Paulu Gandon

E stazioni termali
in Corsica

 

 

 

 

 

 

L’universu termale corsu hè difficiule à cunnosce bè :
certe surgenti sò abbandunate o micca aduprate

à modu cumerciale ; unpoche, propiu in cunfurmità cù

 i regulamenti ufficiali, campichjuleghjanu à straziera ; d’altre infine parenu

avè una vita veramente particulare. Eccu dunque una presentazione di u termalismu

 isulanu.

 

 

Storia

Trà l’8u è u 9u seculu nanzu à Ghjesù Cristu, i Rumani scaccionu i Cartaghinesi da e so agenze cumerciali di u Mediterraniu, si stallonu nant’à a costa orientale di a Corsica è custruinu à Aleria.

(...) Si pò pensà chì, essendu amatori è specialisti di e surgenti termali, à i Rumani li sò piaciute quelle di Petrapola, in i so siti bellissimi, cusì vicini da Aleria. Ci creonu i Termi chì li facianu prò... A cunfirmazione di st’ipotesi fubbe a scuperta di e vistiche di Termi magnifichi, di pezze di muneta è di canalizazioni anziane in l’impiantu di i termi attuali.

Secondu certi autori, averebbinu adupratu solu e pruprietà termiche di l’acque calde, ùn cerchendu un’azzione di cura interna, ma solu u benestà di l’effettu balneariu. Sta ri­flessione ci permette di capì perchè ùn anu scupertu e pruprietà di Puzzichellu, surgente fredda. I primi cristiani, elli stessi, cunsideravanu sti stabilimenti di bagni cum’è lochi di buiara pè l’eretichi è i brusgiavanu spessu. (Cf Biologie médicale nu7 - 1938)

Più tardi, i Rumani fubbenu scacciati anch’elli da l’invasioni successive di i Saracini, è, forse tandu, a stazione termale di Petrapola fubbe distrutta.

Ghjè durante l’8u seculu chì si truverà un indiziu di un studiu medicale di e surgenti minerali in Corsica. Quellu hè statu fattu sott’à u patrunatu di Monsignore Carlo Fabrizio Giustiniano, Vescu di Mariana. Nanz’à a paruzione stessa di u libru di stu prelatu chja­matu « Description de la Corse », Giovanni della Grossa (...) mintuava chì dui sapienti medichi (senza dì i nomi) eranu stati incaricati di studià « Questi Bagni di Corsica » è stampava cusì u risultatu di i so travagli :

• Accant’à Aleria è à Prunelli di Fiumorbu, in Petrapola, duie surgenti assai cunnis­ciute d’acque calde calde contr’à i dulori cagiunati da i rumatismi.

 

• Accant’à Ascu, duie surgenti frà queste una diuretica, l’altra curendu e malatie di u fegatu (surgenti micca aduprate oghje).

 

• Moranzana, pieve di Mariana : acqua ferrughjinosa.

 

• Campu Cardettu, surgente pocu cunnisciuta chì ci vole à scaldà pè ghjuvassine.

 

• In a pieve di Vicu : 3 stazioni, una in Musi (acqua tepida), a seconda in Balogna (acqua fredda) [forse quì una cunfusione in u spiritu di l’autore nant’à a temperatura di ste duie surgenti, Balogna hà una acqua tepida], a terza in Sornu in Sù (Guagnu : acqua calda).

 

• In a pieve di Tallà, bagni pocu cunnisciuti (Vutera).

 

• In a pieve d’Alata, acqua calda (Caldane di Tallone ).

 

• In u paese di Sant’Antuninu di sta pieve stessa (surgente fredda).

• In una storia di l’Isle de Corse, scritta da qualchissia (G.D.C.) in u 1749, sò min­tuate l’acque di Guagnu.

 

• In u 1820, Theriaux, un spiziale, face a prima analisi di l’acque di Guagnu.

 

• Più tardi, analisi chimiche è studii medicali di e surgenti di Petrapola è di Puzzi­chellu sò state rializate da O’Henry è Poggiale (1852), Constantin James (1854) per via di a pruposta di u Cunsigliu Generale – votu di u 1853 mandatu à u Ministru di l’Agricultura – Marchal di Calvi in u 1855, A.Pietri in u 1898, Felice Battesti in u 1905.

 

• Mintuemu u libru cumpletu di u duttore Zuccarelli è di L.Gentil, spiziale di Bastia, stampatu in u 1909, induve truvemu indicazioni è contrindicazioni precise di st’ac-que, eppo analisi abbastanza precise di e surgenti principali.

 

• Infine, d’aprile di u 1938, M. Barret, Direttore di u Laburatoriu di Pulizia Dipar­timentale, rispettendu a decisione di u Ministeru di a Salute Publica u 14 d’ottobre di u 1937, hè ghjuntu in Guagnu, Petrapola, Orezza, Baracci è Caldaniccia pè facci analisi. »

 

« E stazioni di Puzzichellu è Petrapola, dapoi a fine di u 15u seculu, si n’andavanu sempre à male perchè avianu stallazioni vechje è pocu intrattenute, suddisfacianu pocu pocu i bisogni di a clientella. »

Stratti da « Pietrapola les Bains » da Ghjuvan Luigi Noël.

 

I bagni di Vutera

Lucalizazione

Si trovanu à qualchì chilometru da Palneca è da Cuzzà, in a cumuna di Vutera, à l’orlu di u Taravu, vicin’à Vergaghju, nant’à l’anzianu chjassu di muntagnera.

Storia

Sì a surgente era cunnisciuta dapoi una bella stonda pè indicazioni puntuali è lucali, ghjè à parte da u 18u seculu ch’ella principia à esse studiata è sfruttata à modu artigianale sin’à st’ultime decennie.

U 19 ferraghju di u 1616, durante u so interrugatoriu da i cumissari genuvesi cuncer­nendu a so participazione à u macellu di i feudatari di e Trè Pievi, u ghjornu di a San Lurenzu, u capurale Abrà di u ben di Giovanni, di Bastelica, dichjarava ch’ellu ùn avia pussutu participà à l’incendiu di a casa di Vincentello Bozzi in Vutera perchè, secondu ellu, era andatu in stu paese solu 8 anni nanzu pè piglià « i bagni » - le caldane o sian bagni - (cf « Les feux de la Saint-Laurent » : A.M. Graziani è J. Stromboni).

 

In u 1792, C.F. Volney, cofundatore di u Club des Jacobins è anzianu secretariu di l’Assemblea Naziunale và in Corsica. In u so « Etat physique de la Corse », mintueghja certe surgenti termali, cum’è quella di Vutera : « Ci sò sempre acque termali in Vutera, in u cantone di u Taravu ; ma ùn si trova mancu una vasca, è ci vole à bagnassi in a fanga. »

In u 1821, u duttore Peraldi, ispettore di l’acque termali, custatta : « ùn ci hè nisun casamentu pè riceve i malati : quand’elli sò ghjunti, ognunu face un agrottu di machju­lelle pè parassi da l’influenze di e notti. I circondi sò padulosi è pare ch’elli dianu frebbe intermittenti, ma solu à i furesteri è micca à i paisani. » - C.F. Volney avendu custattatu st’ultimu fenomenu in Corsica, preciseghja : « L’avemu patutu in e nostre culunie di Ga­leria, di Chjavari, di Paternu, in u campu di i Lorrains, perchè eranu pochi pochi quelli chì a si francavanu trè anni dopu esse andati quallà. » I malati si bagnanu in una vasca in muratura avendu una forma sferica, accunciata à modu rozu in u locu chjamatu « I Cal­dani di Vutera ».

In u 1823, un casamentucciu hè custruitu accant’à a vasca. Bagnarole sò scavate in ter­ra. Quelli chì seguitanu una cura anu da esse numerosi l’anni dopu (più di 800 à l’annu). In u 1853, cum’ellu a vulia u Cunsigliu Generale, u Duttore Constantin James ghjunghjia in Corsica, missiunatu da u Ministeru di u Cumerciu è di l’Agricultura, pè studià e sur­genti termali è minerali.

Acque

In quant’à a nostra surgente, scrivia :

« L’acque di Vutera, à tempu pigliate, zirlanu fora è dopu avè francatu duie vasche, vanu à perdesi in fiume...»

« L’acqua di Vutera hè una di e più bone acque di Corsica, hè diviziosa è hà una tem­peratura di 48°C. Ancu sì sta temperatura cala di qualchì gradu mentre chì l’acqua và da a vasca induv’ella zirla à quella induve omu si bagna, hè troppu calda pè u bagnu. Cusì, u tempu d’immersione hè solu di qualchì minutu. Solu una surgente hè aduprata.»

