U gruppu bastiacciu Orizionte ci accumpagna dapoi 35 anni è hà esciutu u so 14u dischettu "A so strada - L'ombralume" cù e so 19 canzone à quandu felice à quandu malinconiche chì s'ispiranu di l'attualità, di a vita oghjinca, di fatti chì anu marcatu a vita di i fratelli Jean-Marie è René Andreucetti. Autori è cumpunidori, anu messu in musica i testi d'Anghjulu Orati, Jean-André Roudière, Francescu Maria Angeleri. A canzona di u titulu "A so strada" hè dedicata à Tony, u so fratellu, mortu à 62 anni in u 2020.

L'artisti sondanu l'anima corsa cù ste ballate nustrale sprimendu cù sincerità è sensibilità u so attaccamentu à sta cultura è à st'identità. Cù "Chì più bellu nun ci hè", cantanu un'isula ch'ùn si pò imaginà senza pastori. In "Duve anderanu", s'interrugheghjanu : "simu eredi di sta terra ma a questione hè di sapè sì no a meritemu". "Corsu mi ne stò" parla di st'anima chì ci vole à ritruvà è a so speranza in un avvene più bellu ma ci vole à dassine i mezi. "Cume tant'anni fà": quì avemu a nustalgia di un'epuca induve si pigliava piacè à cantà, di i numerosi balli è cuncerti in l'isula. In "Cunfinatu", contanu a so vita durante a perioda ch'è avemu campatu tutti. Infine, in stu dischettu, cantanu dinù Stefanu è Lisandru, i figlioli di René. U gruppu appronta u so cuncertu u 14 d'aprile à u teatru di Bastia.