In a cuntinuità di a so sperienza cù u cuncertu Mezu Mezu dui, u gruppu isulanu esce u so primu dischettu : Noi Cinque, tituli chì trattanu di tematiche di l’isula induve si pò dighjà rimarcà a grinfia di a squadra…

 L’Avvinta hè una squadra nova è ghjovana chì face a so strada in l’universu di u cantu corsu. Un percorsu chì l’hà permessu di participà, d’ottobre 2023, à u famosu cuncertu « Mezu Mezu » dui à « La Défense Arena ». « Una di e sale e più maiò d’Auropa, spiega Antone Parodin, membru di u gruppu, 20000 persone. Un mumentu unicu di cumunione cù parechji artisti è gruppi. »

Ghjè in a cuntinuità d’issu mumentu chè u gruppu hà vulsutu prisentà u so primu dischettu. Noi. « Un titulu d’una canzona scritta è cumposta qualchì annu fà, aghjusta u musicante, hè u fruttu d’una cullaburazione cù parechji scrittori cum’è Alanu di Megliu (Contrabanderi) o Ornella Nobili (Stende l’ale), ghjovana pueta balanina, d’altri musicanti ghjunti à aduniscesi à u nostru prughjettu, d’altri scrittori anu messu a so manu, pensu à Petru Squarcini o Ghjacumu Fusina è, di sicuru, noi stessi. »

Particularità d’issu dischettu, hè statu registratu in e cundizione « Live ». U prughjettu marca una tapa in u percorsu di l’Avvinta. Di fattu, isse canzone eranu dighjà scritte è cumposte. Hè una manera, per a squadra, di mustrà dighjà u so travagliu ch’elli cantanu inseme dapoi dighjà qualchì tempu.

« Per noi, era dinò una manera di mette in vale una certa reflessione puetica, cuntinueghja Antone Parodin, hè una mossa artistica ma sopratuttu puetica induve avemu vulsutu palisà una certa nuvità in l’universu di u cantu corsu oghjincu. À tempu, hè una realità musicale chì ci assumiglia è ci curresponde. »

Cù issu primu discu, u gruppu vole prisentà una spezia di spechju chì ripresenta a squadra, e so sensiblità musicale, a so manera di cuncepisce u mondu, u so parè nantu à a sucetà... « Hè dinò una manera di rende contu di l’ambiu è di i scambii ch’è n’avemu avutu durante l’estatina quandu avemu giratu in Corsica. Un bellu ritrattu. »

S’è pueta corsi anu participatu à issu dischettu, Antone Parodin è i so cumpagni anu scrittu è cumpostu qualchì canzona . Ogni cantu ci face sente l’ambiu d’un’epica. Cù issi cinque tituli, una certa maturità musicale si risente dinò. E sunurità muderne currespondenu à u campà d’issi ghjovani. « L’influenze musicale sò diverse in u gruppu, certi anu fattu u cunservatoriu, d’altri anu una furmazione piuttostu tradiziunale o una pratica di a ghitarra particulare, pensu à Laurent Matteaccioli chì face u rock cù un altru gruppu. Hè tuttu st’inseme chì face l’Avvinta. U nostru scopu hè d’avè una musica simplice, scritti capiscitoghji. » 

Un stilu chì cerca à mette in vale a puesia corsa. A canzona « I Campu » scritta è cumposta da Antone Parodin è Laurent Matteaccioli marca un tempu forte di u discu. Mette in vale u talente musicale di a squadra... Dapoi u principiu, u gruppu s’hè allargatu per dà un inseme d’un decina di ghjuvani ch’anu participati à u dischettu : Lisandru Bonini, Laurent Matteaccioli, Francè Muraccioli, Don Louis Castola-Luccioni, Antone Parodin (canti), Niculau Giovanetti, Petru Francescu Ucciani (ghitarra) Dumè Bevilacqua (bassa), Romain Gianelli (percussione), Pierrot Agostinetti (bassa). U gruppu hà da fà, avà a prumuzione d’issu dischettu nanzu d’appruntà ne forse, un altru. È si dice chè canzone in i tiretti, ci ne seria dighjà unepochi…

Origine : Journal de la Corse