« A surgente di Vutera musca un odore d’ove cuvate assai caratteristicu. A limpidità hè perfetta, u savore propiu zulfosu cù un gustu dulciacciu. Omu sculineghja nant’à u per­corsu sanu strisce longhe di baregina. In quant’à a cumpusizione chimica di st’acqua, un sò micca s’ella ci hè stata un’analisi seria. Possu solu dì chì u zolfu ci si trova in zulfu di sodiu è chì i gasi prudutti da a surgente sò un mischju d’acidu carbonicu è d’azotu.»

« Nisun documentu esiste mancu pè a so parte medicale. Ghjè dunque per via di rinsi­gnamenti... chì si pò sbuccà à qualcosa di pusitivu.»

« I rumatismi, l’ingorghi articulari, l’anchilosi incumpetenti, e sturciture, e svugliture vechje, certe cuntratture spasmodiche di i musculi, a maiò parte di e malatie di a pelle sò guariti abbastanza prestu da l’impiegu di st’acque. Sò vantate dinù contr’à l’affezzioni di l’uteru, vale à dì a sensibilità versu u cullerettu, e perdite bianche è reni pisivi...»

« L’avvene di Vutera mi pare assicuratu perchè a surgente aduprata oghje hè solu una parte bella mischina di e ricchezze minerali di a cumuna. In fatti, accantu ci si trova una pratalina induve sorgenu da ogni latu currenti d’acqua zulfosa chì a temperatura hè da 40 à 55°, è questi si perdenu in e terre o sboccanu in a fiumara, senza pudè prufittanne. »

« Secondu mè, sti currenti venenu da un listessu ceppu sottu terra, questu deve esse pocu pocu prufondu, postu chì, durante a stagione di i feni, i falciadori travagliendu scal­zi, sò ubligati à tramutassi senza piantà, vistu u calore di a terra chì i disturba. »

In u 1877, dopu una dumanda di sfruttamentu di l’acque termali, i fundamenti di u stabilimentu termale parenu esse intrapresi ; a vasca hè cuperta da una volta, pè riceve i 90 000 litri, à ghjornu, di debitu.

St’acque, chì ghjuvavanu di bagni publichi durante una bella stonda, quandu e sale d’acqua eranu un lussu scarsu, anu fattu prò à numerosi Talavesi, sedentari o in vacanze.

Dapoi una vintina d’anni, u stabilimentu termale è i cumerci in leia sò chjusi. U sta­bilimentu è e so stallazioni sò sgangherati, si spera chì i Bagni di Vutera ritruveranu un fiatu novu, cù un sviluppu à livellu di e so qualità, in u principiu di un seculu bramosu di sputichezza.


 

Baracci

In Ulmetu (Pumonte)

À 3 chilometri à u nordu este da Pruprià, i bagni di Baracci si trovanu in fondu di u golfu di u Valincu, à menu di 1 chilometru da a marina di Baracci, nant’à sponda à manca di u fiume avendu u listessu nome.

A scuperta di medaglie antiche è certe vistiche accertanu a presenza di termi rumani.

L’acqua termale zulfosa è salina zirla à 52°C è hè cattata à mezu à u stabilimentu ter-male, custruitu in u 1928 è riapertu in u 1992. St’acque sò apperitive è stimuleghjanu e funzioni digestive.

Bagni di Caldane

I bagni di Caldane sò un locu meravigliosu pè bagnassi ; sò scavati in pianu, in a na-tura ; una surgente d’acque zulfose chì zirla à 38° è anu pruprietà curative (dermatolugia, rumatolugia...) Sta surgente hè situata à i cuntorni di u fiume Fiumiccicoli.

Indicazioni

Acne - Raspiu - Brisgiolu - Antrace

Muche da i trumatismi

Trumatismi - Ossei - Articulari

 

Piaghe infettate

Rumatismi - nevralgia - Angina - Sinu - Gola

 

Cumpusizione chimica

Temperatura di l’acqua : 37° c 38° c
Aspettu..........................lindu
Udore............................appena zulfosu
Savore...........................appena salitu è amaru


 

Anioni

HC 03 – bicarbonati : 18,3 mg/l
CL – clorure : 42,6 mg/l
So4 - zulfati : 41,6 mg/l


 

Cationi

Ca++ - calciu : 12 mg/l
Mg++ - magnesiu : 0,973 mg/l
K+ - potassiu : 0,83 mg/l
Na+ sodiu : 54 mg/l
Ferru tutale : 0,095 mg/l
Siliciu in Si 02 : 37,5 mg/l


 

Analisi spettugrafica

A1, B, CA, CU, FE, GA, K, LI, Mg, Mn, Mo, Na, Si, Sr, W
Gradu idrometricu tutale : 4°4
Gradu zulficrometricu : 6°09

 

Puzzichellu

 

Ici Puzzichello, là Guagno, Guitera,
Plus loin Pietrapola, le vallon d’Orezza,
Offrent à nos douleurs de généreuses sources. .........
Venez et plongez-vous dans l’onde bienfaisante ;
Vous aurez votre part de sa vertu calmante

Casimir de L’Église de Félix, «Souvenirs de la Corse, de 1852 à 1867», stamperia Ollagnier, Bastia, 1868.

Cum’ellu u mintueghja u nu 7 di a rivista municipale di lugliu di u 2000 :

«A cumuna d’Antisanti hà fattu funziunà torna a surgente termale di Puzzichellu.
In cullaburazione cù a cumuna d’Aghjone, un S.I.V.U hè statu creatu.
I riprisentanti di e duie cumune si sò adduniti à a merria d’Aghjone u 22 di maghju di

u 2000 pè furmalizà sta decisione. U merre d’Aghjone, Ghjuvanni Baldovini, hè statu elettu presidente, è Marthe Mariani vicipresidente. L’ogettu di u S.I.V.U hè u rinnovu di u situ termale cù u Dipartimentu, pruprietariu di a surgente, è a creazione di un prugettu semplice, rialistu è rapidu. A messa in risaltu di stu situ ghjova à aiutà u sviluppu ecunomicu di a cumuna.»

 

Storia

Situatu à qualchì chilometru da Aleria, nant’à i limiti di e cumune d’Antisanti et d’Aghjone, u situ di Puzzichellu serà cunnisciutu dapoi a storia a più anziana di a Corsica. Sti bagni parenu esse stati frequentati da parechji bagnadori à parte da a più alta antichità è sfruttati omancu dapoi u principiu di u diciottesimu seculu.

Thomasina Campbell, visitendu a Corsica in u 1868, conta una storia strana in quant’à a scuperta di e pruprietà di l’acque di Puzzichellu :

«Secondu a tradizione, l’odore maiò di zolfu chì si sentia da e surgenti, alluntanava i campagnoli impauriti, è e capre sole vulianu avvicinassi à a culletta da induve currianu st’acque.

À quella epuca, un’epizuzia driosa tuccava e bande di a piaghja d’Aleria, è un capra­ghju s’accorse chì unepoche di e so bestie andavanu spessu à ciuttassi in st’acque. Dopu à qualchì ghjornu, tutti i so ulceri sparianu : avendu sottumessu l’altre capre malate à u listessu trattamentu, fubbenu guarite cum’è l’altre.»

Pare chì i primi scientifichi essenduci interessati à e pruprietà di l’acque di Puzzichellu sianu O’Henry è Poggiale in u 1852.

L’annu dopu, in a so deliberazione di u 24 d’aostu di u 1853, u Cunsigliu Generale di a Corsica face sta pruposta è a manda à u Ministru di l’Agricultura :

« Ùn si pò cunnosce u benefiziu ch’ellu si pò ricaccià da l’acque minerali, s’elle ùn sò studiate sopr’à locu da persone avendu e cunniscenze e più numerose in idrolugia.

À u Cunsigliu Generale, M. Constantin James, autore di un libru assignalatu, « Guide pratique aux eaux », puderebbe intraprende stu studiu cù successu, è cusì i risultati ghju­verebbenu assai à a Corsica è à i malati di a Francia suttana.

Dunque, prega A So Eccellenza u Ministru di l’Agricultura è di u Cumerciu d’ingagià stu sapiente distintu, è ch’ellu vaghi in u dipartimentu pè studiacci l’azzione terapeutica di ogni acqua minerale, vicin’à e surgenti stesse, è publicà dopu u risultatu di i so studii è di e so sperienze.»

Cusì, durante l’annu 1854, Constantin James anderà da Parigi à Aleria pè studià a cum­pusizione è e pruprietà di l’acque di Puzzichellu. Descriverà in stu modu u so viaghju :

«Pè andà da Parigi in Corsica, ci volenu da 40 à 42 ore, siasi 20 ore in trenu sin’à Marseglia è u restu in battellu à vapore sin’à Aiacciu o Bastia. Eccu ciò ch’elli vi pru­mettenu ; ma u percorsu hè di regula assai più longu. In fatti, mi ci hè vulsutu 32 ore pè andà da Marseglia à Aiacciu.»

