Sta casa d’edizione fundata da Guy Firoloni hè diretta oghje ghjornu da Bernard Biancarelli. 40 anni fà in Corsica, ci eranu poche poche librerie è quasi micca editori. A scumessa di Guy Firoloni era di creà un’intrapresa d’edizione, militante. Una scumessa ardita in un ambiente vuluntariu ma ùn ancu strutturatu. A prima di e grande ligne edituriale hè a difesa di a lingua è cultura corsa. D’altronde, u primu libru d’Albiana hè statu dizziunariu corsu-francese U Muntese in 4 vulumi. Anu travagliatu assai pè strutturà e cunniscenze patrimuniale. A casa s’hè sviluppata in duminii più cumuni cum’è a creazione litteraria è u libru d’accumpagnamentu turisticu. Durante sti 40 anni, u mudellu edituriale hà evuluatu secondu e capacità di vendita. A principiu, e vendite si facianu ind’è a ghjente.

Cusì, hè statu vendutu u Muntese o u Canta u Populu Corsu. Frà e migliore vendite, a cullezzione Tempi fà di Pierre-Jean Luccioni. U primu ch’hà francatu e 25 000 vendite. A scuperta di u premiu Goncourt Jérôme Ferrari, U Décameron 2020, migliore libru di u cunfinamentu pè a ghjuria di Livre-Hebdo è trufeu naziunale di l’edizione, un altru trufeu pè a casa d’edizione Albiana in a categuria “Azzione territuriale”. In u 2021, u libru di Wanda Mastor nant’à l’autonumia hè statu dinù un successu. L’originalità di l’edizione in Corsica hè d’esse presente in e fiere artigianale. Hè dinù vicina di u lettore. Albiana hà creatu u podcast “Barattà” pè ghjust’appuntu barattà, scambià ma dinù discorre. Cusì, si cunnosce e discussione trà l’editore è l’autore, pè sapè cumu hè natu un libru, da chì discussione.