u 1693, accantu à a croce, ci avianu fattu una cappella chì ghjè stata dirrotta à l'epica di a rivuluzione parigina di u 1789. Oghje, in a chjesa di San Petru, ci serebbinu e reliquie di Sant'Eva, vergine è martira.

Etimolugia: da l'ebreu "havvah" (surgente di vita).

Nomi: Eva, Evchen, Eve, Evi, Evie, Evita, Evka, Ewa, Ewe, Ieva.

U nome Eva, chì ghjera quellu di a prima donna, a cumpagna di Adamu sedutta da u serpu, era assai in usu in u Medievu. Hè statu rimessu à a moda à u seculu XIX per via di certe opere litterarie.

Magnu era un frate chì campava à u seculu VIII. Avia fattu un munasteru in a Suevia bavarese, à u pede di l'Alpe, per riceve i pelegrini chì andavanu in Roma o ne vultavanu.

Hè diventatu assai pupulare per via di u so bastone. Issu bastone era un maraviglia pè e culture: tumbava muscini, rughi, topi campagnoli è altri insetti è animalotti nucivi.

Bastoni, Magnu ne avia avutu parechji è parechje cumunità eranu fiere di avenne unu. Ne fecenu ancu copie chì avianu listesse virtù. Bastava à avè a fede.

A prova di a celebrità di Magnu, hè chì i Bollandisti, scrivendu i SAnti, l'anu risirvatu dodecimila filari. Anu dettu ch'ellu avia tombu u Dragu è ch'ellu hè mortu à l'età di 150 anni.

 

7.IX.

Santa Regina. Santu Clodoaldu.

Regina hè festighjata, almenu da l'annu 628, in Alise-Sainte-Reine, in u dipartimentu di a Côte-d'Or, paese chì serebbi l'Alesia di i Gallichi duve Vercingetorice si rese à Cesaru in 52 nanzu à Cristu.

E reliquie di Santa Regina sò in Flavigny-sur-Ozerain. I so pretesi scritti ùn sò chè una gattiva copia di l'Atti di Santa Margherita.

Etimolugia: da u lat. "regere" (guvernà).

Nomi: Gina, Gino, Ginu, Raina, Regan, Reggie, Regina, Régine, Regino, Reginu, Reginus, Régis, Reina, Reine, Reyba, Rina, Rioghnach.

Paesi è cità: Alise in Burgogna.

Clodoveu, rè di i Franchi, avia avutu trè figlioli maschji cù Cluttilda, una donna assai credente chì avia cunvertitu u maritu è ghjè stata santificata. Quand'ellu hè mortu, i figlioli si anu spartutu l'imperu.

Clodomiru hè statu tombu l'annu 524, battendusi contru à i Burgondi. Lasciava trè figlioli maschji di dece, sette è cinque anni chì sò stati dati in cura à a mammone. I so ziacci, chì pretendianu elli à a lascita, mandonu à dì à Cluttilda: "Issi trè zitelli, preferisci vedeli tosi o morti?" (tosi venia à dì tunsurati, chjusi in un cunventu).

Cluttilda ùn a li dete vinta, ma i più grandi sò stati tombi. U più chjucu, Clodoaldu, a si francò, chì l'avianu piattatu in un cunventu.

Cluttilda ebbe à scappà. In quantu à Clodoveu, un pobbe ricuperà u so regnu. Si hè fattu prete è ghjè mortu quand'ellu avia una quarantina d'anni, in u paese di Novigentu, diventatu a cità di Saint-Cloud, accantu à Parigi.

Prutezzione: in Francia, per via di u nome, Saint-Cloud hè u santu patrone di i fabricanti di chjodi. U preganu per guarì i brisgioli tupini.

 

8.IX.

A Natività di a Madonna.

A celebrazione di l'anniversariu di a nascita di Maria Vergine, hè d'urigine greca. Pè a Chjesa rumana, hè u papa Sergiu Primu (687-701) chì l'hà messa nantu à u calindariu.

In Corsica hè festa in Aligiani, Bonifaziu, Calvi, Casamacciuli, Cassanu, Ghisoni, Grossa, Lavasina, Loretu di Casinca, Mursiglia, Pancheraccia, Rusiu, è Santa Riparata di Balagna.

A' u cunventu di Alisgiani, ci hè una pittura nantu à legnu chì riprisenta a Madonna cù u Bambinu in collu è li dà duie chjarasgie. Purebbi esse l'opera di Sano di Pietro, un pittore di Siena natu in 1406, mortu in u 1481. Cum'ella hè ghjunta in Alisgiani, ùn si sà.

In Bonifaziu, ci era una cappella di a Madonna nantu à l'isula Lavezi. Oghje, a celebrazione si face à a Chjesa di a Trinità.

In Calvi, hè festa di a Madonna di a Serra, una chjesa à 6 km di a cità, nantu à una cresta. Ci hè una belle pittura, nantu à coghju, di a Madonna, arritta nantu à una meza luna.

In Casamacciuli, a statua di a Madonna - è a Madonna - hè detta simpliciamente: a Santa. A legenda dice chì issa statua vene da u cunventu di a Selva, in a furesta di u Falasorma. Era stata rigalata da un cumandante di battellu, dopu à una timpesta. U battellu era davanti à Galeria è u mare era furibondu. U cumandante pregò a Vergine Maria, Stella Maris. In celu si creò una stella spampillante è u mare si acchetò. U cunventu di a Selva ricevì u rigalu è pigliò u nome di Santa Maria di a Stella. Versu l'annu 1450, u cunventu fù ruvinatu da i Turchi. I frati messenu a statua nantu à una mula è partiinu in muntagna. A mula piantò duv'ella hè oghje a chjesa di Casamacciuli.

In Lavasina, ci hè una pittura di a Madonna chì purebbi esse di a scola di u Peruginu, mortu in u 1524. Hè un rigalu di i figlioli di Anghjulu Danese, di Brandu. Danese facia u cummerciu di u vinu trà a Corsica è Roma. Un ghjornu, un debitore sbaiuccatu u pagò cù issa pittura. Quandu, in Lavasina, sbucinonu a pittura, nentru ci eranu dinù i soldi. A' a Madonna di Lavasina sò attribuiti parechji miraculi.

In Loretu di Casinca, a chjesuccia di a Madonna ùn esiste più, ma a devuzione resta. U chrunistu Monteggiani conta chì, versu l'annu 1480, a Vergine Maria, Madre di Diu, facia i miraculi in paese. Guaria malatie d'ogni sorte. A rinomina si sparse è ghjunse ghjente, micca solu da Corsica, ma da Sardegna è da Terraferma.

In Pancheraccia, a chjesa di a Madonna hè in muntagna, sopra à u paese. L'8 sittembre, a ghjente face u pelegrinaggiu cù a speranza di un miraculu, cum'ellu hè accadutu l'annu 1852. Tandu, volsenu sustituì a vechja statua da una nova, in marmaru. A' l'inaugurazione, un omu fù guaritu da una malatia di pelle dopu à essesi lavatu à a surgente chì ghjè vicinu à a chjesa è avè passatu a nuttata à pregà.