In quant’à l’acque di Puzzichellu, scriverà :

« Ci sò duie surgenti principali. Simu prevenuti di u so caratteru zulfosu grazia à l’odore caratteristicu ch’omu sente da luntanu. Sò vicine traminduie, (temperature : 14°) ; u so savore hè stipticu. Una di ste surgenti hè propiu limpida, l’altra hè un pocu gris­giogna per via di qualchì fioccu zulfosu in suspensione.

Secondu l’analisi assignalata di M. Loetscher, prufessore à a scola Paoli, st’acque cuntenenu à u litru 0,0473 grammu di gasu zulfidricu, qualchì sale di soda, di magnesia eppo una materia bituminosa particulare ; lascia muscà, à u griffone, acidu carbonicu è u protocarburu d’idrogenu ; infine serebbenu ricche in baregina. St’acqua pare avè un’energia maiò. Dopu avè betu parechji bichjeri, face nasce u bisestu, pruduce una sensazione piacevule di calore chì si sparghje versu a periferia di u corpu, accelereghja u muvimentu di u sangue è cresce e secrezioni.

Ind’è qualchì malatu, purga un pocu i primi ghjorni ; ind’è quasi tutti, ùn trica micca à cungestiunà i plessi venosi di u rettu fundale è pò ancu pruvucà un flussu emorroidale.

Puzzichellu hè assai efficace pè trattà a maiò parte di e malatie di a pelle, soprattuttu quand’elle s’accumpagnanu d’ulcerazioni atoniche è serpiginose.

S’hè vistu dinù in Puzzichellu persone avendu e pedagre è medicate cù st’acque.

Favurizeghjanu a sparizione di i tophus è rendenu l’attacchi più scarsi è menu dulu­rosi.

Altri stati morbidi sò più o menu assai cambiati da l’acque di Puzzichellu. Sò l’eruz-zioni ripercutate, l’anziani flussi cacciati, soprattuttu u flussu emorroidale. Cuncernendu stu fattu, mettimu à Puzzichellu à listessu livellu chè Marienbad. Si tratta dinù di l’acci-denti siflitichi o mercuriali, i scrofuli, tumori indulenti è certi ingorghi di e viscere addu­minali. Dunque, st’acque porghjenu à a terapeutica risorse assai preziose.

Eppuru, in Francia, i medichi sapendu ch’elle esistenu sò pochi !»

È in u 1867, in u so « Guide pratique aux eaux minérales et aux bains de mer », scrive :

«L’acque di Puzzichellu si trovanu vicin’à Casabianda, nant’à a costa orientale di a Corsica. Ci sò duie surgenti principali, vicine l’una da l’altra, fredde traminduie (14°C) ; u so savore hè stipticu è curaghjinosu. Cuncoglienu 0lit,030 di gasu acidu carbonicu liberu è carbunati alcalini. In più, ci aghju trovu una materia bituminosa particulare.

Puzzichellu pussede un stabilimentu termale cuncogliendu dicessette bagnarole, una piscina, una duscia ascendente, duie bivette è una sala pè l’impiegu di a villotta di e surgenti.

U fattu di beie parechji bichjeri di st’acqua purga un pocu durante i primi ghjorni ; spessu cungestiuneghja u plessu venosu di u rettu fundale o pruvucheghja un flussu emor­roidale. I bagni sò sempre dati à tempu à a beienda.

Si cura cù successu in Puzzichellu a maiò parte di e malatie di a pelle, soprattuttu quand’elle s’accumpagnanu d’ulcerazioni atoniche è serpiginose.

L’azzione di bagni hè aiutata assai in stu casu da l’applicazione, sottu à a forma di topica, di a villotta (limon) di e surgenti pura o aghjunta in l’asciugna (axonge). Omu ne copre e superficie snudate è prestu queste si movenu, si puliscenu è si saldanu (si cica­trizeghjanu).

Puzzichellu hè vicinu à Aleria. Si visiterà cun interessu e ruvine di sta cità antica, cus­truita da Sylla, è tante volte distrutta da i sfarenti populi chì anu cunquistatu a Corsica senza sottumettela.»

À quell’epuca, l’usteria nova di Puzzichellu porghje un cunfortu rusticu :

«Da u Migliacciaru, andaimu in Puzzichellu caccighjendu long’à e machje. Entraimu à l’attrachjata in una piccula valle è sopra si vidia un casone biancu.

Ghjè u stabilimentu di bagni d’acqua minerale di Puzzichellu. L’amministradore ci fece appruntà duie came­
rucce pulite, imbianchite cù a calce è avendu letti in ferru.»

Ma a decurazione è a mubiglia di l’usteria di Puzzichellu sò quelle di un palazzu di pettu à e capanne misere induve stanu tandu i pastori :

«À una lega ingiru à Puzzichellu hè sparta qualchì capanna di pastori. Sò custruite cù piottuli ficcati in terra, è nantu si stabilisce un lettu di scope è di muchji ; si copre l’inseme di un stratu di terra pè chjappà a circulazione di l’aria sana.

Aghju vistu capanne chì cuncuglianu famiglie da sette à ottu persone. Accant’à l’abi-tazione, ci hè una cantina custruita male induve sò chjusi i casgi.»

In u 1857, in un libru assignalatu, Ghjuvanni di a Rocca vanta e benfatte di i bagni di Puzzichellu è e migliuranze rializate da u pruprietariu Filippi :

« L’acque di Puzzichellu, situate in un vallu long’à a costa orientale di a Corsica, sò assai efficaci è sò state frequentate da parechji bagnadori à parte da a più alta antichità. Ci sò duie surgenti chì zirlanu da u pede di una culletta situata versu u mare, vicin’à Aleria : dunque, avemu cundizioni di salubrità manc’appena suddisfacenti.

In Puzzichellu, ci era pocu cunfortu ; si distinguia qualchì piscina cundiziunata male induve omu si bagnava à buleghju è tende misere cuperta di machjulelle. Dapoi u 1840, l’affari sò cambiati. M. Filippi, pruprietariu di st’acque hà fattu custruì un stabilimentu termale abbastanza distintu cù dicessette bagnarole.

Accant’à stu stabilimentu si nota, aldilà di un fiumicellu chì si ghjetta in u Tagnone, un edifiziu bellissimu induve stanu i bagnadori.

Sti dui stabilimenti sò cinti da orte belle chì facenu un paisaghju magnificu ma a pia­ghja à l’ingiru hè una marina grande è spupulata, senza abitazione nè cultura.

In Puzzichellu, ci sò duie stagioni, cum’è in Petrapola. A prima principia u primu di maghju è cuntinueghja sin’à a fine di ghjugnu à u più. A seconda principia versu u 15 di settembre è si compie u 30 d’uttobre.»

Eppuru, in u 1881, enumerendu e risorse di a Corsica è dopu avè vantatu e benfatte di l’acqua d’Orezza, Victor-Adolphe Malte-Brun, anzianu secretariu generale di a Sucietà di Giugrafia di Parigi, parla pocu di a surgente di Puzzichellu  :

«Da a listessa banda, è accant’à Aleria, ci hè un’altra surgente d’acqua zulfosa fred­da, avendu assai gasu acidu zulfidricu. Hè chjamata Puzzichellu.»

Hè vera ch’ellu si tratta di un libru più generale è ogni dipartimentu hè trattatu in una trentina di pagine.

In u 1889, u « Dictionnaire encyclopédique des sciences médicales » descrive e pru­prietà di i bagni di Puzzichellu è mintueghja trè surgenti  :


 

Acque minerali di Puzzichellu

Atermali o prototermali, ametallite, ferrughjinose debuli, zulfose debuli (cumuna d’Antisanti). A stagione termale principia u 15 di maghju, s’interrompe di lugliu, è ripi­glia u primu d’uttobre pè compiesi à a fine di nuvembre. A stagione hè interrotta di lugliu, d’aostu è di settembre, soprattuttu per via di l’apparizione di frebbe intermittenti, propiu specifiche à u rughjone. Trè surgenti, sfruttate dapoi u principiu di u diciottesimu seculu, spuntanu da un terrenu fattu di terra rossa è di calcare. A principale si chjama : « Acqua grisgia », a seconda, « Acqua solforosa » è a terza, « Acqua ferrughjinosa ». Ste surgenti, ancu s’elle sò assai avvicinate una da l’altra è s’elle escenu da un terrenu à pocu pressu listessu, ùn anu micca e listesse pruprietà fisiche. E duie prime anu una cumpusizione chimica assai vicina, ma a terza, chì u puntu d’emergenza hè u più alluntanatu, pussede ogni qualità di un’acqua naturalmente ferrughjinosa. L’acqua grisgia serà veramente lin-da, malgradu a so culurazione ? L’acqua di a seconda hà un aspettu torbidu, soprattuttu quand’omu a vede in massa ; pare ch’ella sia mischjata cù un pocu di latte.

Nentr’à ste duie surgenti, ci sò bolle gasose belle distinte. Certe sò grasse è cumposte d’acidu carbonicu è d’azotu ; l’altre sò fine fine è sò furmate da l’idrogenu zulfatu. Anu traminduie un odore è un sapore assai epatichi.

