A festa di Natale hè una di e più vechje.
Secondu u nostru amicu, Petru Casanova, di a Casanova di Venacu, l’antichi corsi avianu u mendu d’accende fochi nant’à certe alture pè festighjà u ritornu di a Luce chì scacciava a notte bughja. E’ ghjè vera chì Natale vene cù u ghjornu u più cortu di l’annata. Hè u mumentu tantu aspettatu duve e ghjurnate ùn calanu più, duve a luce supranieghja, vince, u bughju. Ci hè speranza d’una vita nova.
Si festighjava u Diu Sole, si festighjerà Ghjesù Bambinu, si festighjeranu tramindui pè salutà a cumuna Liberazione.
Festa pagana è anniversariu cristianu s’accoppianu. Usi antichi è nove tradizioni s’aduniscenu.
E’ cusì si perpetua l’usu di u focu, simbulu di speranza.
I ceppi nataleschi sò accesi nant’à e cullette, i poghjali, e sarre, duve i Corsi si sò rifugiati, fughjendu e marine periculose è e valle malsane.
Qualchì ghjornu nanzu Natale, criaturi è zitelloni, copiendu
l’ « operate » di i maiò, racoglienu legne secche, ghjamboni cascati, rambelle, castagnine o leccine, abbandonate da e piole, ceppi francati da l’incendiu. I trascinanu è l’amansanu per un focularu, cum’è una sfida, un’affirmazione di u cumunu sforzu : cullettività è fraterna cumunione.