 

9.IX.

U Beatu Alanu. A Beata Seraffina.

Alanu hè natu in Brettagna versu l'annu 1428. Era un frate di San Dumenicu. Hà fattu da prufessore in Parigi è po in Olanda duv'ellu hè mortu u 9 sittembre 1475. Predicadore famosu, hà spartu a divuzione di u paternostru in Francia, in Alemagna à in Olanda, creendu a cunfraterna di u Rosariu. In Francia hè chjamatu Alain-de-la-Roche è, in Olanda, Van den Clip.

Etimolugia: da un populu indoeutopeu: l'Alani chì, scacciati da i Uni, anu invasu a Gallia in cumpagnia di i Vandali è di u Suevi.

Nomi: Ailean, Alain, Alan, Alano, Alanu, Allan, Allen.

Seraffina era nata in e Marche taliane, à Urbino, versu l'annu 1432. Si chjamava Sueva Montefeltro è, per via di a mamma, era niputina di u papa Martinu Quintu. A' l'età di 16 anni, l'avianu maritata cù Alessandro Sforza, duca di Pesaro, un veduvu assai più vechju chè ella. Dopu à qualchì annu di matrimoniu, u duca a vulia rinnegà. Pruvò ancu à avvelenalla. A moglia avia 25 anni quand'ellu a fece chjude in u cunventu di Santa Chjara di Pesaro.

Hè certa chì u maritu di Sueva ùn era micca un santu, ma avia e so ragioni di falla chjude. Quand'ellu era in guerra, si sapia chì ella frequentava altri omi è, in cumbriccula cù a zia, Vittoria Colonna, è u signoru Malatesta di Rimini, avia almanaccatu di tumballu. I primi tempi ch'ella era in u cunventu, Alessandro Sforza avia messu sbirri armati davanti à a porta per ch'ella ùn scappi è avia pruvatu à falla parlà, ma ella ùn apria a bocca mancu per tazzalla.

Dopu à vinti mesi, Sueva si hè cunvertita è si hè fatta sora, pigliendu u nome di Seraffina. Stete chjusa vinti anni, preghendu è fendu penitenza. Hè morta à l'età di 46 anni. Da trè anni, l'avianu eletta abbatessa.

A cità di Pesaro, ne fece a so santa patrona è prutettrice. In u 1754, iu papa Benedettu XIV l'hà beatificata.

Etimolugia: da l'ebreu "saraph" (serpu brusgente).

Casate: Serafini.

Nomi: Fina, Fine, Seraffina, Seraffinu, Serafina, Serafino, Seraph, Seraphia, Séraphin, Seraphina, Séraphine, Seraphino, Seraphita.

 

10.IX.

Santu Adalbertu. Santa Pulcheria.

Adalbertu era un vescu d'Avranches (in l'attuale dipartimentu di a Manche) mortu versu l'annu 725.

In 709 avia fattu un oratoriu nantu à l'isulottu ch'elli chjamanu oghje "Le Mont-Saint-Michel", un scogliu graniticu di 50 metri d'altura è di 900 metri di giru.

L'oratoriu di Santu Adalbertu, occupatu da l'Inglesi, hè statu ruvinatu da "Philippe-Auguste" è rifattu in u 1023. Hè Luigi XI di Francia chì, in u 1469, ci hà messu a Cungregazione di San Michele.

Etimolugia: da u german. "adal" (nobile) è "Bert" (spampillulente).

Nomi: Adalbert, Adalberta, Adalberte, Adalberto, Adalbertu, Aubert, Aubertin (Cf Alibertu, 15 nuvembre).

Pulcheria, nata in Custantinopuli l'annu 399, era a figliola di l'imperatore Arcadiu, mortu in l'annu 408. A' l'età di 15 anni fù pruclamata "augusta" è tutrice di u fratellu, Teodosiu, chì avia dui anni di menu chè ella.

Teodosiu fù un pocu di bonu. A so sola qualità era di avè una bella scrittura. Passava u so tempu à cupià vechji scrittoghji. Chì guvernava era Pulcheria. Maritò u fratellu cù una bellissima puetessa attenese, ma quella u si lasciò chì ùn era una vita di campà cù un omu simile.

Teodosiu si innamurò di un castratu è li lasciò fà tutti i so capricci, in particulare di scaccià i veschi, è di sustituilli da preti chì negavanu a multiplicità di a natura di Ghjesù. Allora u papa, Leone Primu, scrisse à Pulcheria dumandenduli di salvà l'ortodussia.

Pulcheria scacciò u castratu, si maritò cù u generale Marcianu è u messe à a testa di l'imperu, pattu è cundizione ch'ellu rispettessi a sò virginità. Quellu cunvucò un cunciliu in Calcedonia per cundannà l'eresie, è difese a cità contru à e truppe d'Attila chì ebbenu à cambià strada.

 

11.IX.

U Beatu Ghjuvan Gabriellu.

Ghjuvan Gabriellu hè natu in Mongesty, dipartimentu di u Lot, in u 1802, figliolu di un lavuratore è di una santa donna. Avia dui fratelli è duie surelle chì, cum'è ellu, fecenu parte di a famiglia spirituale di San Vincensiu di Paulu. Ellu, à 18 anni, hè Lazaristu in Montalbanu è, à 23 anni, prete in Parigi.

A' 33 anni, parte pè a China. In e muntagne di a China cintrale, dumandava à Diu, ogni matina, di fallu more martiru pè a fede cristiana. Issa grazia li fù cuncessa. Hè statu arrestatu è crucifissatu. Prima, l'avianu fattu soffre un annu, sfracellenduli i pedi in un morsu, bastunendulu à colpi di bambù, sfrisgenduli a faccia staffilendulu di currighjolu, fenduli beie sangue di cane, è malminenduli e so vergogne. Eranu una vintina di Cristiani à esse arrestati attempu. I dui terzi rinnegonu a so fede. Ellu ricusò è fù tombu, à calci in corpu, liatu nantu à una croce, l'11 sittembre 1840.

Etimolugia, casate è nomi: Cf u 29 sittembre.

Paesi è cità: in Zigliara, l'11 sittembre festighjeghjanu u santu nome di Maria Vergine.

 

12.IX.

Santu Pullinariu.

Pullinariu Franco hè natu in Spagna, in Aquilar de'Campo, una cità di a Vechja Castiglia, versu l'annu 1570. Duttore di l'Università di Salamanca, si hè fattu frate franciscanu à 30 anni è ghjè partutu pè e Filippine è u Giappone. U 12 sittembre 1622, dopu à cinque anni di prigiunia, hè statu brusgiatu vivu.

