Stu ghjocu hè statu creatu da i fratelli Ferdinand è Julien Laignier Colonna-Cesari à l'edizion Albiana. Tramindui passiunati di litteratura è di cultura pop ciottanu in u mondu ghjucarinu cù "Mazzeri La Corse, une nuit..." chì si fonda nant'à e fole è legende corse, veru patrimoniu immateriale isulanu. Hè un ghjocu interattivu cù identità secrete. I ghjucadori sò scumpartuti in dui gruppi : i Paesani (chì certi anu puteri) è i Mazzeri (accumpagnati d’Esseri malefichi). Ogni participante ghjoca un rolu definitu da a carta chì li hè attribuita à principiu di partita. Attenti, certi persunagi detti « Sulitarii » battenu in paese pè mischjassi à l'altri ghjucadori è pruvà à arrubballi a vittoria.

L'ogettivu di i ghjucadori dipende da u gruppu induve elli appartenenu : quellu di i Paesani hè di smascherà, eliminà o caccighjà i Mazzeri da u paese. Quellu di i Mazzeri hè di preservà a so identità secreta è di tumbà tutti i Paesani. Quellu di i Sulitarii hè di vince contr'à i dui altri gruppi. Animatu da un Capifulaghju fantaziosu è misteriosu chì cunnosce i roli d'ognunu, u ghjocu si passa secondu una successione di notte è ghjorni. L’intuizione, a ricerca d’indizii è l'arringhe di pettu à l'accusazione sò e vostre arme pè vince. E vostre azzione è e so cunsequenze determineghjanu l'avvene di u paese. Quale tradiscerete pè fà regnà u vostru gruppu ? Sin'à induve site prontu à andà pè vince ?