U tema quist’annu hè fruntiere, trà reale è imaginariu. In stu quadru, sò previste stonde di Lettura-spettaculu in canzona è puesia cù a Brigada d’Intervenzione Puetiche in parechji lochi di Cismonte.

Evucà e fruntiere, ghjè evucà capunanzu ciò ch’elle sò da un puntu di vista puliticu. Sò sempre un locu induve si pò passà ma micca sempre. Una limita chì si pò francà rispettendu certe cundizione. Una prutezzione ma ogni tantu un’imbusca assassina. Un spaziu da priservà quandu omu vole prutege un territoriu, una cultura è ghjè dinù una chjama à a trasgressione. Una trasgressione pè u peghju è a brama di cunquista, l’impierialisimu, a guerra. Ma dinù una trasgressione pè u bè, pè fughje a miseria, a viulenza. Fora di e fruntiere pulitiche, ci sò fruntiere suciale, interne, murale, sugettive, reale o fantasmate. Cusì, durante un’ora, a brigada d’intervenzione puetiche caminerà in ste fruntiere cù puemi d’autori d’eri è d’oghje, di quì è d’altrò è canzone d’autori corsi è francesi.