U so martiriu hè situatu à u principiu di una perioda di dui seculi è mezu, da u 1603 à u 1867, quandu i guvernanti chjusenu l'entrata di u Giappone à i strangeri per assicurà à i paisani benistà è pace. In u 1614, à u Giappone, ci era un mezu milione di catolichi. Ghjè issu annu chì a religione ghjunghjiticcia fù interdetta è chì e so chjese funu distrutte. I missiunarii ebbenu ordine di andassine. Parechji anu rinnegatu a so fede, ma ci fù dinù millaie di martiri. Piu IX, papa da u 1846 à u 1878, ne hà beatificatu 205. Pullinariu hè unu di quessi.

Etimolugia: da u gr. "apellos" (chì chjama a creazione). Apollu hè u diu grecu di a luce, di l'arte è di a divinazione.

Nomi: Apollinaire, Apollinaria, Apollinaris, Apollinariu, Apollonius, Apollos, Polly, Pullinaria, Pullinariu.

 

13.IX.

Santu Vineriu. Santu Ghjuvanni Crisostomu.

Vineriu era cuntempuraneu di San Gregoriu Magnu, papa da l'annu 590 à l'annu 604. Campava in l'isula taliana "del Tino", à l'entrata di u golfu di a Spezia. Era venutu in Corsica è ci era statu quaranta ghjorni, fendu u rimitu mezu à bestie salvatiche. Tutti i ghjorni, un corbu li purtava da manghjà: pane è carne vaccina. Dicenu ch'ellu risuscitò un marcante chì si era annegatu è un giovanu mortu da un a petrata.

L'annu 1050, i frati di San Benedettu fecenu un munasteru nantu à l'isula di u Tinu. U stabilimentu ebbe lascite da parechji conti è signori corsi. E' cusì fù pruprietariu di sei o sette chjese:

. quelle di Santu Niculaiu è di Santu Ambrosgiu nantu à e terre di Lumiu, pieve di Aregnu;

. quelle di San Gavinu, San Marcellu è San Tumasgiu, nantu à e terre di Belgudè, pieve di Tuani;

. quella di San Quilicu, in Bisinchi, pieve di Rustinu;

. è forse una chjesa San Quilicu nantu à u territoriu di Frassu, vicinu à Aiacciu.

Ghjuvanni Crisostomu era natu in Antiocca versu l'annu 349, figliolu di un ufficiale superiore chì morse pocu tempu dopu. A mamma, chì l'avia allevatu in a religione cristiana morse quandu u figliolu avia 23 anni. Tandu, Ghjuvanni si n'andò à fà u rimitu nantu à e muntagne. Ci stete sette anni è si ammalò. Vultatu in Antiocca, fù fattu diacunu è po prete.

L'annu 398, l'imperatrice Eudossia u fece vene in Custantinopuli per sustituì u patriarca chì venia di more. Fù assai severu pè u so cleru chì avia poca moralità.

L'anu cugnumatu Crisostomu, chì vole dì Bocca d'Oru per via di a so eloquenza. Hè u più grande predicadore di a Chjesa d'Oriente. Da ogni locu, venianu à stallu à sente. Dinunziava i scandali di a Corte imperiale è di i ricchi, è pigliava a pretesa di i poveri secondu e regule di u Vangellu.

Eudossia, chì ùn l'intendia cusì, fece vene u patriarca di Alessandria per ghjudicallu. Quellu adunì un cunciliu chì u cundannò à spatriassi. Stete quattru anni in Turchia è po i suldati ghjunsenu à pigliallu per purtallu in l'alte muntagne mezu à i barbari. Morse per istrada. Avia 58 anni.

Di San Ghjuvanni Crisostomu, restanu 600 discorsi è prediche, veri capi d'opera chì parenu scritti à i ghjorni d'oghje.

Etimolugia, casate è nomi: Cf u 27 dicembre.

Paesi è cità: Roma (27 ghjennaghju), Parigi (18 sittembre), Grecia (13 nuvembre).

 

14.IX.

Esaltazione di a Santa Croce (o, cum'elli dicenu oghje: a Croce gluriosa).

Esaltà, vole dì: mette in altu, glurificà. Secondu u Vangellu di San Ghjuvanni, Ghjesù disse: "Quand'è vo averete innalzatu u Figliolu di l'Omu, allora saperete quale sò". E' po: "Cum'è Mosè alzò u serpu in u desertu, cunvene chì u Figliolu di l'Omu sia innalzatu". E' dinù: "Eiu, quandu seraghju alzatu sopra à a terra, tireraghju à mè tutti l'omi".

Secondu certi, l'esaltazione di a Santa Croce data da u seculu settimu. Ramenta a vittoria di l'imperatore bizantinu Eracliu nantu à u rè di Persia, Cosrou Secondu. In l'annu 629, i Cristiani riturnonu in Ghjerusalemme purtendu a vera Croce di Cristu, chì Cosrou a si avia pigliata.

D'altri dicenu chì l'esaltazione di a Santa Croce usava nanzu, à l'epica di Custantinu, dunque in principiu di u seculu quartu.

In quasi tutte e chjese di Corsica, ci hè un crucifissu sopra à l'altare maggiore. Una prighera racolta da prete Casta in Azilonu dice:

Entru in chjesa
è vò à Cristu
ch sù la croce si ne stà.
Malgradu u mo peccatu
eiu vogliu adurà
Cristu in celu
Papa in terra.
Eiu mi calgu
è basgiu a terra.
Santa Croce gluriosa
Duve Cristu fù inchjudatu
è di morte fù penosu
è per noi scumintatu.
Una vita virtuosa
ci difendi di u peccatu
vita eterna è gluriosa
facci alegru è cunsulatu.

Una altra prighera dice:

Quandu a Croce s'alzò
tuttu u mondu si alluminò.

Nanzu, in Corsica, ci era, da più à menu, 200 cunfraterne. 125 o più eranu dedicate à a Santa Croce.

Paesi è cità: Nuvella.

 

15.IX.

Maria Vergine Addulurata. U Beatu Orlandu di i Medici.

A festa di Maria Vergine Addulurata (o di a Madonna di i Sette dulori) hè celebrata da l'annu 1423. In u 1727, l'avianu messa u venneri dopu à a dumenica di a Passione. A' parte da u 1734, era celebrata a terza dumenica di sittembre. Avà e fissa: u 15 sittembre.

Si tratta di ramintà i dulori di a mamma di Ghjesù à u pede di a Croce è, di una manera generale, e suffranze di i Cristiani, chì a Passione di Ghjesù ùn hè ancu finita.

Issa celebrazione hè stata intrudutta in Corsica da a Cungregazione di i Servi di Maria, creata, in l'isula, l'annu 1252, dunque trenta anni dopu à ch'ella sia stata creata in Firenze. I Servi di Maria anu avutu sei cunventi. U vicariu generale stava in Mursiglia duv'elli cunservanu una statua di a Madonna à i ferri.

Orlandu di i Medici hè natu in Milanu versu l'annu 1330. A' l'età di 30 anni, avia decisu di ùn più dì una parulla è si era ritiratu in e fureste di a regione di Borgu San Dunninu, vicinu à Parma.

