L'associu di a « Guardia Corsa Papale », presidatu da Yves Pasquali, hà unuratu di novu in Roma a memoria di i Corsi chì sò stati à u serviziu di a Santa Sede. In u quadru di e feste di Noantri è di a Madonna Fiumarola, una grande messa in lingua corsa hè stata celebrata in a Basilica San Crisogono del Trastevere, l’anziana chiesa nazionale dei corsi, cù l’abbate Pierre Bertoni, padre Venanzio, capu di a basilica, padre Don Asolan, rettore di Santa Agata è u diacunu François Aimé Arrighi cù numerose cunfraterne è cristiani di l’isula, in particulare Marie-Antoinette Maupertuis, a presidente di l’Assemblea di Corsica.

Durante a grande prucessiò di a Madonna Fiumarola scuperta da marinari corsi, i cunfratelli rumani anu interpretatu u Dio Vi Salvi Regina cù a presenza di l’autorità civile è religiose di Roma. 

L’associu hè statu creatu pè rammentà a memoria di e guardie corse di u Papa. Cù a storia di sti curagiosi suldati incaricati di mantene l’ordine in Roma è di prutege u Papa, l’associu cerca à mette in risaltu una parte di a storia di l’isula.

Assaltati da i barbareschi è i mori, i corsi sò stati ricevuti in modu uspidalieru da i rumani è u papa in core stessu di a cristianità. Durante l’ottesimu seculu, una culunia corsa si stalla in Ostia, cultiveghja terre, è assicureghja a guardia militare di u muru edificatu da u papa Leone IV. Cusì, i corsi anu campatu in armunia cù i rumani. Ma, versu a metà di u XVIIu seculu, a Francia rompe sta storia fraterna pè sottumette u papatu è cunsulidà u so putere di fronte à un rè di Spagna putente. Louis XIV taglia in modu viulente a leia chì addunia i Corsi à u papatu è à Roma. Sta rumpitura hà duratu long’à a storia. Dapoi u 2014, cù a riabilitazione di ste guardie corse, a rinascita di e leie cù U Vaticanu, Roma, u quartiere di u Trastevere, si ritrova una parte di u passatu di a Corsica.