Felì hà esciutu u so novu dischettu Amparatemi à cantà. 24 tituli arrigistrati à u studio di Scola in festa è in live durante cuncerti à u Spaziu Carlu Rocchi. Ci si trova duie nuvità:  'Una sera in paese', canzona scritta da Patrick Croce è cumposta da Stefanu Travaglini è “Amparate mi à cantà” scritta da Felì. 22 tituli sò stati scelti da u publicu in e rete suciale cum’è i famosi “Golu” è “Quand’è tù balli” in versione corso-spagnola cantatu cù u percussiunistu cubanu Piro Barrios. Avemu dinù canzone più anziane cum’è “S'o era la voce” o “Stà torna appena”. D’altrò, un QR codice stampatu permette d’esse cunduttu nant’à una pagina numerica di u situ feli.corsica. Cusì, si pò telecaricà i testi è e traduzzione di Brandon Andreani. Infine, una canzona in umagiu à Ghjuvan Teramu Rocchi : Una cria di più' cun quale hà travagliatu durante 32 anni è anu scrittu più di 150 canzone. 

Cù st’opera nova, u canterinu s’apre una volta di più à u dialogu cù altre culture di u mondu. Dunque, un giru in Corsica è in Francia hè previstu in u 2024 pè scuntrà i corsi di fora è i so amichi. Sin’à avà, l’artistu s’hè primuratu pocu è micca di cantà fora di l’isula ma vole oramai scuntrà dinù un altru publicu, campà in altrò ciò ch’ellu risente quì per via chì e so canzone anu viaghjatu. U giru principierà l’annu prossimu à u veranu cù trè cuncerti in Corsica è dece l’estate. Dopu, si prusegue di vaghjime cù cuncerti in Nizza, Tulò, Marseglia, Ecchisi è à u Casino di Parigi u 19 di nuvembre di u 2024.