Sin’à u 2 di nuvembre, avemu un percorsu artisticu è patrimuniale in siti bunifazinchi nant’à u tema “Roma, Amor, a caduta di l’imperi”. Un tema chì rimanda à l’imperu rumanu ma dinù à l’altri, à u Mediterraniu è più precisamente à a prufezia misteriosa chì face cade l’imperi. In st’evenimentu culturale, si tratta di a nustalgia di i paradisi persi, d'emancipazione di u pensamentu, di a cunquista di a libertà, è di a custruzzione di un ideale chì porta digià in sè e grane di a so distruzzione. Sti temi seranu illustrati in l’opere d’una vintina d’artisti corsi è internaziunali, frà elli Basquiat è Blanca Li cù sculture, ritratti, video, pitture. Un’ufferta culturale nova in Corsica.

De Renava hè un’organisazione fundata in Corsica in u 2020 da Prisca Meslier è Dumè Marcellesi, è oghje ghjornu attore culturale di prima trinca in u Mediterraniu. I rispunsevuli s’impegnanu pè priservà u patrimoniu architetturale è ambientale grazia à mostre presentendu materiali, artigiani è sapè fà lucali. A Biennale organiseghja dinù visite sculare, visite in lingua corsa è una prugrammazione pluridisciplinaria ricca. 

Di più infurmazione: https://www.derenava-art.com/