Nicolas Torracinta hè un musicante balaninu chì hà cullaburatu cù gruppi è artisti isulani (L’Alba, Barbara Furtuna, Zamballarana, Michè Dominici...). Impregnatu à tempu da u sonu di i gruppi anglo-sassoni, a folk americana è a musica tradiziunale corsa, si primureghja capunanzu di a pratica di a chitarra. Hà esciutu u so dischettu The Granary induve face cunnosce testi persunali tinti d’emuzione. 

A parolla hè a traduzzione di u granaghju, u locu ind’a so casa di Balagna induve l’opera hè stata arrigistrata. Un discu induve hà scrittu è cumpostu quasi tutti i tituli: Falling There, Eire Song, Find me by The River... Ballate cù una malincunia sorda chì cunvucheghja i murtulaghji di u meziornu prufondu di i Stati Uniti. Nicolas Torracinta hè accumpagnatu di musicanti di prima trinca : Fanou Torracinta, Jean-Jacques Murgia, Michè Dominici, Ghjuvanfrancescu Mattei, Bertrand Cervera, viulunistu di l'Orchestru Naziunale di Francia, o a viuluncellista Miwa Rosso, sulista di l'orchestru di a BBC.