St’opera hè a prima parte di u rumanzu di giuventù di J-L Pieraggi Les enfants des Pandora - L'étoile et la mer traduttu in corsu.

Stella hè una ghjovana studenti curtinesa appassiunata di scenzi è di natura. Sempri curiosa, attiva è sensibuli di ghjornu, li veneni a notti strani sonnii chì a portanu à sparta avventuri incù ghjenti particulari è ancu animali ecceziunali…

Dici Jean-Louis Pieraggi: Si ni và a caterna a nostra pianetta. Ogni ghjorni tuttu hè di mali in peghju è l’affari diventa gravu. Avvisata da quiddi, animali o ghjenti, chì sentini impighjurì a situazioni, Stella si dà di rimenu pà fà cambià i cosi. I so sogni, i so quistioni, a so passioni è a so vulintà di fà sarani tant’ aiuti in a so cerca. Da i panchi di l’università à i stazzi muntagnoli, da l’alti sarri isulani à u mari prufondu, da tempesti à maelstrom, si palesa pian’ pianinu a reta misteriosa chì leia trà eddi tuttu u vivu. Di ghjornu Stella hè impachjulita, viva è istitiva ma quandi affaca a notti, edda sunnieghja, è issi sogni à purtarani à campà fatti strasurdinarii.

Jean-Louis Pieraggi hè agenti à l’uffiziu di l’ambienti di a Corsica, in carica di a sensibilisazioni à prò di i ghjovani. Publicheghja quì u so primu rumanzu ecologicu dopu à numarosi attività in leia cù a salvezza di a natura. Un rumanzu d'eculugia muderna pà zittedoni è innamuriti di Natura è di Literatura.