Vintsei anni dopu, a marchesa Antonia Pallavicini, chì caccighjava cù i so falcunnieri, hà trovu un vechju, stracquatu in terra, fermu cum'è un cadaveru. Era Orlandu muribondu. Sinu à tandu, avia campatu l'estate d'erbe è frutti, l'invernu demandendu a carità. Certi, l'avianu vistu stà ore è ore nantu à un pede, e braccie à l'aria, fighjendu u sole.

A marchesa u volse fà purtà in u so castellu di u Borgu. Ellu fece segnu di nò. Allora li disse chì ùn pudia micca more senza cunfessione è tandu si lasciò cumbulì. A' u frate chì u cunfessava, disse ch'ellu si era ritiratu da u mondu per ùn peccà. A marchesa li dete un brodu di gallina, u frate li fece una croce cù l'oliu santu, è Orlandu campò torna quattru settimane. Nanzu di more, hà vistu ghjunghje à San Michele è unipochi d'anghjuli per purtassilu in Paradisu. Era u 15 sittembre 1386.

Etimolugia: da u germanicu "brod" (gloria) è "land" (paese).

Casate: Orlandi, Orlandetti, Orlandini, Orlanducci.

Nomi: Orlanda, Orlando, Orlandu, Rodhlann, Roeland, Roelandje, Roland, Rolanda, Rolande, Rolando, Rolands, Roldan, Roldàn, Roldo, Rolle, Rollin, Rollins, Rolly, Rowe, Rowland, Rowly, Rulande, Rulant.

Litteratura: La chanson de Roland (XIIe s.). Ariosto: Orlando furioso (1532).

 

16.IX.

Santu Ciprianu.

Pè i catolichi, Ciprianu hè u santu di l'Africa di u Nordu. Era natu in Cartagine, in Tunisia, versu l'annu 200, da genitori pagani. Era avucatu è campava cum'elli campavanu i vechji figli di l'epica. A' 46 anni, si era fattu cristianu. Hà datu ciò ch'ellu avia à i poveri è hà trovu pace è felicità. Dui anni dopu, i Cristiani di Cartagine l'anu sceltu cum'è vescu ma, in 250, 253, 257, fù cuntrariatu da e persecuzioni. Una prima volta, Ciprianu si piattò. Dopu, mandatu in esiliu, scrive a so "Esortazione à u martiriu". L'annu dopu, u novu proconsule u cundanna à morte. Hè statu scapatu u 14 sittembre di l'annu 258.

Etimolugia: da u gr."kupris" (uriginariu di l'isula di Cipru).

Casate: Cipriani.

Nomi: Cipriana, Cipriano, Ciprianu, Cyprian, Cyprien, Cyprienne, Cyprille, Cypris.

Paesi è cità: Africa di u Nordu, Compiègne. In Corsica: Mursiglia, a Mazzola, u Quercitellu. Ci eranu chjese in Lentu, Evisa, Zalana, Curbara, Lecci. In Curbara, à 4 km di u paese, à un km da u mare, una cappella hè dedicata à San Ciprianu è à San Corneliu, papa (253-255), festighjati inseme u 16 sittembre. Issu ghjornu, u priore di a cunfraterna ricevia a so mantelleta rossa ricamata d'oru.

Detti è pruverbii: In Corsica, Ciprianu hè a persunificazione di u sonnu. Quandu à qualchidunu li chjappa a penciula, si dice: "Avà hè ghjuntu Ciprianu".

 

17.IX.

Santa Culomba. Santu Rubertu Bellarmini.

Culomba hè una martira spagnola, nata in Cordoba. Hè stata scapata da i Mori l'annu 853.

Etimolugia: da u lat. "columba" (culombu).

Casate: Colombani, Colombini, Colombo.

Nomi: Coline, Collie, Colly, Colomba, Colomban, Colombat, Colombe, Colombi, Colombine, Colombo, Columba, Coulombe, Culomba, Culombu.

Litteratura: Prosper Mérimée: "Colomba" (1840). Culumbina, u persunagiu di a Cumedia taliana, l'amica di Pierrottu o d'Arlicchinu, hè statu creatu à a fine di u seculu XVII. Hè una giuvanotta maligna, spiritosa, vistuta di biancu cù un scuzzale verde, è una scufia.

Rubertu Bellarmini, duttore di a Santa Chjesa, natu in Toscana, à Montepulciano, in u 1452, hè mortu in Roma u 17 sittembre 1621. Nipote di papa, si era fattu ghjesuitu è ghjè statu prufessore à u cullegiu di Roma da u 1576 à u 1587.

Fattu cardinale à 57 anni, ebbe u cuntrollu di e Cungregazioni rumane, for di trè anni quand'ellu fù arcivescu di Cappua.

In u 1605, à a morte di Clemente VIIImu, issu sapiente serebbi statu elettu papa sì u rè di Spagna ùn si era oppostu.

S'elli l'avianu statu à sente, Galileu Galilei ùn serebbi micca statu dinunziatu cum'è ereticu da a Corte di Roma.

Etimolugia: da u germ. "hrod" (gloria) è "bert" (spampillante).

Casate: Roberti, Ruberti.

Nomi: Bob, Bobbette, Bobbie, Bobby, Prechtel, Rab, Rabbie, Riobart, Rob, Roba, Robb, Robbert, Robbie, Robby, Robel, Röbeli, Robert, Roberta, Roberte, Robertina, Robertine, Roberto, Roberts, Robertson, Röbi, Robin, Robina, Robine, Robinette, Robinia, Robinson, Roby, Roparz, Roperz, Roppel, Roubert, Ruberta, Rubertu, Rupert, Ruperta, Rüpli, Ruprecht.

Prutezzione: Rubertu hè u santu patrone di l'insignanti.

 

18.IX.

Santa Ariana. Santu Ghjiseppu di Copertino.

Ariana serebbi stata una giovana schjava di l'Asia Minore chì campava à u seculu terzu. A mandonu in tribunale, ma fù prutetta da a folla.

Etimolugia: forse da u gr. "ari" (assai) è "agnè" (pura, casta). Ramintemu chì Ariana, figliola di Minosse, rè di a Creta, è surella di Fedra, si era innamurata di Teseu è li avia datu un filu per sorte da u labirintu, u famosu filu d'Ariana. Teseu a fece fughje è po a si lasciò in un'isula. A' chì dice ch'ella si hè lampata in mare da l'addisperu, à chì dice ch'ella si hè lasciata cunsulà da Diunizossu.

Nomi: Ariadne, Ariana, Ariane, Arianna.

Ghjiseppu, di Copertino, in e Puglie taliane, hè mortu in Ancona u 18 sittembre 1663.

Era un zitellu poveru, sgalabatu, mezu chè simpliciottu. Si vulia fà frate è andava da un cunventu à l'altru, sempre riggettatu. Finalmente, i Franciscani di Grottello u si anu tenutu per curà a mula di u cunventu. Custì si messe à studià è, di marzu 1628, era fattu prete.