A temperatura hè di 17°,4 C. A densità di l’acqua di ste duie surgenti, esaminata à u griffone hè di 1,0165, mentre ch’ella hè in e vasche di 1,00280. U so ghjettu in 24 ore hè di 15000 litri. In u 1851, Lötscher ne hà fattu l’analisi chimica. Hà trovu, in 1000 grammi di l’Acqua grisgia, st’elementi :

 

 

Stabilimentu

U stabilimentu di Puzzichellu hè stallatu benissimu è, di punta, ci hè a casa induve stanu quelli chì venenu à fà a cura. U stabilimentu agrotta duie belle vasche ghjuvendu à tempu di bivette è à tene l’acqua à prò di i bagni è di e dusce.

Cuncoglie dinù 17 cabinetti, avendu ognunu una bagnarola è una sala, eppo à mezu à questa hè stata scavata una grande piscina è dui cabinetti : u primu hà apparechji di dusce ascendenti, è u secondu, dusce discendenti è urizontali. Una tramezana si trova trà a pezza di e dusce discendenti è e duie caldere induve omu scalda artificialmente l’acqua di e surgenti zulfose di Puzzichellu.

In più, ci hè una sala speciale pè i bagni di baregina o di zulfariu ; st’elementi ghjovanu ogni tantu di cataplasmi.

Modu d’amministrazione è dose

Di regula, ùn si franca micca trè bichjeri d’acque zulfose di Puzzichellu a mane à di­ghjunu, ogni mez’ora. A surgente ferrughjinosa entre in a lege cumuna di l’altre acque bicarbunatate marziali. L’effettu fisiologicu u più in risaltu di l’acque di sta stazione hè a purgazione ch’elle determineghjanu ancu quand’omu ne beie pocu. U tempu di i bagni in bagnarola o in piscina dura da una mez’ora à un’ora ; quellu di e dusce da cinque à quindeci minuti.

I cataplasmi di u limacciu di e surgenti toccanu subitu a pelle durante una stonda più o menu longa, secondu i risultati ch’omu vole pruduce. Sti cataplasmi devenu esse cuperti di velu o di stoffa legera, quand’elli determineghjanu un’irritazione troppu forte.

Effetti fisiologichi è terapeutichi

Ogni acqua minerale zulfosa ecciteghja, soprattuttu quand’elle ùn cuntenenu nè bare­gina nè zulfariu. L’acque di Puzzichellu agiscenu cum’è l’acque zulfose ordinarie mal­gradu ch’ellu ci hè abbastanza glairina è zulfariu in suluzione o ch’elle lascianu precipità sti dui elementi. Cusì, st’acque, soprattuttu in bagni, ecciteghjanu i sistemi sanguignu è nerbosu. I bagni, e dusce è i cataplasmi agiscenu in furia nant’à a pelle. St’azzione irri­tente si face dinù nant’à l’animali.

À l’internu, st’acque cungestiuneghjanu in furia e vene emorroidali; fora, purganu prestu l’ulceri atonichi è favurizeghjanu a nascita di bucci carnosi. L’eccitazione essendu a caratteristica di e surgenti di Puzzichellu, i medichi di sta stazione l’adopranu pè curà benissimu e malatie di a pelle chì devenu diventà acute o subacute.»

Infine, in una cunferenza data in u 1973 in Cervioni, u duttore Alanu Guermonprez riperturieghja e pruprietà terapeutiche di l’acque di Puzzichellu è mintueghja quattru sur­genti.

Situazione

I bagni di Puzzichellu sò situati nant’à a cumuna d’Aghjone. A stazione cuncoglie quattru surgenti.

E surgenti sfruttate anu un ghjettu di 15 000 litri à ghjornu. A so colta hè bella sem­plice, quasi naturale. Anu un metru di distanza. A so cumpusizione chimica hè sfarente.

Surgente di manca : sorge da u scogliu per mezu di una grundaghja semplice in petra. Quandu si tocca l’acqua, hè assai untosa. U so aspettu hè appena torbu, hà un culore opa­linu. Carrieghja parechji fiocchi grisgi di tippu bituminosu è glairina. À l’inghjò, dopu à un cuntattu cù l’aria, diventa propiu torba è lattosa.

Surgente di diritta : hà u ghjettu più o menu listessu chè a prima. A so acqua hè linda è chjara.

In stu vallu incastratu, si sente assai l’odore d’idrogenu zulfatu, chì vene da e surgenti. Hè percepitu da luntanu. Quandu omu e tasta, l’acque sò agrette è amare ma micca spia­cevuli. A so temperatura d’emergenza hè di 17°.

Pruprietà terapautica

Indicazione

L’acque di Puzzichellu ponu esse paragunate à l’acque d’Enghien è Allevard ancu s’elle sò più ricche in H2S. A so cumpusizione chimica face induvinà e so virtù terapeu­tiche assai putenti.


Azzione generale

U so rolu in a natura pare di prima trinca. Ci hè capunanzu un’azzione Anafilattica mustrata à modu sperimentale, ma i trè effetti primurosi sò :

1. Un’azzione plastica o anabolica. U zolfu di ogni molecula organica, è in particulare in l’emoglobina, agisce nant’à a truficità generale di l’organismu.

2. Un’azzione energica o catabolica. U zolfu entre in l’organismu pigliendu a forma di l’idrogenu chì hè zulfatu da u tubu digestivu.

3. Un’azzione nant’à u sistemu nerbosu vegetativu.

 

Azzione lucale

Qualsiasi u so modu d’assurbimentu, u zolfu si strughje à livellu di a muccosa respira­toria pigliendu a forma d’idrogenu zulfatu.

1. Nant’à e secrezioni chì stancianu dopu à l’inacerbimentu di a crisa termale.

2. Nant’à a circulazione per mezu di a vasodilatazione di a muccosa.

3. L’idrogenu zulfatu agiscerebbe nant’à e terminazioni nerbose anestesiendule, cal­mendu u dulore è l’irritabilità di a muccosa.

4. Infine, à modu sperimentale, l’acque zulfate distendenu a bronca scantata.

5. Cù st’azzione mudificatrice, ci hè u rolu fibroliticu di u zolfu nant’à l’elementu so­lerosu cusì primurosu in e malatie respiratorie.

 

In O. R. L.

Coriza cronichi è acuti chì si ripetenu, ozenu è rinita atrofica semplice, rinite cunges­tive è iperestesie pituitarie.

 

Rinofaringite croniche, faringite croniche, granulose o ipertrofiche, amidalite lacuna­ria casgiosa, ipertrofia di i toli di l’adultu è di u zitellu, ipertrofia lucalizata o diffusa di e vegetazioni.

Surdità rinogene. Laringite croniche, catarrali, granulose o ipertrofie.

 

In Pneumolugia

Bronchite croniche catarali essenziali o resti d’una malatia infettiva determinata. Dila­tazione di e bronche cù broncuree maiò. Enfisema pulmunariu, asima di e bronche.

 

In Rumatologia-Dermatologia

U raspiu cronicu (forma secca è squamosa) hè l’affezzione chì ne benefizieghja u più.

In quant’à u sfogu di a pelle, deve firmà un’indicazione di prima trinca perchè l’asso-ciu zolfu-sole medicheghja benissimu st’affezzione.

Mintuemu torna frà l’affezzioni dermatologiche :

• Acne

• Prudita (démangeaisons)

• Urticaria (o focu purcinu)

• Scofana (Pityriasis)

• Impetigine (Impétigo)

• Chjavillosa (Furonculose)

• Ulcerazioni atoniche, ulceru varicosu

• Cheratose, paracheratose diffuse (ittiosi) o regiunali

 

Equipamentu

U stabilimentu termale di Puzzichellu era pitturescu, sputicamente corsu è cumpostu di teghje.

A storia di i bagni di Puzzichellu si finì cù a seconda guerra mundiale è l’occupazione di l’usteria da i suldati alemani chì anu struttu a stazione termale in u 1943.

N.B. : L’anziani Antisantichi è i più giovani cunnoscenu un’altra surgente più vicina à u paese, à più o menu 3 chilometri à volu d’acellu da i bagni è chjamata dinù Puzzi­chellu.


1. Jean de La Rocca, La Corse et son avenir, Editore Plon, Parigi, 1857.

2. Dictionnaire encyclopédique des sciences médicales. Seconda seria. Tomu 27. Pou-Pyx publicatu sott’à a direzzione di MM.A. Dechambre è L. Lereboullet ; Masson Ed, 1889.

3. Thomasina, M. A. E. Campbell, Notes sur l’île de Corse en 1868, J. Pompeani et Lluis Ed., Aiacciu, 1872.

4. Dr Constantin James, Guide pratique aux eaux minérales et aux bains de mer, Masson Ed., Parigi, 1867.

5. Charles Reynaud, Un hiver en Corse, récits de chasse et scènes de la vie des ma¬quis, Revue des deux mondes, 1853, T. 3, P 118-146.

