menu menu_open
ADECEC

A miò storia, un viaghju musicale in a storia di a Corsica cù u gruppu Balagna

Un dischettu di 15 canzone, risultatu d’un travaglione durante u cunfinamentu. Creazione fundate nant’à ricordi d’ogni membru di u gruppu, di storie di e so famiglie. Canzone chì si cumpletanu. Quelle di Thierry Nobili, Sébastien Dussol, Andria Aitelli, Jean-Philippe Casta è Marc’Andria Castellani. St’ultimu hà scrittu è cumpostu tutte e canzone in un dischettu chì si presenta cum’è una tragedia in trè atti. L’apertura si face cù a canzona Ghjama. Questa punta a mancanza di a lingua è cultura corsa ind’è assai abitanti di l’isula. U populu corsu puderebbe diventà una pupulazione scusgita.

U primu attu chì seguita hè custituitu d’una seria di canzone, stalvatoghji nant’à e famiglie di u gruppu. « L’idea era di fà una storia chì cummove, una galleria di pitture, canzone pitturale ». In u secondu attu, si tratta di a guerra di u 14 è di u mondu mudernu, di a sucetà. A nostra sucetà muta à ogni livellu. A situazione in Corsica hè ammentata cù perdita di riferimenti, di a lingua, di u modu di vita nustrale. U terzu attu hè cum’è un attu di resilienza. Ci tocca à impadruniscesi di u nostru avvene, sapè campà in Corsica.

Parechji livelli di lettura di stu dischettu sò pussibuli. L’opera hè stata arrigistrata da Christophe Mc Daniel cù a participazione d’invitati : Francè Emmanuelli, Jérôme Ferrari. A magnifica stacchetta è l’illustrazione sò di Raphaël Poletti pè allusione à a storia di a Corsica cù Pasquale Paoli, Edmond Simeoni, l’ARC, Petru Guelfucci, Arritti, u gruppu Canta, u logo di Voce Nustrale « O Mà parlami corsu »… Infine, u dischettu puderebbe avè una seguita cù una cumedia musicale.