Dui anni è mezu dopu, i frati di Grottello funu testimoni di un fenomenu strasurdinariu di levitazione: Ghjiseppu vulava. Paria un ocellu. Stava stonde cum'è appiccatu à a volta di a chjesa o à u suffittu di u refettoriu. Fora facia listessu. E' u miraculu si pruducia aspessu. Millaie è millaie di persone, imbasciadori, è ancu u rè di Polonia, l'averebbinu vistu in aria. U duca di Sassonia, chì ghjera luteranu, si hè cunvertitu.

Da u 1636 à u 1639, hè statu esaminatu da l'Inquisizione chì hà ricunnusciutu u fattu.

Ghjiseppu hà campatu torna 24 anni, suffrendu di esse suspettatu di burlà a ghjente, cambiendu aspessu di cunventu per francassi da a curiosità di e folle.

Etimolugia, casate è nomi: Cf u 19 marzu.

Prutezzione: San Ghjiseppu di Copertino hà a riputazione di aiutà i studianti quand'elli passanu un esame.

 

19.IX.

Santa Emilia. Santu Gennaru.

Emilia era nata u 6 sittembre 1787, in u dipartimentu di l'Aveyron, vicinu à Rodez. In u 1820, hà creatu, à Villefranche-de-Rouergue, a Cungregazione di e Sore di a Santa Famiglia. In issa Cungregazione, certe sore eranu rinchjuse è si occupavanu di l'educazione di e zitelle povere, l'altre surtianu per andà à curà i malati.

In u so cunventu, Emilia hà suffertu più di vinti anni per via ch'ella avia a paura di perde a fede è ghjera à l'addisperu, senza cuntà d'altre tentazioni. Mai fece cunnosce e so suffrenze. L'ultimi anni hà ritrovu a pace di Diu. Hè morta à 75 anni, u 19 sittembre 1852. Tandu, a so Cungregazione avia digià una quarantina di munasteri, stabiliti in parechji paesi.

Etimolugia: da u lat. "Aemilius", nome di una famiglia rumana.

Casate: Emili, Emilii, Emilj, Emily.

Nomi: Aemilia, Amilius, Amily, Emele, Emeline, Emelius, Emil, Emilda, Emile, Emilia, Emiliaan, Emiliane, Emiliaan, Emilie, Emilien, Emilienne, Emilio, Emils, Eily, Emlyn, Emma, Emmeline, Mees, Mel, Melia, Meliocha, Migeli, Mil, Milia, Miliu, Millian, Milly, Milou, Miloud.

Gennaru, un santu vescu di Benevento, accantu à Napuli, campava à u seculu quartu. E so reliquie sò in Napuli da almenu l'annu 432. Anu francatu a cità da a pesta in l'annu 1497 è l'anu prutetta da l'erruzzioni di u Vesuviu in l'anni 1631, 1698, 1767, è 1779.

U miraculu di San Gennaru hè celebre in u mondu. Da u 1389, trè volte à l'annu, di maghju, di sittembre, è u 16 dicembre, u sangue caghjatu di u santu, cunservatu in duie ampulle, diventa liquidu è si mette à bolle. U pesu cala è u vulume cresce. In u 1728, Montesquieu assistì duie volte à issa liquefazione. Hà scrittu: "Je puis déclarer que le miracle de Saint Janvier n'est point une supercherie; les prêtres sont de bonne foi".

Per avà ùn anu pussutu dà nisuna spiegazione scientifica.
Napulitani campanu cù u tremu chì - cusì dicenu - si u miraculu ùn si pruducissi più, a cità serebbi distrutta.

Etimolugia: da u lat. "januarius" (di ghjennaghju).

Nom: Gennara, Gennaro, Gennaru, Ghjennaru, Janvier, Javiera, Javière.

 

20.IX.

Santu Stacchiu.

Stacchiu era un paganu di u seculu primu, anzianu generale reputatu cum'è u più grande guerrieru di l'epica.

Un ghjornu, à caccia, si stippava à un cervu quandu u cervu si volta, una croce mezu à e corne, è u cunverte. Attempu, a moglia riceve a visita di un anghjulu è, ancu ella si face cristiana. A notte, cunvertenu i dui figlioli è, u lindumane, si facenu battizà tutti è quattru.

Dece mesi dopu, affacca un cervu per dì à Stacchiu chì u demoniu avia da scatinassi. In una sittimana, i so schjavi morenu da a pesta, i so animali morenu ùn si sà di chè, i banditi viotanu u castellu è u brusgianu, i pirati si piglianu à ellu, a moglia è i figlioli.

Stacchiu diventa zappadore, a moglia, serva in una osteria, i figlioli, garzoni in una buttega. E' dece anni passanu.

Quandu i Parti invadenu l'imperu, l'imperatore Traianu fece ricircà l'anzianu generale Stacchiu. E' u trovanu. E' Stacchiu scaccia i nimichi.

Ristava à fistighjà a vittoria participendu à i sacrifizii. Cum'ellu ricusa, u mettenu, cù a moglia è i figlioli, in un toru di bronzu infiaratu. Morenu, ma senza soffre. Da fora, i sentianu cantà e lode di u Signore.

Etimolugia: da u gr. "eustachios" (fruttiferu, fecondu).

Nomi:Eustace, Eustache, Eustacia, Eustasius, Eustatius, Eustazio, Stacchia, Stacchiu, Stacey, Stacie, Stazio.

Paesi è cità: Una chjesa in Roma è una chjesa in Parigi cunservanu una parte di e reliquie di Santu Stacchiu. In Corsica, una chjesa Santu Stacchiu esistia in Salice, una in u Cruzinu, un'altra in Sermanu, forse una in Pitrettu Bicchisgià.

Prutezzione: Stacchiu hè u santu patrone di i cacciadori. U preganu dinù contru à l'incendii, è per francassi da u focu eternu.

 

21.IX.

Santu Matteu.

Matteu era publicanu in Galilea, vene à dì percettore è duganeru à contu di i Rumani, quand'ellu fù chjamatu da Ghjesù chì ne fece u so apostulu.

Pè i Farisei chì seguitavanu à Ghjesù, i publicani eranu tutti ladri, è dissenu: "Perchè u nostru Maestru si mette à tavula cù i publicani è i peccadori?". E' Ghjesù disse: "Un' sò micca quelli chì sò in salute, ma i malati, chì anu bisognu di un bon medicu".

Versu l'annu 60, Matteu hà scrittu un Vangellu per fà a prova chì Ghjesù hà realizatu tutte e prufezie di l'Anzianu Testamentu.

Un' si sà duv'ellu hè mortu. Forse in Ettiopia.

Etimolugia: da l'ebreu "mattaî" (donu, rigalu) è "Yah" (Iahvè).

Casate: Mattei, Matteoli, Matteacci, Matteazzi, Matteotti, Massei, Massoni.

In u 1981, in Corsica, a casata Mattei venia à u quartu rangu dopu à Casanova, Albertini è Luciani. 14% eranu di Bastia, 9% di l'Altu di Casacconi, 7% di Fiumaltu d'Ampugnani, 6% di i Dui Soru.