6. Victor-Adolphe Malte-Brun, La France illustrée, Tomu 2, J.Rouff Ed, Parigi, 1881.

7. Dr Alain Guermonprez, Situation et avenir du thermalisme en Corse, Cunferenza fatta in Cervioni u 17 d’aostu di u 1973 è mintuata nant’à u situ di l’ADECEC.

 

A surgente di l’acqua d’Orezza

Autorizata da un decretu ministeriale u 25 d’aprile di u 1856 è ricunnisciuta di inte­ressu publicu da un decretu d’Imperu u 7 di ferraghju di u 1866, l’acqua d’Orezza hà una storia passiunente. In l’antichità, i Rumani apprezzavanu digià e so qualità.

Dopu, à u XIXu seculu, i stabilimenti d’Orezza cù e so bagnarole, e so dusce è i so frizziunamenti eranu apprezzati da i curisti è l’acqua termale guaria l’anemia, i nerbi, a malaria, e malatie di u fegatu è di i reni.

Parse tandu chì u so putere di medicina fussi miraculosu.

À u XXu seculu, in tempu di l’ultima guerra, fù dinò mandata in Africa di u Nordu per dà forza è vitalità à i sullati anemiati.

«Un acqua minerale per una salute di ferru»

Un bolleru d’acqua dilicata cù un gustu senza nisun savore di medicina, eccu l’acqua acitosa chi pussede e vere virtù medicinali.

A so forte custituzione in ferru è in gasu carbonicu naturale cura l’anemie è, à tempu, e pene di stomacu.

Hè l’acqua di a vitalità è di e digestioni faciuli.Essendu debule in sodiu, caccia a sete. U nostru laburatoriu d’analisi cuntrulleghja l’acqua ogni ora per a guaranzia di a qualità di l’acqua.

U travagliu di l’acqua

L’acqua minerale gasosa d’Orezza hè cunnisciuta cum’è una di l’acque più ricche in ferru di u mondu. Cusì pè u so imbuttigliamentu, un travagliu di l’acqua hè necessariu.

U funziunamentu di l’unità chì caccia u ferru, messu in opera à l’usina d’Orezza, hè un prucedimentu naturale : u ferru hè dimutatu cù l’aria.

Stu travagliu di l’acqua hè fattu in quattru tappe :

-Sgasà

-Dimutà u ferru

-A filtrazione

-Rigasà

A sucietà hà oghje ghjornu un prugettu d’impurtazione di e so acque à u Giappone cù a sucietà nippona Arcane, ancu sì u risturante « Beige » d’Alain Ducasse, in Tokyo, e serve digià eppo u prussimu paese d’impurtazione sò i Stati Uniti.

Situazione è avvene di u termalismu in Corsica

Una cunferenza in Cervioni, u 17 d’aostu di u 1973, da u duttore Alanu Guermonprez.

Stu travagliu ghjova à ramintà l’esistenza in Corsica di surgenti termali avendu aspetti fisichi è chimichi assai diversi, pruprietà terapeutiche putenti è cunnisciute dapoi una bella stonda.

Difatti, a presenza rumana hà lasciatu numerose vistiche à l’impiazzamentu di ste sur­genti o accantu.

E vistiche più recenti mostranu chì st’acque sò state aduprate durante epuche sfarenti è e so virtù eranu ricunnisciute.

Dopu à una presentazione corta di l’aspettu geologicu di a Corsica, spieghendu sta di­vizia termale, studieremu e principali stazioni riperturiate è e classificheremu cù caratteri chimichi listessi è, dunque, effetti fisiologichi simili.

Per quessa, videremu e principali surgenti d’acque zulfose, zulfate sodiche :

• Baracci

• Vutera

• Guagnu

• Petrapola

• Urbalacone

 

Altre menu primurose :

• Caladaniccia

• Caldane di Tallà

 

Eppo amenteremu l’acque zulfate calciche cù a surgente di :

• Puzzichellu

Dopu, l’acque ferrughjinose d’

• Orezza

Queste fubbenu e più cunnisciute tempi fà.

Acque bicarbunatate calciche di

• Ornasu

• Dirza

 

Infine, in quant’à l’acque pocu mineralizate, u nostru studiu ci cunducerà à a surgente di :

Compieremu citendu unepoche di surgenti termali cunnisciute pocu è micca.

À trè chilometri da Balogna, à volu d’acellu, ci hè l’anziana stazione di Caldanelle, arruvinata avà, è vicinu à l’orlu mancu di u Fiume Grossu, avemu l’acque termali di Guagnu.

 

U golfu di Valincu presenta, seguitendu u so assu, una digitazione chì avanza in terrenu graniticu ; nant’à sta penetrazione, ci hè un’inzecca induve si trovanu i Bagni di Baracci. D’altrò, da Santa Maria Sicchè, si ghjunghje à a stazione termale di Vutera, à l’orlu dirittu di u fiume di u Taravu. À u sudeste di Zicavu, nasce u Travu, fiume di a costa orientale ; à u nordu di u Travu, corre l’Abbatescu; un inzecca, avendu un’orientazione più o menu listessa à quella di Zicavu, taglia i dui fiumi ; versu a so punta settentriunale si ramifiche­ghja à l’accorta, lascendu à manca a piccula lucalità di Petrapola ; a so stazione termale omonima si situeghja nant’à st’inzecca.

In a zona sedimentaria o cristallofiliana di a Corsica, numerose emergenze, induve corre u Fium’altu, anu un nome chì ramenta u gustu di e so acque :Acquacitosa, Acita­ghja.

A più cunnisciuta è a più primurosa hè a surgente d’Orezza (cumuna di Rapaghju) lu­calizata nant’à l’orlu drittu subitu vicinu à u fiume (un’emergenza si face in u rigu stessu di u Fium’Altu à qualchì metru da una surgente d’acqua propiu nurmale).

Quì, a zona tocca tettunicamente da accidenti d’orientazione Nordu-Sudu, hè fatta di « matticci lustrati », spessu alterati à gallu, è avendu in certi lochi accatastere lessule ar­zillose o arzillocalcarie, di tinta rughjina, ricca in ossidu di ferru.

Acque zulfose

Acque zulfate sodiche

Eccu l’indicazioni principali :

In Rumatolugia : manifestazioni artritiche è artrosiche pluri o monoarticulari – a pe­dagra.

In Trumatolugia : resti di trumatismu ossutu, articulare è di e parti molli.

In Dermatolugia : dermatose torpide : acne, infezzione di a pelle, ulceru varicosu, ras­piu, sfogu di a pelle.

In O. R. L. : affezzioni di e vie respiratorie suprane.

St’acque ponu esse aduprate in Ginecolugia pè e e metriti ; in Urolugia pè e cistite ; in Oftamolugia è in i disturbi di a circulazione venosa.

In rumatolugia

I rumatismi cronichi sò sindromi di reazzione osteoarticulare avendu cause assai di­verse è, in cumunu, un’evuluzione lenta è a resistenza.

U termalismu ne hè u trattamentu u più anzianu è ghjè sempre in usu. Ogni forma di rumatismu pò esse medicata da a crenofanguterapia durante l’evuluzione di u male. L’orientazioni sò sfarenti secondu e forme anatomocliniche.

 

I rumatismi cronichi infiammatorii

Ogni forma di poliartrite cronica evulutiva nanz’à a stallazione di sfurmazioni fissate è irreduttibili, deve esse trattata da l’acque zulfose è da e fanghe. Listesse cure pè a spon­dilartrite agranchente quand’ella hè a più vicina di u so principiu.

 

 

I rumatismi cronichi degenerativi 

A cosartrosa

In stu casu, l’indicazione di l’acque zulfose hè à u livellu induve l’alterazione di u capu femurale è di u cutilu hè minima.

A pedagra hè un’indicazione cunnisciuta di l’acque zulfate Corse.

A pedagra cronica hè migliurata assai da st’acque.

Eppuru, ùn ci vole mai à fà a cura durante e crise, ma sceglie e periode atoniche, cù una perioda di latenza prulungata, s’ellu hè pussibule.

Pè st’indicazione, P. Zuccarelli cunsiglia piuttostu a cura di beiende è ba­gni scarsi : « l’effettu diureticu di l’acqua cagiuneghja prestu scariche d’urati ».

 

 

In trumatulugia

L’acque zulfate sodiche medicheghjanu dinù :

E truncature urdinarie, e truncature assudate male, i calli voluminosi o dulurosi. Per quessi, P. Zuccarelli racumandava a duscia cù massaghju metodicu.

L’artriti per via di e truncature, e periartriti, e sticchitezze articularie, cagiunate da l’immubilizazione d’un membru, l’artriti croniche di dopu u trumatismu.

