Austinu Agostini si n'hè andatu à l'altru mondu, vittima d'un dramaticu accidente. L'ADECEC è i so amichi rammentanu a so memoria.

Pasquale Ottavi rende ummagiu à u « Pueta d’altu stintu paisanu, gran’ cunniscidore di i fatti campagnoli, di a cultura pupulare sputica, chì parlava una lingua schietta, impruvisava, cantava bè, insignava à quale vulia amparà. »

Ghjuvan Petru Ristori ramenta e qualità di u puetone pregiatu è l’amicone stimatu : « O Caru di noi, o quante veghje, quante cantate, quanti serinati chè no' avemu intrappulatu cù quella indimintichevule è tremenda squadra. »

Nant’à e rete suciale, numerosi missaghji afflitti ammentanu u puetu di prima trinca impastatu di cultura corsa è tanti belli ricordi di beate stonde di cantate, è di chjama è rispondi sparte cun ellu.

Eccu una di e so puesie in ricordu di u so estru, testimunianza di l'amore d'Austinu pè u so rughjone di San Ghjulianu :

A torra di e caselle

In la piaghja di San Ghjulianu

À luce di sole è stelle

Sempre guarnita à veranu

À nidi di rundinelle

Sola sola à mezu pianu

A torra di e Caselle

In lampendu un sguardu à manca

Ghjustu in faccia à l'Albitrone

Un'antra chì hè di più stanca

Ghjè quella di lu Falcone

Chì à fighjalla è dilla franca

Ùn ci hè lu so paragone

 

In li seculi passati

Per difende lu s'onore

Si stavanu impichjulati

In cima à isse duie torre

I nostri vechji antenati

Pronti à tumbà è à more

 

Quelli eranu à stomachiccia

Feroci più chè lioni

Davanu la petturiccia

À mitraglie è à cannoni

Santu Appianu è a Scupiccia

Ponu fà i testimoni

Santu Appianu hè quellu sopra

À Linguizzetta è Canale

Ellu hà vistu ghjente è robba

Sempre andassine di male

Invaditi da l'Auropa

A putenza universale

Propiu induve ella s'appiccia

A ghjura incù Santu Andria

Ci hè impiantata a Scupiccia

È ci stà Santa Maria

L'ochju sempre à la batticcia

Induve lu nemicu seria

 

M'accade bellu sovente

Di ghjunghje à isse duie torre

È mi si pare di sente

L'anima chì ùn vole more

Quella di lu Corsu ardente

Chì si batte per l'onore

Hè vera lu Corsu ardente

S'ellu hè cercu in u so ghjocu

Ghjè cum'è lu fulminente

Ind'ellu intuppa caccia focu

U passatu è lu prisente

L'anu provata inghji locu.

A. Austinu