A nutizia hà stesu eri u so velu di tristezza: Antone Ciosi ùn hè più. Hà raghjuntu l'altru mondu in a notte da sabbatu à dumenica in a so casa di Corbara in Balagna. A nutizia cumove a Corsica sana è al di là, tutti l'innamurati di canzona corsa. Antone Ciosi n'era un tercanu tantu ch'ellu hà sappiutu marcà st’universu di u cantu corsu da a so persunalità attaccante, è di u so arte artisticu. Antone Ciosi era a canzona corsa, è sin'à l'ultimu, hà campatu da a so passione per u cantu, per a lingua è per a cultura corsa.  

L’ultimu viaghju d’Antone Ciosi, u tragulinu di a canzona corsa, hè previstu in chjesa di Corbara issu mercuri 7 d’uttobre, induve sò state celebrate e so esequie. 

L'Adecec è Voce Nustrale sò in dolu è s'assucieghjanu à u dulore di a so famiglia.