L’Università di Corsica hà presentatu à Gymcorsu, u so novu arnese numericu pè l’amparera ludica è faciule di u corsu ma chì ùn rimpiazza micca l’insignamentu in presenziale. Un serviziu dispunibule nant’à Facebook, Instagram, i mutori di ricerca è u situ di l’università. In fatti, st’arnese esiste dapoi l’annu scorsu pè i studianti, ma i so rispunsevuli ùn si sò micca scurdati di a so prima vucazione: dà a pussibilità à tutt’ognunu d’amparà u corsu grazia à l’arnesi numerichi. Una duzina d’insignanti anu travagliatu nant’à u sviluppu pedagogicu cù i specialisti infurmatichi di l’università fundendusi nant’à u mudellu di Gymglish. St’ultimu hà mustratu e so capacità pè l’insignamentu di lingue digià prupostu à più di cinque milioni d’utilizadori dapoi a so creazione in u 2004. Oghje, apre e so porte à a lingua corsa. “Secondu e risposte è u livellu di ogni utilizadore, l’arnese adatta a lezzione vultendu nant’à e mancanze per esempiu” spieca Julien Angelini, maestru di cunferenze in scienze di l’infurmazione è di a cumunicazione.

Dopu à un’iscrizzione grazia à un indirizzu mail, u candidatu sceglie a varietà linguistica ch’ellu vole travaglià : pumuntincu o cismuntincu. Dopu, principia a lezziò è parechje dumande si facenu cù i QCM in leia cù arrigistramenti vucali o testi. Esercizii di cunghjucazione o di grammatica cumpletanu u corsu. Dopu à a validazione, u risultatu è e currezzione s’affaccanu quasi subitu pè megliu capì i so sbaglii. U publicu cuncernatu ùn hè micca u nuviziu ma u locutore passivu chì hà digià qualchì basa. 50 lezziò sò digià dispunibule è si scumpartenu nant’à dui livelli. E 25 prime pè a sessione Gymcorsu 1 chì dura sei mesi à u più. Assai menu pè i più forti. L’altra metà hè a sessione Gymcorsu 2 nant’à a listessa perioda. A a fine, l’utilizadore pò ottene un livellu B2 di certificazione in lingua corsa. Attenti, Gymcorsu 2 ùn dà certificazione. Ci vole à passà quantunque l’esame à l’università ma hè una bona preparazione. L’università travaglia digià nant’à Gymcorsu 3 cù un cuntenutu più apprufunditu. Gymcorsu hè dinù un serviziu paghente. Pè sei mesi d’amparera, costa 126 euri dopu duie lezziò gratisi. 220 euri pè un annu è i dui livelli. A struttura s’indirizza dinù à l’intraprese è istituzione bramose di furmà u so persunale. U scopu hè di parlà di più u corsu in a sucetà isulana è si face di più cù l’utilizazione di e nove tennulugie.