Amparemu cù assai tristessa a sparizione d'Aimé Pietri, 91 annu. Dopu esse statu insignante durante 15 anni, era diventatu giurnalistu grazia à u giurnale liceanu 'Le troubadour'. Osservadore mai stancu, sempre passiunatu, faccendone, hà campatu tutti l'evenimenti maiò di a Corsica fendu u so mistieru cù intusiasmu è un'impertinenza simbulu di grande indipendenza di pensamentu è di ghjudicamentu. 

Currispundente di l'Agence France Presse (AFP) durante parechji anni, di RMC, RTL, France Soir, i giurnali taliani Corriere della Sera, La Nazione è di u giurnale alemanu Bild Zeitung. Aimé Pietri hè statu u creatore di a rivista Kyrn, di e stazione di radio RCI (Radio Corse international) è Corse Info. Hà rilanciatu u “Giurnale di a Corsica” in u 2000. In u 2016, hà publicatu 'Cinquante ans de journalisme en Corse', à l'edizione Anima Corsa, un libru riccu di i so più belli ricordi.