Nomi: Debus, Deipes, Hess, Hias, Höss, Maciej, Mades, Mat, Mata, Mateo, Mateusz, Matfei, Mathias, Mathieu, Mathijs, Mathis, Matiaz, Matt, Mattalus, Mattea, Matteia, Matteiu, Matteo, Matteu, Matthaeus, Matthäus, Mattheus, Matthew, Matthias, Matthieu, Matti, Mattias, Matvei, Màtyàs, Mazé, Teus, Tewis, Theiss, Thiess, Tjeu, Zoïg.

Pesi è cità: Oriente (9 agostu). In Corsica: Castellu di Rustinu.

Prutezzione: Matteu hè u santu patrone di i percettori è di i duganeri.

 

22.IX.

Santu Mauriziu.

Mauriziu era capu di a Legione Tebea à u serviziu di Roma. Quandu, l'annu 286, Massimianu diventò imperatore d'Occidente, u fece vene d'Egittu cù i so suldati per sterminà i Cristiani. Peghju ùn pudia incappà. Tantu Mauriziu chè i so 6000 omi eranu cristiani ancu elli, è l'imperatore i fece massacrà.

Quessa hè a legenda chì a dice. U veru hè forse chì Mauriziu è qualchì cumpagnu sò stati tombi per avè ricusatu di participà à una ceremonia pagana. U fattu si stà chì, un seculu dopu, anu fattu una basilica nantu à u locu duv'ellu sò stati tombi è chì, versu l'annu 520, Sigismondu, rè di i Burgondi, ci hà fattu un munasteru chì esiste sempre è chì ghjè à l'urigine di a creazione di un paese sguizzeru, quellu di Santu Mauriziu.

Etimolugia, casate è nomi: Cf Mauru (15 ghjennaghju).

Paesi è cità: Pinerelo, Fossombrone, Lucerna, Magdeburgu, , Angers, Appenzel, Le Havre, Savoia.

Prutezzione: Mauriziu hè u santu patrone di i tinturai è u preganu pè a malatia di a gotta.

 

23.IX.

Santa Tecula.

Per seculi è seculi, quandu i preti amministravanu l'oliu santu à i muribondi, dicianu ista prighera: "O Signore, voi chì avite liberatu à Santa Tecula da trè turmenti crudeli, abbiete a buntà di liberà ista anima è di dalli l'eterna felicità".

Ghjè un falzu racontu di a vita di San Paulu chì ghjè à l'urigine di issa prighera è di a pupularità di Santa Tecula.

Dice chì Tecula era una giovana Turca, bellissima zitella, cunvertita da San Paulu. Dopu, u seguitava daperttuttu. U so impegnu à sparghje u Vangellu, a cundannava à esse marturiata. Per miraculu si francò di trè turmenti preparati da u diavule:

. In l'anfiteatru, un leone ricusa di manghjassila;

. Un dilluviu spinghje u fucarolu chì l'avia da cunsumà;

. è una foca, pronta à ingollesila, hè tunata.

Dopu à a morte di San Paulu, Tecula campò torna un mezu seculu. Stava in una grotta è risanava i malati chì venianu à truvalla. Avia 90 annai quandu i medichi, chì ùn avianu più nimu à curà, vensenu à pigliallasi per purtalla à u guvernatore. Ella si precipitò contru à un scogliu chì si aprì, entrò nentru, è a sbaffatura si richjuse.

 

24.IX.

A Madonna di a Mercè.

I Spagnoli si sò battuti più di 400 anni, da u 1085 à u 1492, per scaccià i Mauri. In issa guerra, i Cristiani fatti prigiuneri, o si facianu Musulmani, è ghjeranu ben trattati, o eranu venduti à l'Arabi di l'Africa. Per rivede a so patria è i soi, i schjavi, o i so parenti, devianu pagà un riscattu è micca tutti a pudianu fà.

Un ghjornu, a Madonna apparisce à Petru di Nola è li dice: "Bisogna à succorre issi disgraziati. Eiu ti aghjuteraghju". E' cusì hè nata a Cungregazione di a Mercè, o di a Redenzione, o di u Riscattu di i Schjavi. A' i trè voti abituali: ubedienza, puvertà è castità, i frati di a Mercè ne aghjunghjianu un altru: quellu di barattassi cù i prigiuneri s'ella ùn ci era manera di fà altrimente.

A festa di a Madonna di a Mercè hè stata istituita in u 1218 per ringrazià a Vergine Maria di avè resu a libertà à i schjavi. U papa Nucenziu XII (1691-1700) hà stesu issa celebrazione à tutta a Cristianità per ramintà chì a Madonna hè a mamma di tutti è ch'ella pò liberacci da e catene chè no avimu addossu.

 

25.IX.

Santu Firminu.

A' i primi tempi di u Cristianisimu, in a cità spagnola di Pamplona ci stava u senatore Firmu, a moglia, è u figliolu, Firminu. Un ghjornu, andendu à u tempiu di Giove, scontranu u prete Onestu chì sparluchjava contru à i dii pagani.

"E' chì ci vulite sustituì?" disse Firmu.

Onestu li spiega a duttrina cristiana secondu Satturninu, unu di i settanta duscepuli di Ghjesù.

- "E' quale hè issu Saturninu?" dumanda Firmu.

A settimana dopu, Saturninu ghjunghje in Pamplona, cunverte 40.000 persone in trè ghjorni, batteza à Firmu, a moglia è u figliolu, è dice à Onestu di occupassi di l'educazione di Firminu.

A' 17 anni, Firminu era diventatu un bon predicadore. A' 24, era vescu. Franca i Pirenei, è evangelizeghja l'Aquitania, l'Alvergna è u Belveddese, ma i guvernatori u mettenu in prigiò è u facenu tumbà, fendu corre a vuciata ch'ellu era mortu di un attaccu.

Quessa hè a legenda di San Firminu, scritta à u seculku IX è riprudutta nantu à un purtone di a cattedrale di Amiens, ma i storichi pensanu ch'ellu era u primu vescu di issa cità, marturiatu à u seculu quartu.

Etimolugia: da u lat. "firmus" (fermu in a so fede).

Nomi: Fermin, Fermine, Firmin, Firminan, Firminien, Firminienne, Firmino, Firminu, Firmo, Firmu, Firmus, Frémin.

Paesi è cità: Pamplona, Amiens, Beauvais, Navarra.

 

26.IX.

I Santi Cosimu è Damianu.

Secondu u Vangellu di San Matteu, Ghjesù disse à l'Apostuli: "Risanate l'infermi, nettate i leparosi, risuscitate i morti, cacciate i demonii: u donu l'avite ricevutu, in donu datelu".

Cusì fecenu Cosimu è Damianu, dui fratelli medichi venuti d'Arabia in Siria per curà i malati senza fassi pagà. L'avianu cugnumati "l'Anargiri", ciò chì vole dì: nimichi di u soldu.

