Issu venneri 12 d’aprile à 11 ore in Cervioni, hè statu inauguratu l’affrescu realizatu da Piombu. Un prughjettu purtatu da a Cummunità di e cumune di a Costa Verde, in cullaburazione cun l’Adecec, sott’à a direzzione di l’università di Corsica in u quadru di a tesa di dutturatu di Marcandria Peraut Zinu.

Issu affrescu c’invita à scopre a storia affascinente di u rughjone di a Costa Verde mettendu in risaltu persunalità emblematiche, chì sò illustrazione di u passatu è testimoni d’una lascita à longu andà.

Stu prugettu artisticu vole priservà è valurisà e memorie lucale per via d’una riprisentazione artistica chì mette à l'onore e memorie cumunale è intercumunale. Una creazione di l’artistu Hugo Peters, dettu Piombu, incaricatu di rende eterni, nant’à a petra, i ricordi è l’imaginariu di l’abitanti.

Da Teodoru di Neuhoff à Napulione Bonaparte o Pasquale Paoli, st'affrescu invita à riflette nant’à u passatu cumunu, à prezzà a qualità di e rialisazione di ste persunalità storiche è à capì a so influenza nant’à e nostra cultura è a nostra identità. Mette dinù in risaltu l’impurtanza di priservà è di tramandà u nostru patrimoniu à prò di e generazione future.