U curtinese José Carducci, 60 anni, hà avutu parechje prufessione. Marinare, muradore, saldadore, preparatore fisicu è oghje ghjornu autore… “Di petre è di sangue” conta a storia rumanzata di a so famiglia. I genitori Félicité, Ours è a so discendenza. Ci hè quì l’omagiu di u scrittore à a so lascita famigliale è un ramentu di l’evenimenti di u vintesimu seculu in Corsica. Omagiu dinù à a prufessione di cavapetre, à u mondu minerale è à a Corsica muntagnola. Stu libru, rieditatu parechje volte, hè statu un successu. I lettori cumossi si ricunnoscenu in i persunagi è paisaghji descritti pè un viaghju sputicu ind’una Corsica chì ribomba cù nustalgia è emuzione pè parechji. 

U percorsu di José Carducci hè statu fundatu nant’à a passione, u travagliu accanitu. Dopu avè frequentatu u cullegiu è liceu Pasquale Paoli in Corti, hà raghjuntu l’intrapresa famigliale cum’è muradore ind’a cava di petre. D’altrò, u so amore di u sportu l’hà fattu diventà preparadore fisicu. Hà seguitatu corsi à u CREPS d’Aiacciu, l’università di Burgogna in Dijon, u centru di spertizia di a perfurmenza. Un’istituzione rinumata pè a preparazione fisica. Avendu ottenutu diplomi, hè vultatu in Corsica pè travaglià à u BCA, u Boxing Club Aiaccinu, u CAB, l’Etoile, u Rugby Club di Lucciana, è hà ancu una sperienza à l’OM.

José Carducci hè statu dinù attore in i filmi « A son image » di Thierry de Peretti, « Un Mohican » di Frédéric Farrucci, grazia à u so fisicu è a so voce. Altra passione: a scrittura dapoi a zitellina. Scrivia testi in corsu è francese spessu messi in musica. Hà scrittu in particulare pè a seria televisiva “Paese” nant’à Via Stella è infine stu primu rumanzu « Di petre è di sangue », evuchendu a so famiglia. Racontu riccu di storia è d’emuzione ch’ellu sparte cù lettori quand’ellu dedicheghja stu rumanzu.