L’associu litterariu Musanostra esiste dapoi 15 anni. A so attività digià assai ricca aumenta cù a creazione di Musanostra Edizione. Dui autori li anu cunfidatu subitu e so opere: Jean-Philippe Toussaint pè “La chaise”, un testu presentatu è traduttu in corsu da Francis Beretti, è Jean-Baptiste Croce chì hà publicatu “En toutes confidences”, racolta di e so cronache publicate in u “Settimana” di Corse-Matin.  

Da l’associu litterariu Musanostra si cunnosce digià i caffè litterari, a mostra di u libru in Bastia, i scontri, in particulare E Statinate, u cuncorsu di nuvelle, u premiu Musanostra pè dui autori in lingua corsa è francese, e cullaburazione cù u museu di a Corsica pè organisà cunferenze è e cullaburazione cù altri evenimenti culturali cum’è i festivali di u filmu talianu, I Sulleoni, i belli scontri… 

Cù a creazione d’una nova casa d’edizione, un novu universu s’apre. Marie-France Bereni Canazzi, presidente di Musanostra, evucheghja a so prima sperienza in u duminiu di l’edizione cù u so cuncorsu di nuvelle, frà quesse e migliore sò publicate. Publicheghjanu dinù a so rivista illustrata. I rispunsevuli di Musanotra sò lettori è valurizeghjanu a pruduzzione litteraria è artistica isulana cù cronache nant’à u so situ internet, a rivista illustrata è invitendu dinù i scrittori durante i so scontri. Pè a creazione di a nova casa d’edizione, l’ogettivu hè d’un picculu numeru di publicazione à l’annu. E migliore sò publicate. I rispunsevuli insistenu nant’à a leia cù a Corsica quand’ella offre un’apertura à u mondu.