Sabbatu u 27 di maghju, u situ anticu di u museu d’Aleria offrerà à u publicu spettaculi michjendu musica, teatru è ballu. ¨Prontu à traspurtà i visitanti ind’un mondu d’incantu cun arte, storia è creatività, Aleria Antica in Festa principierà à 2 ore cù u spettaculu itinerante “Les Noces du Minotaure”, creazione di a cumpagnia corsa TeatrEuropa in cullaburazione cù a cumpagnia taliana Trisetmas. Direttu da Orlando Forioso, stu spettaculu metterà in scena Marie-Paule Franceschetti, Marilyne Leonetti, Antoine Maestracci, Riccardo Mori, Pierantonio Savo Valente è Orlando Forioso ellu stessu. 

À 4 ore, presentazione à u publicu di u situ anticu è di l'anfiteatru da l'archeologu Franck Allegrini-Simonetti. Un’occasione unica di ciuttà ind’a storia di stu locu affascinente.

À 4 ore è mezu, u spettaculu di circulu "Di pezza, les automates de Dieu" prisentatu pè a prima volta in Corsica da a cumpagnia Red one duo, cù Chiara Serges è Gabriele Gonzo.

À 5 ore è mezu, cuncertu in chjesa San Marcellu. Sott’à a direzzione d'Antonu Marielli, a Scola di Cantu di a Casa di a lingua di l'ADECEC presentera "E Donne in cantu", un magnificu prugramma musicale. In prima parte, senterete u talentu vucale di l’associu "Ghjuventù Cerviuninca" direttu da Nathalie Vasta-Simonetti. Infine, durante u dopu meziornu, i visitanti senteranu l’interludi musicali folk’n roll di u Gruppu Isulanders.