Un' si cuntentavanu micca di risanà u corpu; curavanu dinù e malatie di l'anima, cunvertiscendu i peccadori, scacciendu l'idee fisse, dendu a speranza à i pessimisti, a gioia à i malinconichi.

Una matrona rumana, ch'elli avianu guaritu, si era messa in l'idea chì, postu ch'elli ùn vulianu paga, hè chì ùn eranu sicuri chì u male ùn rivenga. Per cunvincela, Cosimu accettò a paga. Ancu appena, fù una nimicizia trà i dui fratelli.

U guvernatore, scuntentu di vedeli attirà e folle mentre chì i tempii si viutavanu, i fece marturià è scapà.

Cosimu.

Etimolugia: da u gr. "kosmos" (universu, armunia di l'universu).

Casate: Cosimi.

Nomi: Come, Côme, Cosima, Cosimette, Cosimu, Cosma, Cosme, Cosmo.

Damianu.

Etimolugia: da u gr. "Damia", nome di una divinità.

Casate: Damiani.

Nomi:Dami, Damia, Damian, Damiana, Damiane,Damiao, Damianu, Damianus, Damien, Damienne, Damiette, Damioen, Damy.

Cosimu è Damianu.

Paesi è cità: Praga, Essen, Salamanca. In Corsica: Ambiegna, Chiliani, Feringule, Frassu, San Damianu. Issi santi anu avutu 14 chjese. Citemu: Felce d'Alisgiani, u Monte, Nuvella, Sartè, Sorbu Ocagananu, forse dinù u Viscuvatu è u Pratu.

Prutezzione: Cosimu è Damianu sò i santi patroni di i medichi, i chirusichi, è e mammane. Cosimu u preganu pè a malatia di u lattime (in francese: la gourme, o l'impédigo).

Litteratura: uni SAnti Cosimu è Damianu hè stata publicata in u 1966 da u duttore Marcu Aureliu Ceccaldi.

 

27.IX.

Santu Vincensiu de'Pauli.

Vincensiu hè natu in u 1581 à Pouy, vicinu à Dax, in e Landes.

Da zitellu facia u pastore, un travagliu chì li piacia pocu, è decise di fassi una bella situazione. Scunvince u babbu chì vende dui boi per mandallu à a scola. E' diventa prete, ùn avendu ancu 20 anni. Soga si era fattu più vechju ch'ellu ùn era.

Dicenu chì, andendu da Marseglia à Narbona, si hè fattu piglià da i pirati barbareschi. Purtatu schjavu in Tunisi, ci serebbi statu dui anni, fendu cunversioni à a fede catolica. Ma forse chì issa fola hè ellu chì l'hà inventata per fassi bellu.

A' l'età di 26 anni hè in Roma. Inbavachjeghja un altu funziunariu di u Vaticanu è, in u 1609, u papa u manda in Parigi cù una missione secreta per Arrigu Quartu. Custì, piace à u rè di Francia chì ne face u cappellanu di a so anziana moglia: Marguerite de Valois. Ista volta, l'avia a bella situazione ch'ellu bramava da quand'ellu era zitellu.

Dui anni dopu, cambia di cundotta, si mette à frequentà i poveri, i disgraziati, i sbandunati, è ùn pensa più chè à elli è à u Signore. "Monsieur Vincent" - cum'elli u chjamavanu - diventa u prete u più pupulare di Parigi.

In u 1625, face a Cungregazione di i Preti di a Missione chjamati, più tardi, Lazaristi, incaricati di predicà è di furmà altri preti.

A' 43 anni, avia scontru à Louise de Marillac, una donna addisperata di avè persu u maritu è u figliolu. Inseme, si mettenu à u serviziu di i galeriani, di i mezi tonti, di i vechji malati è di i zitelli abbandunati. Per aiutalli, creanu, in u 1633, a Cungregazione di e Sore di a Carità.

Vincensiu hè mortu in Parigi, à 79 anni, u 27 sittembre 1660. Hè statu beatificatu in u 1729 è canunizatu ottu anni dopu.

Etimolugia: da u lat. "vincentius" (chì vince).

Casate: Vincensini, Vincenti, Vincentelli.

Nomi: Cencio, Cente, Centina, Centinus, Kenia, Nencio, Sansan, Sent, Uinsionn, Vicencia, Vicencio, Vicenta, Vicente, Vicentius, Vicenza, Vicenzo, Vikacha, Vikenti, Vikentia, Vin, Vince, Vincensia, Vincensiu, Vincent, Vincente, Vincentius, Vincenz, Vinciane, Vinzene, Zenz, Zenzel.

Paesi è cità: Sartè, Ambiegna, San Daminau, Feringule, Felce d'Alisgiani.

 

28.IX.

Santu Venceslau.

Venceslau, figliolu di u duca di Boemia, in Ceccoslovacchia, hè natu versu l'annu 907. Avia un fratellu più giovanu chè ellu di dui anni. Quand'ellu hà 13 anni, u duca more è a regenza tocca à a moglia per cinque anni. Venceslau hè allevatu da a mammone da a parte di u babbu.

A' l'epica, u Cristianisimu principiava à sparghjesi in Boemia. Venceslau è a mammona avianu accettatu a nova religione è ghjeranu mal visti da a mamma è u fratellu.

A' l'età di 18 anni, Venceslau hè messu nantu à tronu di u babbu. Custruisce chjese, face rivene i preti esiliati, apre e fruntiere à i missiunarii è, pianu pianu, face entre u so populu in a cumunità di a Chjesa latina.

U 28 sittembre di l'annu 929, hè assassinatu da u fratellu.

I Cecchi l'anu sempre cunsideratu cum'è u mudellu di i principi cristiani è, da u diciottèsimu seculu, cum'è u simbulu di l'indipendenza di u paese. U cantu di San Venceslau, scrittu à u seculu XIII, hè restatu l'innu di u populu ceccu.

Etimolugia: da u slavoniu "waclaf" (curona) è "slava" (gloria).

Nomi: Vàclav, Venceslas, Venceslau, Venzislaus, Wenceslas, Wenzel, Wenzeslaus, Wjatscheslaw.

 

29.IX.

L'archanghjuli (Michele, Reffaellu, Gabriele). U Venerabile Alberti.

Hè a festa di l'Archanghjuli, vene à dì l'Anghjuli superiori. I principali sò:

. Gabriellu, quellu chì annunziò à Maria Vergine ch'ella era incinta;

. Michele, quellu chì hà vintu à Satanassu è chì pesa l'anime à l'entre di u Paradisu;

. è Raffaellu, quellu chì guaria i cechi.

Michele hè u solu chì sia veradimente unuratu in Corsica. Hè à u quintu rangu dopu à Santa Maria, San Ghjuvanni, San Petru è San Martinu.

San Ghjuvanni conta, in l'Apocalisse, a vittoria di Michele contru à u dragu, un dragu rossu chì avia sette teste è dece corne è, nantu à ogni testa, un diademu. Cù a so coda, spazzava e stelle è ne ghjitava una terza parte nantu à a Terra.

