menu menu_open
ADECEC

Di virtù, l'omagiu di a Scola di cantu à Natale Luciani

A Scola di cantu di Natale Luciani esce u titulu Di virtù, accumpagnatu d'un clip pè l'anniversariu di a morte di Natale Luciani, u 7 di dicembre di u 2003. Una canzona interpretata da i giovani è chì conta à Natale, militante puliticu è culturale cù un impegnu è una diritezza di prima trinca. Si pò vedelu nant'à a u canale You Tube à parte da l'8 di dicembre. U puetu, Dominique Santelli, amicu di Natale Luciani, hà scrittu u testu è Felì a musica. "Ghjè un amicu di a Scola, anch'ellu hà una scola di cantu, sà ciò ch'ella hè a trasmissione".

Daretu à stu titulu è stu clip, avemu u prugettu d'un dischettu di canzone cantate da tutti l'elevi di a Scola. Intantu, a so missione cuntinueghja. Si pruduce di rigalu in ogni locu induve hè chjamata. "Trasmette u cantu, a cultura, i nostri valori è dà à sente sta lingua pè chì ognunu ci possi vene à pocu à pocu. Hè cusì chì Natale avia cuncepitu a Scola" cunclude Gilles Andreani. Altru chè un maestru di cantu, Natale Luciani hà cuntribuitu à guidà nant'à u chjassu di a vita sta giuventù ch'ellu tenia in palma. Senza mischju di i generi. Senza dommatismu.