· U CARNAVALE È E SO INCANTAZIONE

L'annu hè tagliatu in parechji tempi forti; nanzu, u tempu di quaresima, a ciriola marcavanu a fine di l'invernu. Parechji gruppi d'adulescenti andavanu di paesi in paesi per racoltà l'alimenti, un "ghjùdice" era designatu per tassà e case visitate.
Mumentu di staripamentu, u carnavale grazia à e so parechje allegrezze pigliava a so rivincita annant'à i periodi d'austerità è di privazione.
In I tempi più landani, u carnavale era longu d'un mese, dopu hè statu riduttu à ottu ghjorni, dopu trè ghjorni, è oghje hè in traccia di smarisce.
U Rè di u carnavale era elettu trà I zitelli, era sceltu per u so spiritu di risposta, a so cunniscenza di l'usi è a so imaginazione.

U Rè era impiastratu di neru di fume, vestutu di sacchi o di stracci. Avìa u so tronu è cummandava. Avìa i so curtighjani, è a so garda facia rispettà e so vulintà è trascinava i matti è e giovanotte davant'à u tronu.
Ammende è penitenze eranu distribuite da u Rè : e ghjuvanotte eranu tassate in natura (ballà è imbraccià tal o tal persona, purtà fritelle…) è l'altri, messi à a risa devianu rigalà vinu è nutritura.
U carnavale era l'occazione di ballà a "Muresca", celebrandu a disfatta di i mori o di i turchi.
Certi ne prufitavanu per fà una dighjarazione d'amore in publicu.
Si dice oghje chì u carnavale hè mortu, pò esse per vìa di l'invechjamentu di a populazione. U carnavale era assai ghjuttone : " Carnavale morse techju di fritelle ".
Pudemu gustà i puemi incantatorii chì i ghjuvanotti di Muratu dicianu in 1939 quand'elli andavanu di casa in casa per piglià l'offerte :

· L'INCANTÌCULA

Bona sera in quasta casa
Quante persone site
Anc'una figlia avete da maritu.
Diu li dia un bon partitu.
Appiete oliu assai
Granu ùn vi ne manchi mai
Roba tanta ci ne sia
Per Diu è per i Santi.
Denari appiete tanti
Sempre appiete tante dece milla
Appiete linu è fila
Appiete tante mele
Appiete tanta tela
D'ogni sorte di frutti
Per danne à tutti.
Ùn sò quanti brocci
Manghjaimu in questa sera
Sù sù la ria nera !
Arrizzatevi o madonna
Accendite sta candela
Guardate ind'è st'anghjone
Ci serà a nostra ragione.
Sia sia !

E quandu a ghjente ùn dava nunda, i ghjuvanotti dicìanu :

A vostra casa hè fatta à caterezza
Ch'ella sterpi tutta a vostra razza !

O dinù :

Sè vo ùn date nunda, bucertulellu muru ! muru !
Chè voi ne appiete quantu ne aghju in culu !
Ch'una tavula panaghja vi tagli la cullaghja !
Ch'un troppulu tondu tondu vi caccia da stu mondu !

(Testu uriginale di Serena De Mari, esciutu in francese in a rivista
d'infurmazione culturale " A LETTERA ", Nu 10 , A Stampata, 1994)
(E parolle di l'INCANTULA so state racolte da l'autori di u libru " CAHIERS
D'ETHNOLOGIE CORSE, CUISINE ET ALIMENTATION ", CRDP di Corsica, 1992)

Un travagliu da Petru-Ghjuvanni Bresciani

Rivene à I Santi è e Feste, à u principiu