St’addunita di liceani hè in leia cù u cullettivu “Pour Que Vivent Nos Langues / Da Ch’elle Càmpinu e Nostre Lingue”. Stu cullettivu addunisce tutti i cumbatti pè a ricunniscenza di e lingue regiunale, minuritarie nant’à u so territoriu. Da a Brittagna à a Corsica, l’Alsazia, u Paese Bascu, a Catalogna, l’Occitania…, sindicati, associ, cullettivi ci si ritrovanu. In Corsica cù l’associu Scola Corsa, u STC Educazioni, l’AILCC, Associu di l’Insignanti di Lingua è Cultura corsa… Fundatu in u 2019 da i deputati François Alfonsi à u Parlamentu europeu è Paul Molac à l’Assemblea naziunale, stu cullettivu hà cunduttu parechje azzione pè ottene avanzate in a ricunniscenza di ste lingue cù in particulare u votu di a lege Molac. Sta lege pè a prutezzione patrimuniale di e lingue regiunale hè stata vutata l’8 d’aprile di u 2021 cù una magiurità di 247 deputati contr’à 76.

U cullettivu si rallegra di st’evuluzione legislativa ma criticheghja a situazione di e lingue minuritarie in Francia. I mezi attribuiti da u Statu sò troppu pochi vistu e necessità è ci hè sempre l’interdizzione in Francia di chjamà i so figlioli in lingua basca cum’è Iñaki o Fañch. U cullettivu cunsidereghja chì a decisione di u cunsigliu custituziunale u 21 di maghju di u 2021 nuce à e nostre lingue è culture. Un avisu spartutu da trè rapurtadori speciali di l’Altu Cumissariatu di e Nazione Unite à i diritti di l’omu. I so cummenti è sugestione, mandati à a Francia u 31 di maghju di u 2022, ùn anu avutu risposta da a u Statu. A giuventù di Francia si mubiliseghja dunque pè difende e so lingue. Dumanda in particulare à i deputati un’evuluzione di l’articulu 2 di a Custituzione francese precisendu chì solu u francese hè lingua di a republica. L’addunita davant’à l’assemblea Naziunale u 7 di ferraghju à meziornu s'hè fatta nanzu u scontru trà cinque liceane è liceani cù i deputati membri di u gruppu di studii “Lingue è culture regiunale” u listessu ghjornu da un’ora menu un quartu à duie ore.