In più di a messa di a vigilia di Natale, a liturgia prevede e trè messe chì ci pruponenu di campà in modu diversu u misteru Natalescu : a messa di a notte, a messa di l'albore è a messa di u ghjornu di Natale.

1. Messa di a vigilia
A messa di a vigilia prupone bellissimi testi. U prufetu Isaia (Is 62/1-5) annunzia un ghjornu novu chì manifesterà a tennerezza di Diu. Paulu, in l’Atti di l’apostuli (Ac 13/16...25), parla di u prugettu di salutu di Diu pè l'umanità. U principiu di u vangelu di San Matteu (Mt 1/1-25) amenta a genealugia di Ghjesù dapoi Abraham è l'annunziu di l'anghjulu à Ghjiseppu, eppo a so missione : "si chjamerà Ghjesù" (vole dì u Signore salva).

 

2. Messa Natalesca di i zitelli è di e famiglie
Dapoi qualchì annu, si face in parechje parochje, versu 7 ore, una messa di a notte anticipata, una messa pè i zitelli è e so famiglie. Numerosi zitellucci ci participeghjanu. E letture scelte sò quelle di a messa di a notte è micca quella di  a vigilia di Natale. Durante sta messa, i zitelli vanu in prucessiò à purtà à Ghjesù à u presepiu. Assai persone anziane venenu à sta messa di i zitelli è di e famiglie.

 

3. A messa di a notte di Natale
Di regula, sta messa di a notte di Natale hè chjamata "messa di mezanotte". A prima fubbe celebrata in u 440 da u papa Sixte III.

Quella notte, hè celebratu u passu da u bughju à u lume. U testu d'Isaia (Is 9/1-6) annunzia a nascita d'un zitellu chì ferà pisassi un grande lume nant’à u populu. Serà chjamatu Principe di a pace. U vangelu di San Lucca (Lc 2/1-14) conta a nascita di Ghjesù è l'annunziu di l’anghjuli à i pastori. A pruclamazione di u vangelu si compie spessu cù u cantu « Gloire à Dieu ».

Spessu, avemu una veghja nanzu a messa di a notte Natalesca pè appruntassi à a celebrazione di u misteru di Natale. Ogni tantu, si face un presepiu vivu cù una messa in scena. Si sentenu i canti di Natale : Il est né le divin enfant, Venez divin messie, Les anges dans nos campagnes, Douce nuit ...

 

4. A messa di l'albore (u ghjornu di Natale)
U vangelu (Lucca 2/15-20) conta a seguita di a storia principiata a notte cù a visita di i pastori in Bethléem. San Paulu (Tit 3/4-7) mostra chì a nascita di Ghjesù hè una nova nascita pè noi.

 

5. A messa di u ghjornu di Natale
Sta messa di u ghjornu di Natale ùn s’assumiglia manc’appena à a messa di a notte. E letture lodanu à Ghjesù è invitanu à guardallu. Ghjè una meditazione nant’à u prugettu di Diu dapoi l'urigine di i tempi, prugettu chì si rializeghja in l'incarnazione di u figliolu di Diu. U prologu di u vangelu di San Ghjuvanni (Jn 1/1-18) nant’à u logos, u verbu di Diu, face da nova Genesi di a creazione di u mondu. U principiu di l'epistula à l’Ebrei (He 1/1-6) sprime a listessa rialità cù una grande sulennità. L'umelia di a messa di u ghjornu Natalescu mette in risaltu u misteru di l'incarnazione.