A grande famiglia di u Parcu hè in dolu. Cum’è un simbulu, l’ultima apparizione publica di Michel Lenhardt  hè stata pè u 50u anniversariu di u Parcu u 13 d’ottobre scorsu. St’anniversariu era appena u soiu, ellu chì hà iniziatu l’aventura di u PNRC cù François Giacobbi. A so ghjunta in Corsica in u 1969 in u quadru d’una missione di prefigurazione l’hà arradicatu pè u sempre. Sta missione devia sbuccà nant’à a creazione di u Parcu. François Giacobbi l’autorizava à impiegà i primi agenti è percorre l’isula pè fà ammette l’idea di sta creazione. Secondu Michel Leeehardt, st’istituzione simbulizava a ricunniscenza di u caratteru rimarchevule d’un territoriu ma dinù a dimustrazione di un’opera tamanta da fà.” 

Dopu à a so ritirata in u 1997, l’omu seguitava sempre l’evuluzione di u sindicatu mistu ch’ellu hà direttu durante 28 anni. Li dispiacia chì u Parcu ùn avia pussutu rinnuvellassi nè truvà a so piazza in a grande mutazione istituziunale chì creava parechji arnesi ambientali in l’isula. Michel Leeehardt avia sempre fede in un parcu oramai depusitariu di a so lascita è di a so memoria. D’altrò, hè ghjuntu parechje volte à l’ADECEC. E so visite à l’associu, à l’invitu di Dominique Mosca, amministratore, eranu numerose è dinù una stonda d’arricchimentu.