Una seria documentaria nova nant’à u patrimoniu di a Corsica hè diffusata à parte da venneri u 17 di ferraghju nant’à Via Stella à 9 ore menu un quartu. Furtificazione, castelli, palazzi, monumenti, edifizii religiosi o casamenti industriali sò u sugettu di a seria documentaria "Tesori di u patrimoniu corsu". Un viaghju pè cunnosce a storia, a nostra storia, u patrimoniu architetturale ingiru à noi grazia à specialisti è passiunati. Daret’à ogni edifiziu, avemu elementi di a nostra sucetà, di u so urbanisimu, a so architettura, i so sapè fà, a so vita culturale, religiosa, ecunomica è pulitica. Sta seria documentaria, scritta è rialisata da Dominique Lanzalavi, presenta sta ricchezza in parechje grande tematiche cum’è, per esempiu, e furtificazione, u patrimoniu publicu è a statuaria, u patrimoniu religiosu o ancu l’aventura industriale. L’evuluzione di stu patrimoniu sò cuntate in modu cronologicu cù esempii in l’isula sana, cummentati da specialisti, passiunati, artisti, artigiani è pruprietari chì aprenu e so porte è palesanu i so secreti, ogni tantu pè a prima volta. Primu appuntamentu dunque sta sera cù “L’isula furtezza”. 

Da u Neoliticu à u 20u seculu, stu primu episodiu volta nant’à l’evuluzione di e furtificazione isulane, grandi testimonii di a storia di a Corsica. Saperete cumu i primi castelli si sò custruiti è dopu quelli di i putenti signori medievali. Perchè Genuva hà rimanighjatu u paisaghju di l’isula strughjendu l’anziani castelli è edifichendu una reta di citadelle è di torre. E cumu i francesi anu mudernisatu dopu ste difese sin’à u XXu seculu.