U duettu Fiuminale, cumpostu di Maxime Merlandi è Jean-Philippe Guissani, anziani di Barbara Furtuna, cantava venneri u 5 di maghju in a chjesa San Tumasgiu di Belgudè. I dui artisti si ritrovanu pè sparte i canti chì anu puntellatu u so percorsu : canti tradiziunali, sacri è creazione. Contanu in musica un'amicizia di più di 40 anni senza esse mai nustalgicu. U cuncertu di Belgudè hè u primu in Corsica dopu à una sessantina fora di l’isula. 

A capu di 20 anni d’esistenza di u gruppu Barbara Furtuna è più di 1300 cuncerti, anu avutu bisognu di cuntinuà un’altra storia, di piglià un novu chjassu cù una vuluntà di ritruvà una voglia ch’elli avianu forse appena persu. Tramindui volenu cambià, ùn volenu ripruduce ciò ch’elli fecianu à quattru. Anu sempre scrittu in i gruppi induv’elli cantavanu. Fiuminale hè un mezu di cuntinuà, cambiendu à tempu di via. Anu da cuncentrassi nant’à e so duie voce è nant’à a so storia cumuna. Una storia custruita cù sincerità. Anu principiatu cù a musica tradizunale nanzu d’esse statu assai influenzati da u Riacquistu, stu rimpadruniscimentu di a lingua, di e spressione artistiche è culturale è di i sapè fà.