U trumatismu di e parti molle, pistature prufonde, e cuntratture muscularie, tendinee cagiunate da ste piaghe.

E piaghe fatte da sparate.

Grazia à i prugressi di a terapeutica chirurgica è fisica, a crenofangoterapia hè un mezu assai attivu pè luttà contr’à e cunsequenze di trumatismi.

In dermatolugia

L’acque zulfose medicheghjanu e dermatose torpide. Sò cunsigliate à e persone cù a pelle grassa.

Pè st’indicazione, ci hè bisognu di una pulverizazione lucale è schizzi filiformi, bagni, dusce generali, stufe. L’acque Corse zulfose, per via di a so ontuosità, calmanu e prudite è seccanu i suddiccimi.

 

Indicazioni

E dermatose irritative : prudita, dermite artificiali, eritrodermie è rosacee, i raspii acuti è subacuti, rossi è suddicianti (ch’elli sianu papulovesiculosi à lesioni gruppate è spar­gugliate, o verniciate) ; u raspiu irritabile di a faccia, quelli assai pruditosi di l’anu è di a vulva.

D’altrò, un’altra categuria maiò cuncoglie e prudite acute o croniche, generalizate o parziali (periurificiali in particulare), e nevrodermite, eppo e prudite à crescimognuli, ch’ellu si tratta di e forme di Besnier, di prudite nodularie o d’urticarii cronichi.

Omu medicheghja dinù paracheratose psocriasiforme, raspii fissi lichenificati, lucali­zendusi à i goviti, tupezzi, troncu è regione pubica.

Trà u sestu è u decesimu ghjornu, s’affacca in 70% di i casi, a « crisa termale » avendu un’intensità variabile, ma di regula hà una previsione favurevule.

Dopu à un periuducciu d’inacerbimentu di i fenomeni lucali, spuntanu i segni di mi­gliuranza. Eppuru, a migliuranza a più interessante hè quella chì principia dui o trè mesi dopu à u trattamentu idrominerale. In i casi favurevuli, dui o trè seghjorni successivi à a stazione bastanu pè curà bè a dermatosa.

E dermatose torpide : acne, seburea, folliculita è dermatose micrubiane sò curate da l’acque zulfate.

E dermatose squamose : L’acque zulfate in Corsica sò rinumate in stu duminiu. Cusì, a riputazione di a surgente di Caldanella di Mosi hè d’avè « imbianchitu » parechji sfoghi di a pelle.

In otorinolaringolugia : L’acque zulfate sodiche sò efficaci nant’à e rinite spasmodiche periodiche è aperiodiche scantate o ligate à l’asma, nant’à e rinite atrofiche, u coriza cro­nicu, e sinusite, l’otopatie rinogene tubotimpaniche è e laringite.

In ginecolugia : Pè u più, l’acque zulfose sodiche calde sò aduprate in i fenomeni in­fiammatorii torpidi.

In urolugia : A cistite cronica senza sfogu infiammatoriu, a blennorragia acuta o cro­nica.

In oftalmolugia : P. Zuccarelli hà custattatu dinù chì st’acque avianu l’effettu di culliri disinfettanti è appacianti in e cunghjuntivite croniche è blefarite cigliari.

Contrindicazioni di l’acque zulfose, zulfate sodiche

E cure in acque zulfate sò pruibite :

1. In ogni affezzione acuta

2. Ind’è i cardiachi, Ind’è e persone avendu un sfogu di pedagra

3. Ind’è e persone predisposte à e cungestioni è emurragie

4. Ind’è i nervosi quand’elle sò in crisa o eccitati

5. Ind’è i tuberculosi in crescita di frebba o emotisica

6. Ind’è e persone avendu un sfogu di pedagre

7. Ind’è l’arteriosclerosi

8. Ind’è i diabetichi

9. Durante a gradivanza

10. Ind’è e persone assai indebulite.

 

 

U Stabilimentu termale di Petrapola

Ricunnisciutu dapoi u 7 di ghjugnu di u 1978, u ghjettu di e so surgenti hè di 200.000 litri à ghjornu. Sò acque zulfate, sodiche è ipertermali.

Situazione

Petrapola, paisucciu dipendendu da a cumuna d’Isulacciu di Fiumorbu hè situatu à 115 m d’altitudine nant’à un pianottulu graniticu.

Pruprietà fisiche

Surgenti di a stazione :

Rastellu sorge à 55°

Spiritatu à 54°

A Doccia à 53°

A Leccia (micca misurata)

A Vasca

Si tratta d’acque azurate, avendu un odore pocu zulfatu ma sò abbastanza piacevuli da beie. Grazia à a silice è i silicati, sò ontuose quand’omu e tocca. Si rimarca assai glairina induv’elle sorgenu, in e vasche chì e cuntenenu, eppo in i cundutti chì e disacquanu, cu­lurendu questi da u neru à u rossu accesu.

U ghjettu di st’acque franca i 200 000 litri à ghjornu.

Equipamentu

L’équipamentu termale hè cumpostu di 14 bagnarole situate in cabine grandi è di duie piscine.

L’acque si ponu alterà. Omu ùn pensa à imbuttiglialle ; e so virtù terapeutiche facenu prò solu à a surgente stessa.

Oghje, grazia à travaglioni di rinnuvazione, di mudernizazione è di rispettu di e norme, l’amatori di u termalismu puderanu apprezzà e benfatte di l’acque è a qualità di l’accu-glienza di stu stabilimentu.

Indicazioni : Malatie di l’apparechju lucumutore

Altre indicazioni : Rumatismu, artrite, artrosa

 

 

 

Guagnu

Situazione

Nant’à a sponda manca di u Fiume Grossu, supranatu da i scusciali di a punta di Fur­cinelle (1371m), ci hè u paese di Guagnu (pieve di Vicu).

Pruprietà fisiche

A stazione cuncoglie duie surgenti chì anu pruprietà distinte. A principale si chjama surgente Venturini, u so ghjettu hè vicinu di 70 000 litri à ghjornu.

L’altra hè a surgente Coghja, sorge à più o menu 800m da u stabilimentu termale in un casamentucciu abbastanza sgangheratu, à l’orlu di a strada.

A temperatura di l’acqua di Guagnu serebbe di 52°.

À u puntu di sversime in a vasca, cala à 49°.

A temperatura d’emergenza di a surgente suprana hè di 37°.

Equipamentu

Stu bellissimu edifiziu in petre à arcate hà duie ali impunenti à fiancu à u casamentu centrale fundatu nant’à trè livelli.

U stabilimentu termale cuncoglie 40 bagnarole, 20 bagni di vapore individuali, 5 sale di massaghju. Versu 38°-40°, sti bagni di vapore permetteranu di racoglie e pruprietà più numerose di u bagnu di vapore senza l’incunvenienti (stanchezza, contrindicazioni ind’è i cardiachi).


AVVENE

L’avvene di sta stazione prumette. Stu fattu mostra chì, cù l’iniziativa è di sicuru capi­tali, si pò rializà in Corsica cinque o sei stazioni primurose, micca cuncurrenti, ma chì si cumpletanu, pè rializà una putenza termale avendu abbastanza capacità d’accuglienza.

 

U centru termale di Guagnu prupone cure trattendu a rumatolugia cù a presenza me­dicale è quella di un osteopatu eppo piccule cure pè esse torna in salute : Aerobagni, rilasciu, bagnu di vapore.

Vutera

Situazione

Quandu a strada da Santa Maria Sicchè à Zicavu entre in a valle di u Taravu (sponda diritta) si trovanu i bagni di Vutera. Ingiru à u stabilimentu termale sò cuncolte unepoche di case è un’osteria.

A stazione hè situata à 431m d’altitudine è u paese si trova à 3 chilometri da i bagni.

Da u nordu, si pò andà in Vutera passendu in l’Inzecca, dopu in e Strette è a bocca di Verde.

Pruprietà fisiche

L’acque di Vutera sò colte in una grande conca circulare cuperta. Anu un aspettu azu­ratu limpidu. Sò ontuose à u tuccà.

Certi autori mintuavanu un ghjettu di 380 000 litri à ghjornu.

P. Zuccarelli parla di 180 000 litri à ghjornu. In fatti, u ghjettu di sta surgente hè unu di i più diviziosi di Corsica. A temperatura di l’acqua in a conca di colta hè di 45°.

Esiste dinù in Vutera una surgente zulfosa fredda (19°) à 150 metri da a surgente prin­cipale. Questa ùn hè nè analizata nè aduprata.

Equipamentu

Ingiru à una piazzetta umbrosa, à mezu à u paisolu, si trova u stabilimentu termale di petra à dui piani.

À u pianterrenu, ci sò 18 cabine di bagnu. Quattru sò doppie. E bagnarole sò vernic­ciate à modu di petra rinaghja.

À i piani, ci era un bella usteria ch’ùn hè più aduprata perchè hè frusta. D’altre l’usterie in paese bastanu pè i pochi curisti.

