Michel Vergé-Franceschi, prufessore emeritu di l’università, hà ricensatu parechje centinaie di famiglie corse à a riesciuta suciale fora di l’isula durante parechji seculi. Ci hè sempre una brama d’altrò è di libertà in u spiritu di i Corsi. In u filu di u tempu, sta cerca d’aventura è d’utopia hè unu di l’elementi di cunvergenza di parechji destini individuali è cullettivi in paesi induve parechji corsi sò riesciuti sucialmente. Ghjè stu mudellu d’integrazione riesciutu chì Michel Vergé-Franceschi descrive in stu libru. A parte da u rè Carlu VIII à u qundecesimu seculu, i Corsi cumencianu à fà cumerciu cù Marseglia, partenu à cunquista di Napuli. E guerre di Francescu Primu sò sustenute da parechji isulani. Prestu, famiglie corse ottenenu una situazione cunfurtevule è cunnisciuta in Marseglia. Frà quesse i Gentile di Brandu, i Napoleoni di Centuri, I Lenche è i Porrata di Mursiglia, I Baglione di Calvi. A famiglia Lenche, per esempiu, crea a più putente cumpagnia di cumerciu di u reame di Francia in u 1552-1553.

In una generazione, i ricchi mercanti diventanu consuli di Marseglia, magistrati, maestri calfati reali di l’arsanale di Marseglia. L’equivalente d’ingigneri di custruzzione navale oghje. Certi custruiscenu battelli, altri e calate di Rive Neuve sempre in Marseglia, u liceu Montgrand, l’usteria Lenche diventata più tardi usteria Mirabeau. Prestu e famiglie corse occupanu quasi tutte e funzione ecclesiastiche marsegliese. D’altrò, compranu numerose signurie rurale. I ricchi corsi volenu diventàdinù nobili. Per quessa, facenu valè una nubiltà linguistica cù i tituli “nobile”, “Magnifico” è “Illustrissimo”. I Corsi si facenu dinù naturalizà francesi grazia à belli matrimonii cù donne di Marseglia è d’Aubagne. A u XVIIIu seculu, si maritavanu cù numerose martinichese quand’elli si stallavanu in stu paese. Avemu dinù riesciute suciale in Porto Rico, in l’isule inglese di San Tumasgiu è Trinidad.