Morgane Bastid-Albertini, 30 anni, face ride i Corsi nant’à e rete suciale. Hè di u paese di Centuri. Hà cuminciatu durante u primu cunfinamentu à u veranu 2020. Dapoi a zitellina, hà sempre vulsutu fà a cumedia è li piace à macagnà a ghjente ind’a vita oghjinca. S’hè servutu di e stonde di a so vita quandu i so amichi a stuzzicavanu. Hà fighjatu assai e video d’umuristi prufessiunali nant’à e rete suciale è hà vulsutu fà cum’è elli. Cusì, ghjoca u rolu d’altre persone pè fà ride o riface scene di filmi. Trova dinù l’estru in a so vita d’ogni ghjornu è a vita di a ghjente. I so mudelli sò Tzek è Pido, Camille Lelouche o Anaide Rozam. Pè Morgane, l’umurismu è l’autoderisione sò una forma di sulidarità.

Altra cumediente, Doria Pazzoni-Gavini hè di u paese di Livia. Hà sempre fattu ride, ancu senza vulella, a famiglia è l’amichi. In ogni paese induv’ella ghjoca, impruviseghja assai à parte da i so persunagi Ghjuvanacciu scemu in capu, a so moglia Maddalena è ogni tantu u mulatteru è Jo Populo.

Infine Paulina Pietri hè sempre stata passiunata di teatru. U so persunagiu, Zia Maria Paulina scumbatte cù i strapazzi di u mondu mudernu. Li piace a cunfidenza cù u publicu di i paesi sin’à mustralli a so camisgia di notte è u so calzunellu XXL. A cumediante s’hè ispirata da a vita difficiule di e so zie è e so cacciate dirette ma calurose.