 

 

Baracci

Situazione

U golfu di Valincu hè unu di i più belli è di i più famosi di Corsica. Pruprià, lucalità estiva affascinente, portu di piacenza è di cumerciu, ci si trova nant’à a pendita suttana. I bagni di Baracci sò in fondu à u golfu maestosu, à menu di 1 chilometru da a marina.

Pruprietà fisiche

L’acque di Baracci sò colte à mezu à u stabilimentu termale. U ghjettu attuale hè di 115 000 1/ghjornu (secondu P. Zuccarelli).

Stu numeru hè u minimu ; altre infurmazioni verisimili amentanu 360 000 litri à ghjor­nu.

E stallazioni di l’usteria sò pruviste da una stallazione centrale chì mette in pressione l’acqua.

L’acque di Baracci sò più legere è più assimilevuli chè l’acque di Petrapola o Guagnu.

St’acque sò apperitive è stimuleghjanu e funzioni digestive.

Equipamentu

I bagni di Baracci sò situati in un stabilimentu vicinu di l’usteria, dettu «Grand hôtel Baracci». St’usteria cuncoglie 30 camere è hè stata custruita in u 1928.

Urbalacone

Situazione

A stazione d’Urbalacone hè situata nant’à a RN 196 trà Sartè è Aiacciu, à una quaran­tina di chilometri da a cità imperiale.

U stabilimentu termale si trova sottu à a strada, à l’orlu di u Salice, affluente di u Ta­ravu. Ci hè dinù un’osteria.

Pruprietà fisiche

A colta in Urbalacone hè doppia.

Cusì, da una banda, in e piscine l’acque sorgenu in a pareta di e conche, è da l’altra banda una colta particulare hè rializata pè e beiende.

A temperatura d’emergenza hè vicina di 35°. U ghjettu glubale di e surgenti serebbe di 36 000 litri à ghjornu. Tempi fà, era di 120 000 1 secondu Pietri.

Equipamentu

Ci hè un’usteria di 27 camere, pruprietà di M. Casanova. Hè custruita in petre di u rughjone è u so impiazzamentu hè magnificu, à fiancu à u poghju, vicinu à a strada na­ziunale ch’ella suprana.

Da l’altra banda di sta RN 196, si trovanu e stallazioni anziane, rinnuvate in u 1973.

Indicazioni

Vie di a respirazione (ORL) [ricunnisciute è rimbursate da a Securità Suciale]

Altre indicazioni : Rumatolugia – Dermatolugia – Sfogu

Ulceri varicosi (dermatose) [ricunnisciute da l’Accademia di Medecina]

Caldaniccia

Situazione

L’acque di Caldaniccia scaturiscenu in un locu bellu predilettu, à 8 chilometri solu d’Aiac-ciu, nant’à a sponda diritta di a Gravona, à un’altitudine vicina di quella di a cità : 15 metri.

Pruprietà fisiche

U ghjettu ùn hè tantu impurtante : 20 000 litri à ghjornu. A temperatura d’emergenza hè di 34°4.

A colta ùn basta manc’appena è hè frusta.

Equipamentu

A surgente di Caldaniccia cuncoglia un stabilimentucciu induve si truvavanu 20 cabine cù bagnarole in zingu, frà queste 4 cabine à 2 bagnarole.

In u 2003, u cunsigliu generale di Pumonte hà messu in opera a riabilitazione di a stazione termale abbandunata dapoi più di cinquanta anni. Un centru di rivittulita ci pu­derebbe esse stallatu dopu à un’autorizazione ministeriale di sfruttamentu.

Castagnetu d’Alisgiani

Surgente termale zulfosa situata vicinu à a surgente ferrughjinosa di Pardina, in a valle mezana di l’Alisgiani, nant’à a strada da Cervioni à Pedicorce, à più o menu 18 chilometri da Cervioni.

 

Suddacarò

Surgente ramata sodica, vicinu à u paese di listessu nome, in u cantone di Pitretu Bic­chisgià, sott’à a bocca di Celaccia, nant’à RN 196 trà Sartè è Aiacciu.

Secondu ciò ch’è no sapemu, sta surgente ùn hè stata analizata.

Travu

Surgente ramata sodica situata in u cantone di Prunellu di Fiumorbu.

Funtanellu

Surgente ramata ferrughjinosa in u rughjone di Sulinzara, cumuna di Sari.

Acque ramate calciche o zulfidriche.

Puzzichellu

Situazione

I bagni di Puzzichellu sò situati nant’à a cumuna d’Aghjone. A stazione cuncoglie quattru surgenti.

E surgenti sfruttate anu un ghjettu di 15 000 litri à ghjornu. A so colta hè bella sem­plice, quasi naturale. Anu un metru di distanza è a so cumpusizione chimica hè sfarente.

Surgente di manca : esce da u scogliu per mezu di una grundaghja semplice in petra. Quandu si tocca l’acqua, hè assai untosa. U so aspettu hè appena torbu, hà un culore opa­linu. Carrieghja parechji fiocchi grisgi di tippu bituminosu è glairina. À l’inghjò, dopu à un cuntattu cù l’aria, diventa propiu torba è lattosa.

Surgente di diritta : hà u ghjettu più o menu listessu chè a prima. A so acqua hè linda è chjara.

In stu vallu incastratu, si sente assai l’odore d’idrogenu zulfatu, chì vene da e surgenti. Hè percepitu da luntanu. Quandu omu e tasta, l’acque sò agrette è amare ma micca spia­cevuli. A so temperatura d’emergenza hè di 17°.

Pruprietà terapeutica

Indicazione

L’acque di Puzzichellu ponu esse paragunate à l’acque d’Enghien è Allevard ancu s’elle sò più ricche in H2S (zulfu d’idrogenu). A so cumpusizione chimica face induvinà e so virtù terapeutiche assai putenti.

Azzione generale

U so rolu in a natura pare di prima trinca. Ci hè capunanzu un’azzione Anafilattica mustrata à modu sperimentale, ma i so trè effetti primurosi sò :

1. Un’azzione plastica o anabolica. U zolfu chì si trova in ogni molecula organica, è in particulare in l’emoglobina, agisce nant’à a truficità generale di l’organismu.

2. Un’azzione energica o catabolica. U zolfu entre in l’organismu pigliendu a forma di l’idrogenu, st’ultimu hè zulfatu da u tubu digestivu.

3. Un’azzione nant’à u sistemu nerbosu vegetativu.

 

Azzione lucale

Qualsiasi u so modu d’assurbimentu, u zolfu si strughje à livellu di a muccosa respira­toria pigliendu a forma d’idrogenu zulfatu.

 

1. Nant’à e secrezioni chì stancianu dopu à l’inacerbimentu di a crisa termale.

2. Nant’à a circulazione per mezu di a vasodilatazione di a muccosa.

 

3. L’idrogenu zulfatu agiscerebbe nant’à e terminazioni nerbose anestesiendule, cal¬mendu u dulore è l’irritabilità di a muccosa.

4. Infine, à modu sperimentale, l’acque zulfate distendenu a bronca scantata.

5. Cù st’azzione mudificatrice, ci hè u rolu fibroliticu di u zolfu nant’à l’elementu so¬lerosu cusì primurosu in e malatie respiratorie.

 

In O. R. L.

Coriza cronichi è acuti chì si ripetenu, ozenu è rinita atrofica semplice, rinite cunges­tive è iperestesie pituitarie.

 

Rinofaringite croniche, faringite croniche, granulose o ipertrofiche, amidalite lacuna­ria casgiosa, ipertrofia di i toli di l’adultu è di u zitellu, ipertrofia lucalizata o diffusa di e vegetazioni.

 

Surdità rinogene.

Laringite croniche, catarrali, granulose o ipertrofie.

Equipamentu

U stabilimentu termale di Puzzichellu era pitturescu, sputicamente corsu è cumpostu di teghje.

Caldanelle d’Appriciani

 

In a parte bassa d’un tragone silenziosu, trà u paese pitturescu di Balogna (à 3 chi¬lometri), a bocca di Sant’Antone (à 5 chilometri) è a sapara di l’Aratu (2 chilometri) sorgenu l’acque di Mosi, chjamate dinù Caldanelle (bagnucci) d’Appricianu.

St’acque sorgenu à una temperatura di 33° è a surgente hà un ghjettu di 15 1/mn.

 

Vadina

Surgente zulfata calcica à u nordoueste di u stagnu d’urbinu, nant’à a R.N. 198, in u rigu di u ghjargalu di Funtana Vechja.

Vetta di Muru è Caldane

L’acque di l’alta valle di l’Ascu cuncoglienu duie surgenti :

• Vetta di Muru, à qualchì chilometru da u paese chì hà avutu u nome di u turrente di a valle.

• Caldane, à mezu à a valle di Crucetta.