U dragu si era fermatu davanti à una donna chìigrave; avia da parturì per manghjassi u figliolu. Quand'ella fece u figliolu maschju chì devia regge tutte e nazioni, ci fù, in celu, una grande battaglia trà Michele è i so anghjuli da una parte, u dragu è i soi da l'altra.

U Gran Dragu, u serpu anticu, dettu Diavule, o Satanassu, fù ghjittatu nantu à a Terra. E' si intese una voce chì dicia: "Avà hè stabilita a salvezza, a forza è u regnu di u nostru Diu è a putenza di u so Cristu.

Etimolugia: da l'ebreu "mika'el" (parangon di Diu).

Casate: Micheli, Micheletti, Michelacci, Michelotti, Micheloni, Michelosi, Michelangeli.

Nomi: Gieltje, Mechel, Micaela, Michael, Michaela, Micaella, Micaellu, Michaelina, Michaeline, Michaëlla,Michal, Michée, Micheil, Michel, Michela, Michéla, Michele, Michèle, Micheletti, Michelina, Micheline, Michelle, Michou, Michouka, Michoulia, Mickaël, Mickael, Mickie, Micky, Miguel, Miguela, Miguelita, Mihàly, Mikaël, Mikahïlina, Mikal, Mike, Mikhail, Mikkel, Mikkiel, Mikko, Mikus, Mischa, Mitchell.- In Corsica, in u 1981, Michele venia l'undecesimu rangu di i nomi maschili. Era quellu di 19 omi nantu à mille.

Paesi è cità: Albenga, Caltanisetta, Benevento, Salerno, Napoli, Inghilterra, Baviera, Spagna, Bruxelles, Sebenico, Zoug. In Corsica: Ascu, Bastelica, Bastelicaccia, Bilzese, Bisinchi, Calvi Fiume seccu, Foce, Ghisunaccia, Gualdaricciu, l'Isulacciu di Tavagna, Lucciana, Muratu, Nucariu, Ocana, Pastricciola, Pedigrisgiu, a Penta di Casinca, u Poghju di Tallà, Urbalaconu, e Valle di Mezana, e Valle di Rustinu, Venacu. - Chjese dedicate à San Michele esistenu - o esistianu - dinù in Luri, u Viscuvatu, Santu Niculaiu di Moriani, Nuvella, Spiluncatu, Ortiporiu, Campile, Siscu, Ogliastru, a Croce, u Pratu, u Petricaghju, e Valle d'Alisgiani, a Verdese, San Lurenzu, Castirla, Altiani, Ventiseri, Vezzani è u Castellà di Mercuriu.

Prutezzioni: Michele hè u santu patrone di i bottai, cappellai, merciai, drogheri, scarminadori è fabricanti di nicci.

Gabriellu fù u più felice di l'imbasciadori, delegatu per dì à Maria Vergine ch'ella avia da esse a mamma di Ghjesù.

Etimolugia: da l'ebreu "gabri" (forza di Diu).

Casate: Gabrielli.

Nomi: Gaaf, Gabay, Gabel, Gabin, Gabor, Gabrel, Gabriel, Gabriël, Gabriela, Gabriele, Gabriella, Gabrielle, Gabriello, Gabriellu, Gabrielo, Gabrio, Gabry, Gaby, Gavriil, Gavriounia, Jella.

Prutezzione: telecumunicazioni, imbasciadori;

L'arcanghjulu Raffaellu avia rimediu à tuttu: à Tobia, li rende a vista, li dà un zanettu di soldi, face stà zitta a moglia chì ghjera una diciulella, è scaccia u demoniu chì à Sara, a nipote, l'avia resa veduva sette volte.

Etimolugia: da l'Ebreu "raph'el" (Diu guarisce).

Casate: Raffaelli.

Nomi: Faila, Falia,Falito, Ilia, Rafa, Rafael, Rafaella, Rafaelle, Rafaelli, Rafaello, Rafaïl, Rafaila, Raff, Raffaele, Raffaella, Raffaello, Raffaellu, Rafil, Rakha, Raphaël, Raphaela, Raphaëlle, Raphel.

Prutezzione: i feriti di guerra.

Bernardinu Alberti hè natu u 2 aprile 1591 in Calinzana. Hè mortu u 29 sittembre 1653 à u cunventu di Marcassu. Era un frate cappuccinu. Averebbi fattu una massa di miraculi ma, in Roma, ùn l'anu vulsutu beatificà. Trè volte a causa fù ricusata da a Sacra Cungregazione di i Riti. Ci hè vulsutu à aspettà u 29 ghjennaghju 1828 per chì u papa Leone XIII ricunnosca l'eroicità di e virtù di Bernardinu Alberti. Da tandu, ne simu sempre custì.

 

30.IX.

Santu Ghjilormu.

A gloria di Ghjilormu vene, anzi tuttu, da a traduzzione latina ch'ellu hà fattu di a Bibbia, a famosa Vulgata.

Natu versu l'annu 345, hà studiatu in Roma è ghjè statu battizatu à l'età di 19 anni.

Da 25 à 29 anni, stà in Aquilea, in una cumunità di cleri è di laichi chì facenu una vita santa. Da 29 à 33 anni, hè rimitu in un desertu di Siria. Da 33 à 37 anni, studia e Sante Scritture in Custantinopuli. E' po, volta in Roma.

U papa Damasiu (366-384) ne face u so secretariu è li dumanda di verificà a traduzione latina di i Vangelli.

Trè anni dopu, parte in Palestina, raghjuntu da Santa Paula è d'altre donne. In Bettelemme, facenu dui munasteri (unu per l'omi, l'altru pè e donne), una scola, un uspiziu è una torra. Ghjilormu guverna issa cumunità durante 35 anni. Avia un caratteracciu è si mette male cù i veschi di Ghjerusalemme. Cullerosu, vendicativu, passava u so tempu à liticassi quant'è à studià, scrive è pregà.

Hè mortu in Bettelemme u 30 sittembre 430.

Etimolugia: da u gr. "hieros" (sacratu) è "onoma" (nome)

Casate: Geronimi, Gilormini, Girolami.

Nomi: Gerome, Geronimo, Gerry, Ghjilorma, Ghjilormu, Gerolama, Girolamo, Girometta, Grommes, Heronima, Hiéronymus, Hyronimus, Ieronim, Jérôme, Jeromia, Jéromin, Jéromine, Jeronim, Jeronima, Jeronimo, Jeronimus, Jerrome, Olmes, Onimus, Ronimus.

Paesi è cità: Roma, Pesaro, Curzola.

Prutezzione: Ghilormu hè u santu patrone di i studianti.

Detti è pruverbii: Un ghjornu chì u papa Sistu Quintu fighjava una pittura duve San Ghjilormu batte a so colpa minendusi in pettu cù una petra, disse: "Tenila forte issa petra; senza ella, mai sereste statu canunizatu".