A cumunità di cumune di Castagniccia-Casinca s'addunisce à l'umagiu à Geneviève Moracchini-Mazel pè i cent'anni di a so nascita. Sta persunalità frà i piunieri di l'archeolugia è di a storia di l'arte in Corsica, hè di Talasani, in Costa Verde. S'hè stallata in U Querciolu, nant'à a cumuna di Sorbu-Ocagnanu in Casinca. A "grande dama di l'archeolugia di a Corsica" ci hà travagliatu assai durante più di sessant'anni d'attività. Frà i so cantieri maiò in Castagniccia-Casinca, si pò cità e so operazione d'archeolugia d'urgenza ind'a piaghja di U Viscuvatu, à i Palazzi, in A Venzulsca, in I Fulelli, nant'à e vistiche antiche è i resti di a torra litturale di San Pellegrinu induve hà ricercu indarnu e ruvine di l'anziana cappella da induve s'imbarcava versu l'isula di Montecristo è u so munasteru benedittinu chì pussede terre ind'a nostra regione. A muntagna è l'internu ùn sò micca stati sminticati. Da u situ appullatu di San Ghjacumu (Saghjapicu), in Penta, feudu di i signori Cortinchi ghjunti à impadrunissi in Casinca versu u XIIIu seculu à a cima di u Sant'Angelu. Avemu dinù e chjese pievane (cum'è in Casalta) o edifizii rumani più mudesti. Hè stata a prima à fà l'inchiesta sin'à u San Petrone, in Quercitellu, induve e so ricerche iniziale, cum'è tant'altre intraprese nant'à u nostru territoriu, anu da esse ripigliate in u quadru di a labellisazione "Paese d'arte & di storia" diretta a cumunità di cumune di Castagniccia-Casinca. Via, a so lascita hè tamanta. Pè ritruvalla, venite u 24 d'ottobre, à parte da 9 ore è mezu, in chjesa pievana di San Brancà in u Castellà di Casinca. Dopu à e duie cunferenze di a mane nant'à l'architettura rumanica di quì è d'altrò, u dopu meziornu si ferà una visita guidata di parechji siti è monumenti anziani di Casinca induve Geneviève Moracchini-Mazel hà scumbattutu. Iscrizzione obligatoria : fagec@wanadoo.fr