 

L’acque ferrughjinose :

 

• Orezza

• Caldane d’Ampugnani

• Pardina

• Moita

 

Orezza

Situazione

A Surgente Suttana, detta « Surgente dipartimentale d’Orezza », hè stata colta à u locu stessu induv’ella esce da u granitu. Canalizazioni di vetru a prutegenu da l’infiltrazioni è da e piuvite, eppo a cunducenu à un paviglione. Omu ci pò beie l’acqua chì sorge sbullac­chendu in una vasca larga.

Prupietà fisiche

À l’emergenza, in sta vasca massiccia di granitu cuperta d’una campana di vetru, l’ac-qua spuma, sciuma è lascia sgagià grosse busciche d’acidu carbonicu.

A temperatura di st’acqua hè stabile : 13°C (più o menu 2°).

U ghjettu di a surgente hè di 100 1/mn, siasi 144 000 litri à ghjornu. U so savore hè acrettu, pizzichente. Stu gustu ferrughjinosu ne face una beienda piacevule. À a surgente, l’acqua hè limpida è trasparente.

Sposta à l’aria, l’acidu carbonicu ch’ella cuntene si libereghja, inturbidisce l’acqua ; emergenu numerose perle di gasu carbonicu, eppo l’acqua ripiglia a so limpidezza. Cusì, hè stata chjamata « l’acqua di SELTZ ferrughjinosa ».

Ogni surgente simile, in stu cantone, presenta, à l’inghjò, dipositi rossi di carbunatu di ferru.

Pruprietà terapeutica

Indicazioni

1. Apparechju respiratoriu

• anemia cagiunata da un’emuragia di u nasu

• bronchita cronica

• tisica (phtisie) cronica senza frebba

• pleuresia

• broncorea

• dilatazione di e bronche

St’indicazioni anu persu assai forza grazia à e terapeutiche nove.

 

2. Apparechju circulatoriu è sanguignu

A clorosa :

L’acqua ferrughjinosa determineghja spessu qualchì fenomenu cungestivu cù sensa­zione di briachina, di sveghja è, ogni tantu, vomiti.

L’anemie ipocrome sintumatiche :

• anemia ipocroma tuberculosa

• anemia ipocroma sifilitica

• anemia ipocroma parasitaria.

 

Anemie globularie :

• anemia cù spugliazioni sanguigne (ogni tippu d’emuragia, intervenzioni chirurgi­che)

• anemia di e malatie infezziose

• anemia di e persone soprastanche

• anemia culuniale


     Sistemu nerbosu :

« In e nevralgie di i clorotichi, di i paludosi, a guariscenza hè assicurata ».

 

Apparechju digestivu :

• dispepsia

• gastrite

• atunia gastrica

• enterite

    Apparechju genito-urinariu

• amenurea

• nefrite

• diuresi

 

Contrindicazioni

1. À i sugetti forti, pletorichi, cungestivi.

2. Ind’è i cancherosi.

3. In l’affezzioni acute.

4. Ind’è i tuberculosi.

5. Ind’è l’ulcerosi.

6. In l’affezzioni epatiche severe.

7. Ind’è l’epilettichi.

8. Ind’è i sugetti eccitevuli.

9. Ind’è i sugetti patendu emuragie diverse.

 

Equipamentu

À a fine di u seculu scorsu, l’amministrazione fece custruì un stabilimentu bellucciu chì cuncuglia sale di bagni, di dusce, di massaghju.

 

Caldane d’Ampugnani

Sta surgente hè situata nant’à a strada dipartimentale 506 chì cunduce in Orezza par-tendu da Fulelli.

A temperatura à a funtana hè di 11°. Hà un ghjettu abbastanza cunsequente chì pò valutassi secondu noi à 25 000 litri à ghjornu. Dipositi ferrughjinosi si ponu vede sott’à a surgente. Un’analisi di l’annu 1963 dà 1,079 mg/1 di bicarbunati eppo cloruri, zulfati.

 

Pardina

L’acque di Pardina sò situate in a valle di l’Alisgiani, sott’à Quercettu, paisolu di a cumuna di Valle.

Moita

Ghjè una surgente ferrughjinosa bicarbunatata calcica, vicin’à Matra, nant’à u situ di a Bravone, strada dipartimentale 17.

Acqua bicarbunate calciche

Ornasu

Situazione

Pè andà in Ornasu, si piglia a strada di Petrapola. À 2500m dopu à Migliacciaru, à una crucivia, si gira à manca è si seguita un chjassu in terra eppo un ponte metallicu nant’à l’Abbatescu. A surgente d’Ornasu hè situata daretu à una casa cinta di buschetti.

Prupietà

A colta hè assai rudimentale ; si tratta solu di un tufone accunciatu in un petronculu. Hè difettosu perchè avemu rimarcatu chì, subitu vicinu, l’acqua zirlava à traversu à u scogliu. U ghjettu hè debule : 5000 litri à ghjornu.

St’acqua hè fresca fresca (15°2) è limpida. Hà un gustu assai punghjente è acitosu.

L’acqua d’Ornasu hè vaculativa, digestiva, diuretica è ricustituente per via di u ferru ch’ella cuntene. St’ultimu si digerisce bè è hè assimilatu faciule cù l’influenza di l’acidu carbonicu. Hè racumandata in e dispepsie gastrointestinali, colite spasmodiche, diarrie, enteralgie è dischinesie biliari, ind’è i nevropati, i spasmodichi è i nerbosi.

Acque pocu mineralizate radiottive

Dirza

Situazione

L’acqua di Dirza, o ancu Uragiu, scaturisce in u cantone de Calinzana, nant’à a cumu­na di Ziglia, à 320m d’altitudine. À qualchì centinaia di metri sopr’à u paese, marchjendu nant’à un chjassucciu, si ghjunghje à un casone vicinu à a surgente.

 

Pruprietà fisiche

Avendu una limpidezza perfetta, l’acqua di Ziglia ùn hà nè odore nè savore particulare. Hè assai piacevule da beie. In più d’esse pocu mineralizata, a so pruprietà essenziale hè a so radioattività « cum’è l’acque medicinali francesi assai radioattive ».

L’analisi mostranu chì l’acque di stu paese anu una mineralizazione da 110 à 120mg/l. In paragone, l’acque d’Evian sò trà 275 à 285mg/l.

Pruprietà terapeutica

A causa di u cuntrastu tra a mineralizazione debule di l’acque di Ziglia è a so virtù terapeutica, ghjè a radioattività.

Sò acque « fisioterapiche » à l’incuntrariu di l’acque « chimioterapiche » chì e virtù terapeutiche sò esciute da a so mineralizazione.

Cunclusione di stu cartulare

   « A pratica termale tradiziunale, in Corsica, hà sappiutu cuabità è campichjulà cù e duttrine ufficiali di a scienza perchè si fonda nant’à un sistemu di riprisentazione di a persona apertu nant’à ogni campu di a cumprensione umana. U paragone di i testi di i sapienti lucali o di i medichi di distrettu cù e pratiche lucali pupulari ci porghje infur­mazioni nant’à u dialogu è nant’à e tensioni trà e tradizioni è l’autorità di a scienza è di l’Amministrazione. A storia di st’urigini pò chjarificà e rilazioni trà medecina sapiente è medecina pupulare è palisà e leie particulari di stu territoriu meridiunale cù u putere cen­tralizatore di u Statu è di i lochi di u sapè ».

Federica TamarozziI, incaricata di ricerche è di cullezzione à u Museu naziunale di l’arti è tradizioni pupulari.


Leie :
www.corsica.net/corsica/fr/sejours/thermal/
perso.wanadoo.fr/palneca/bains_de_guitera.htm
adecec.net/adecec-net/parutions/thermalismecorse2.html
www.lacorsemysterieuse.com/caldane.htm
membres.lycos.fr/antisanti/puzzichello.htm
www.orezza.fr/default.htm
www.cths.fr/4DACTION/www_Con_Communic/76

- « Manuel d’hydrologie, eaux potables et eaux minérales », Dr. Émile Fleury, 1896.  (Stu libru descrive e stazioni termali di l’epuca, in l’Europa sana. Grazia à a Bibliothèque nationale de France, pudite cunsultallu gratisi nant’à u web).

 


ADECEC Cervioni

Musée ethnographique (visite audio-guidée multilingue):
ouvert tous les jours (sauf dimanche et jours fériés)
de 9h à 12h
et
de 14h à 18h.

Radio Voce Nustrale sur 105.1 et 95.1 mhz et
sur internet:
http://voce.fr.fm

Banca INFCOR sur internet: http://infcor.fr.fm Site internet: http://adecec.net

Email: adecec@adecec.net Téléphone: 04.95.38.12.83 Fax: 04.95.38.19.51

Pam ADECEC : pam@adecec.net  - 04.95.35.16.99

E paruzione, a banca di lingua corsa, i lessichi è altri travagli di l’ADECEC, nant’a u web.